পিতৃ আছিল জাতীয় দলৰ অভেদ্য দেৱাল। এইবাৰ তেওঁৰ ল’ৰাৰ পাল। ৰাহুল দ্ৰাবিড়ৰ উত্তৰাধিকাৰক আগুৱাই লৈ গৈ তেওঁৰ পুত্ৰ অনভয়ে ভাৰতীয় দলত স্থান দখল কৰিছে। অহা মাহত ভাৰতৰ ১৯ বছৰ অনুৰ্ধ দলে শ্ৰীলংকা ভ্ৰমণ কৰিব। সেই দলটোৰ বাবে সোঁহতীয়া বেটছমেন অনভয়ক লোৱা হৈছে। সদ্যহতে তেওঁক এদিনীয়া দলত ৰখা হৈছে। ‘দ্য ৱালৰ’ পুত্ৰৰ সফলতাত সুখী ক্ৰিকেট অনুৰাগী।
দ্ৰাবিড়ৰ দুই পুত্ৰ সমিত আৰু অনভয়ে সৰুৰে পৰাই বয়সভিত্তিক ক্ৰিকেট খেলি আহিছে। কৰ্ণাটকৰ ১৯ বছৰ অনুৰ্ধ দলৰ হৈ খেলিছে সমিতে। কিন্তু তেওঁ এতিয়াও ৰাষ্ট্ৰীয় দলৰ হৈ খেলা নাই। অৱশ্যে ভাতৃ অনভয়ে ককায়েকৰ আগতে নীলা জাৰ্চি পিন্ধিব পাৰিলে।
শেহতীয়াকৈ অনভয়ে কৰ্ণাটকৰ ১৯ বছৰ অনুৰ্ধ দলক বিনু মানকাড ট্ৰফীত নেতৃত্ব দিছিল। এই ১৭ বছৰীয়া বেটছমেনেগৰাকী বেটিঙত যথেষ্ট সফলো হৈছে। অনভয়ে মূলতঃ মধ্যম ক্ৰমত খেলে। দ্ৰাবিড়পুত্ৰই ৬ টা ইনিংছত ২২০ ৰান সংগ্ৰহ কৰে। ইয়াৰ ভিতৰত আছে হিমাচল প্ৰদেশৰ বিৰুদ্ধে ৮২ ৰানত অপৰাজিত ইনিংছ।
দুবছৰৰ পাছত আহি আছে ১৯ বছৰ অনুৰ্ধ বিশ্বকাপ। সেই কথা মনত ৰাখি ভাৰতীয় দলটোৱে আগন্তুক শ্ৰীলংকা ভ্ৰমণৰ বাবে প্ৰস্তুতি চলাব। ১৯ বছৰ অনুৰ্ধ বিশ্বকাপতো খেলিব পাৰিব ৰাহুলপুত্ৰই। অনভয়ে পিতৃৰ দৰে উইকেটকিপিঙো কৰে।
শ্ৰীলংকালৈ গ’লেই তেওঁ প্ৰথমবাৰৰ বাবে ৰাষ্ট্ৰীয় দলৰ হৈ খেলাৰ সুযোগ পাব। অহা মাহৰ ৪ তাৰিখৰ পৰা আৰম্ভ হ’ব ভাৰতীয় ১৯ বছৰ অনুৰ্ধ দলৰ শ্ৰীলংকা ভ্ৰমণ। বয়ছ ইন ব্লুৱে তিনিখন এদিনীয়া খেলিব। অৱশ্যে ৰেডবল দলত ৰখা হোৱা নাই দ্ৰাবিড় পুত্ৰক।
মন কৰিবলগীয়া যে দ্ৰাবিড়ৰ জ্যেষ্ঠ পুত্ৰ সমিতকো ১৯ বছৰ অনুৰ্ধ ৰাষ্ট্ৰীয় দলৰ বাবে মতা হৈছিল। ২০২৪ চনত অষ্ট্ৰেলিয়াৰ বিৰুদ্ধে খেলা দ্বিপাক্ষিক শৃংখলাৰ বগা আৰু ৰঙা বলৰ দলত আছিল।কিন্তু আঁঠুৰ আঘাতৰ বাবে তেওঁ খেলিব নোৱাৰিলে।
অৱশ্যে ঘৰুৱা ক্ৰিকেটত সমিতে বিভিন্ন প্ৰতিযোগিতাত ভাল প্ৰদৰ্শন আগবঢ়াইছে। ৰাহুল দ্ৰাবিড়ৰ ডাঙৰ পুত্ৰও ৰাষ্ট্ৰীয় দলৰ ৰাডাৰত আছে। ক্ৰিকেট অনুৰাগীসকলে আশা কৰিছে যে অনভয়ে আগন্তুক শ্ৰীলংকাৰ শৃংখলাত দ্ৰাবিড় বেটিঙৰ ঐতিহ্যক আগুৱাই নিব।
