বিজেপি ক্ষমতালৈ আহিলে বন্ধ হৈ থকা কাছাৰ কাগজকল কাৰ্য্যক্ষম কৰি তোলা হ’ব বুলি যোৱা বিধানসভা নিৰ্বাচনৰ পূৰ্বে পঞ্চগ্ৰামৰ এখন সভাত মোদীয়ে যি প্ৰতিশ্ৰুতি দিছিল সেয়া ‘মিছা’ত পৰিণত হ’ল। মোদীৰ ৫ বছৰ কাল উকলিল। কিন্তু কাছাৰ কাগজকল জীয়াই তোলা বাদেই, নাগাওঁ কাগজ কলটোও বন্ধ হৈ মুঠ প্ৰায় ১৬০০ কৰ্মচাৰী আৰু তেওঁলোকৰ পৰিয়ালবোৰলৈ দুৰ্য্যোগ নামিল।
তাৰ মাজতে এইবাৰ একেই স্থানত একেই প্ৰতিশ্ৰুতি আগ বঢ়াই কল দুটাৰ হতাশ কৰ্মচাৰীসকলক আশা দেখুৱাইছে বিৰোধী সভাপতি তথা কংগ্ৰেছৰ ৰাষ্ট্ৰীয় অধ্যক্ষ ৰাহুল গান্ধীয়ে।
৯ এপ্ৰিলত বৰাক উপত্যকাৰ পঞ্চগ্ৰামত এখন নিৰ্বাচনী সভাত গান্ধীয়ে কংগ্ৰেছ শাসনলৈ আহিলে কল দুটা “৬মাহৰ ভিতৰত পুনৰুজ্জীৱিত কৰি তোলা হ’ব” বুলি মন্তব্য কৰে।
গান্ধীয়ে কৰিমগঞ্জ সমষ্টিৰ কংগ্ৰেছ প্ৰাৰ্থী স্বৰূপ দাস আৰু শিলচৰ সমষ্টিৰ প্ৰাৰ্থী সুস্মিতা দেবৰ হৈ নিৰ্বাচনী প্ৰচাৰত অংশ লৈছিল।
তেওঁ বৰাক উপত্যকাক আন স্থানৰ সৈতে উপযুক্তভাৱে সংযোগ কৰি বাণিজ্যিক কেন্দ্ৰ হচাপে গঢ় দিয়া হ’ব বুলিও ভাষণত উল্লেখ কৰে। দেশৰ ৫ কোটি দৰিদ্ৰ পৰিয়ালক লক্ষ্য কৰি প্ৰস্তুত কৰা ন্যূনতম আয় যোজনা (ন্যায়)ৰ কথাও দোহাৰে।
পুৱা দহমান বজাত পাঁচগ্ৰাম খেলপথাৰত শিলচৰ, কৰিমগঞ্জ আৰু হাইলাকান্দি কংগ্ৰেছৰ উদ্যোগত নিৰ্বাচনী সভা আৰম্ভ হয় যদিও বতৰৰ বিঘিনিৰ বাবে কংগ্ৰেছৰ অধ্যক্ষজন শিলচৰৰ কুম্ভীৰগ্ৰাম বিমানকোঠৰ পৰা হেলিকপ্টাৰৰ পৰিৱৰ্তে গাড়ীৰে দুঘণ্টা পলমকৈ সভাস্থলীত উপস্থিত হয়।
উল্লেখযোগ্য যে নগাওঁ কাগজ কল আৰু কাছাৰ কাগজ কল বহু দিনৰ পৰা বন্ধ হৈ আছে।
যোৱা বিধানসভা নিৰ্বাচনৰ আগে আগে প্ৰধান মন্ত্ৰী নৰেন্দ্ৰ মোদীয়ে শিলচৰৰ পঞ্চগ্ৰামত হোৱা এখন নিৰ্বাচনী সভাত বন্ধ হৈ থকা কাছাৰ কাগজ কলটো শীঘ্ৰেই কাৰ্য্যক্ষম কৰি তোলাৰ প্ৰতিশ্ৰুতি দিছিল। কিন্তু প্ৰতিশ্ৰুতি সত্ত্বেও ২০১৫ চনৰ অক্টোবৰৰ পৰা বন্ধ হৈ থকা এই কলটো পুনৰুজ্জীৱিত কৰা নহ’ল। বৰং ২০১৬ চনৰ ১৩ মাৰ্চৰ পৰা নগাওঁ কাগজ কলৰ উৎপাদনো বন্ধহে হ’ল।
যোৱা বছৰ নৱেম্বৰত নমামি বৰাক উৎসৱত উপস্থিত থাকি কেন্দ্ৰীয় গুৰু উদ্যোগ মন্ত্ৰী (Heavy Industries and Public Enterprises) বাবুল সুপ্ৰিয়য়ো জাগীৰোডস্থিত নগাওঁ কাগজ কল আৰু কাছাৰ কাগজ কল পুনৰুজ্জীৱিত কৰাৰ বাবে পদক্ষেপ ল’ব বুলি ঘোষণা কৰিছিল।
আনহাতে গুৱাহাটীৰ সন্দিকৈ ছোৱালী মহাবিদ্যালয়ৰ ছাত্ৰীসকলক চৰকাৰে বিধানসভাৰ কামকাজ পৰিদৰ্শনৰ বাবে দিয়া এটা সুযোগৰ সময়ত পৰিস্মিতা বুঢ়াগোহাঁই নামৰ এগৰাকী ছাত্ৰীয়ে মুখ্য মন্ত্ৰীৰ সৈতে মত বিনিময় হওঁতে নগাওঁ কাগজ কলৰ কৰ্মচাৰীসকলৰ দুৰ্দশাৰ কথা বিৱৰি কৈছিল চকুত চকুলো লৈ। তেতিয়া ব্যৱস্থা কৰাৰ আশ্বাস দিছিল মুখ্য মন্ত্ৰী সোণোৱালেও। কিন্তু এইবোৰ সত্ত্বেও আজিও দৰমহাহীন অৱস্থাত দিন পাৰ কৰিছে কৰ্মচাৰীসকলে। বন্ধ হৈ আছে কল দুটাৰ সকলো কামকাজ। তাৰ মাজতে কল দুটা চৰকাৰে ব্যক্তিগত খণ্ডক নিলামত দিয়াৰ বাতৰিও ওলাইছে।
পৰিয়াল চলোৱাৰ ব্যৰ্থতাত লাজ-অপমান-হতাশা সহিব নোৱাৰি ইতিমধ্যে কল দুটাৰ কেইবাজনো কৰ্মচাৰীয়ে আত্মহত্যা কৰিছে।
