বাজেট অধিৱেশন আৰম্ভ হোৱাৰ লগে লগে নীট পৰীক্ষাৰ বিসংগতিক লৈ লৈ সংসদত উত্তেজনাৰ সৃষ্টি হয়। বিৰোধীৰ দলপতি ৰাহুল গান্ধী আৰু অখিলেশ যাদৱে শিক্ষামন্ত্ৰীক আক্ৰমণ কৰি তুলাধূনা দিয়ে। শিক্ষামন্ত্ৰীগৰাকীৰ পদত্যাগৰ বাবেও দাবী জনাই বিৰোধীয়ে। অৱশ্যে কেন্দ্ৰীয় শিক্ষামন্ত্ৰী ধৰ্মেন্দ্ৰ প্ৰধানেও প্ৰতিক্ৰিয়া প্ৰকাশ কৰে।
সংসদত বিৰোধী দলপতি ৰাহুল গান্ধীয়ে কয়, “সমগ্ৰ দেশৰ বাবে স্পষ্ট যে আমাৰ পৰীক্ষা ব্যৱস্থাত এটা অতি গুৰুতৰ সমস্যা আছে। কেৱল NEET নহয়, সকলো ডাঙৰ পৰীক্ষাতে এই সমস্যা আছে। শিক্ষামন্ত্ৰীয়ে সকলোকে দোষাৰোপ কৰাৰ বাহিৰে নীট পৰীক্ষাৰ পদ্ধতিগত ভুলৰ বাবে কি পদক্ষেপ গ্ৰহণ কৰিছে?”
কংগ্ৰেছৰ সাংসদগৰাকীয়ে শিক্ষামন্ত্ৰীৰ পৰা জানিব বিচাৰে – ২৪ লাখ ছাত্ৰ-ছাত্ৰীৰ ভৱিষ্যতক লৈ হেতালি খেলা এই সকলোবোৰ ঘটনাৰ দায়িত্ব লৈ তেওঁ মন্ত্ৰী পদৰ পৰা পদত্যাগ কৰিবনে?
ইণ্ডিয়া মিত্ৰজোঁটৰ অন্যতম নেতা, সমাজবাদী পাৰ্টীৰ সাংসদ অখিলেশ যাদৱেও নীট বিষয়ত শিক্ষামন্ত্ৰী ধৰ্মেন্দ্ৰ প্ৰধানক আক্ৰমণ কৰে। তেওঁ কয়, “এই চৰকাৰে প্ৰশ্নকাকত ফাদিলত অভিলেখ সৃষ্টি কৰিব। কিছুমান কেন্দ্ৰ আছে য’ত ২০০০ৰো অধিক প্ৰাৰ্থী উত্তীৰ্ণ হৈছে। এই শিক্ষামন্ত্ৰী যেতিয়ালৈকে থাকিব তেতিয়ালৈকে ছাত্ৰ-ছাত্ৰীয়ে ন্যায় নাপাব”।
ইণ্ডিয়া এলায়েন্সৰ নেতা দুগৰাকীকো প্ৰত্যুত্তৰ দিয়ে ধৰ্মেন্দ্ৰ প্ৰধানে। ৰাহুল গান্ধীক সম্বোধন কৰি তেওঁ কয়, “যোৱা ৭ বছৰত প্ৰশ্নকাকত ফাদিলৰ কোনো প্ৰমাণ পোৱা নাই। এই বিষয়টো উচ্চতম ন্যায়ালয়ত বিচাৰাধীন হৈ আছে। মই সম্পূৰ্ণ দায়িত্ব লৈ ক’ব পাৰো যে ২৪০টাতকৈও অধিক পৰীক্ষা সফলতাৰে অনুষ্ঠিত হৈছে।”
ৰাহুল গান্ধীৰ লগতে শিক্ষামন্ত্ৰীয়ে অখিলেশ যাদৱকো আক্ৰমণ কৰে। তেওঁ কয়, মই ৰাজনীতি কৰিব নিবিচাৰো। কিন্তু যেতিয়া অখিলেশ উত্তৰ প্ৰদেশৰ মুখ্যমন্ত্ৰী আছিল, তেতিয়াও প্ৰশ্ন উত্থাপন হৈছিল। মোৰ হাতত সেই তালিকাখন আছে।
সোমবাৰৰ পৰা লোকসভাত আৰম্ভ হৈছে বাজেট অধিবেশন। মঙলবাৰে সপ্তমবাৰৰ বাবে বাজেট দাখিল কৰিব বিত্তমন্ত্ৰী নিৰ্মলা সীতাৰমণে। ইয়াৰ পূৰ্বে সোমবাৰে সংসদৰ দুয়োটা সদনত ‘বিত্তীয় জৰীপ’ দাখিল কৰা হয়।
