‘ভোটৰ পিছত এইবাৰ দল চুৰি!’ তৃণমূলৰ প্ৰতীক ফ্ৰীজ কৰাৰ পিছতেই সৰৱ ৰাহুল, নিৰ্বাচন আয়োগক তুলাধূনা

আগন্তুক উপ-নিৰ্বাচনৰ পূৰ্বে অভূতপূৰ্ব সংকটত পৰিছে তৃণমূল কংগ্ৰেছ। যিহেতু দলটোৰ আভ্যন্তৰীণ বিবাদত মমতা বেনাৰ্জী আৰু ঋতাব্ৰত বেনাৰ্জীৰ গোটে নিজকে প্ৰকৃত তৃণমূল বুলি দাবী কৰিছে, সেয়েহে নিৰ্বাচন আয়োগে ‘অল ইণ্ডিয়া তৃণমূল কংগ্ৰেছ’ নাম আৰু দলৰ সংৰক্ষিত ‘যোৰা ফুল’ প্ৰতীক ব্যৱহাৰত আপাততঃ নিষেধাজ্ঞা আৰোপ কৰিছে।

অন্তৱৰ্তীকালীন নিৰ্দেশত দুয়োটা গোটকে বিকল্প নাম আৰু প্ৰতীক প্ৰস্তাৱ কৰিবলৈ কোৱা হৈছে। এই সিদ্ধান্তৰ তীব্ৰ বিৰোধিতা কৰিছে ৰাহুল গান্ধীয়ে। তেওঁৰ মতে, শিৱসেনা আৰু এন চি পিৰ ক্ষেত্ৰত যি ঘটনা ঘটিছিল, তৃণমূলৰ ক্ষেত্ৰতো আয়োগে একে ধাৰা বজাই ৰাখিছে। তেওঁ অভিযোগ কৰে যে বিজেপি আৰু নিৰ্বাচন আয়োগে দল ভঙাৰ পৰিস্থিতিৰ সৃষ্টি কৰিছে আৰু পিছত দলৰ নিৰ্বাচনী প্ৰতীক কাঢ়ি লোৱা হৈছে।

ছ’চিয়েল মিডিয়াত ৰাহুলে দাবী কৰে যে যদি কোনো দল ‘চুৰি’ হ’ব পাৰে, তেন্তে দেশৰ কোটি কোটি মানুহৰ ভোট চুৰি হোৱাৰ আশংকা থাকি যায়। তেওঁৰ ভাষাত ‘ভোট চুৰি’ আৰু ‘চৰকাৰ চুৰি’ৰ পিছত এতিয়া ‘দল চুৰি’ও গণতান্ত্ৰিক অৱনতিৰ প্ৰতীক হৈ পৰিছে। নিৰ্বাচন আয়োগৰ সাংবিধানিক কৰ্তব্য জনসাধাৰণৰ ৰায় ৰক্ষা কৰা, কিন্তু সেই ৰায় উলংঘা কৰাৰ ক্ষমতাৰ কাষত আয়োগে থিয় দিছে বুলি তেওঁ  অভিযোগ উত্থাপন কৰে।

ৰাজ্যত চৰকাৰ সলনি হোৱাৰ পিছৰে পৰা কংগ্ৰেছক মমতা বেনাৰ্জীৰ কাষত থিয় দিয়া দেখা গৈছে। ৪ মে’ৰ পিছত মমতা আৰু অভিষেক দিল্লীলৈ উৰা মাৰিছিল। কংগ্ৰেছলৈ ঘূৰি অহাৰ জল্পনা-কল্পনাৰ সৃষ্টি হৈছিল। যদিও ছোনিয়া গান্ধীৰ সৈতে দীৰ্ঘক্ষণ বৈঠকৰ অন্তত কোনো সূত্ৰ আগবাঢ়ি নাহিল, তথাপিও তৃণমূল কংগ্ৰেছৰ কঠিন সময়ত মমতা বেনাৰ্জীৰ সৈতে থকা বুলি কংগ্ৰেছে আকাৰে-ইংগিতে স্পষ্ট কৰি দিছে। আৰু সেইটো এইবাৰো দেখা গ’ল।

পোষ্টটোত ৰাহুলে স্পষ্ট কৰি দিয়ে যে আয়োগে যি কৰিলে সেয়া গ্ৰহণযোগ্য নহয়। এই সিদ্ধান্তৰ বিৰুদ্ধে যুঁজ অকল মমতা বেনাৰ্জীৰ নহয়। এই যুঁজখন দেশৰ প্ৰতিটো ৰাজনৈতিক দলৰ, মুক্ত আৰু নিকা নিৰ্বাচন বিচৰা প্ৰতিজন ভোটাৰৰ।

ইফালে আয়োগৰ এই সিদ্ধান্তৰ ফলস্বৰূপে আপাততঃ তৃণমূল কংগ্ৰেছৰ মূল নাম বা যোৰা ফুল প্ৰতীকত কালিঘাট বা ঋতব্ৰত কোনো পক্ষই উপ-নিৰ্বাচনত প্ৰতিদ্বন্দ্বিতা কৰিব নোৱাৰিব। শুকুৰবাৰে পুৱা ১১ বজাৰ ভিতৰত দুয়োটা গোটক তিনিটা দলৰ নাম আৰু তিনিটা মুক্ত প্ৰতীকৰ পছন্দ দিবলৈ কোৱা হৈছে। তাৰ পৰাই আয়োগে প্ৰতিটো গোটৰ বাবে এটা নাম আৰু চিহ্নৰ সিদ্ধান্ত ল’ব। এই ব্যৱস্থা এতিয়াৰ বাবে অস্থায়ী। দলটোৰ সাংগঠনিক নিয়ন্ত্ৰণ আৰু নাম আৰু প্ৰতীকৰ দাবী সন্দৰ্ভত এতিয়াও চূড়ান্ত সিদ্ধান্ত লোৱা হোৱা নাই।

पहले शिवसेना, फिर NCP और अब तृणमूल कांग्रेस।

हर बार एक ही पैटर्न – BJP और चुनाव आयोग मिलकर एक पार्टी को तोड़ते हैं। फिर उसका चुनाव चिन्ह छीन लिया जाता है।

जब पूरी की पूरी पार्टी चोरी हो सकती है, तो करोड़ों भारतीयों के वोट चोरी होना भी हैरानी की बात नहीं।

वोट चोरी। सरकार चोरी।…

— Rahul Gandhi (@RahulGandhi) September 18, 2026

পশ্চিম বংগৰ নন্দিগ্ৰাম আৰু ৰেজিনগৰ বিধান সভা সমষ্টিৰ উপ-নিৰ্বাচন অহা ৬ অক্টোবৰত অনুষ্ঠিত হ’ব। সেই সময়তে অসমৰ নগাঁও লোকসভা সমষ্টিতো উপ-নিৰ্বাচনৰ দিন ধাৰ্য কৰা হৈছে। তাৰ পূৰ্বে তৃণমূল কংগ্ৰেছৰ দুয়োটা গোটৰ মাজত দলৰ নাম, সাংগঠনিক কৰ্তৃত্ব আৰু যোৰা ফুল প্ৰতীকক লৈ হোৱা বিবাদ নিৰ্বাচন আয়োগৰ ওচৰ পাইছে। বিগত কেইসপ্তাহমানৰ পৰা আয়োগে দুয়োপক্ষৰ বক্তব্য আৰু নথি-পত্ৰ পৰীক্ষা কৰি আহিছে।

এতিয়া লক্ষণীয় হ’ব যে মমতা বেনাৰ্জীয়ে যোৰা ফুলক এৰি কোনটো প্ৰতীক নতুনকৈ বাছি লয়, বা কোনটো প্ৰতীকত ঋতব্ৰত শিবিৰে প্ৰাৰ্থী প্ৰক্ষেপ কৰিবলৈ সন্মত হয়।