উত্তৰাখণ্ডৰ ডেৰাডুনত এগৰাকী মহিলাক ৰাহুল গান্ধীৰ সহকাৰী পৰিচয় দি নিৰ্বাচনী টিকট দিয়াৰ প্ৰতিশ্ৰুতিৰে লাখ লাখ টকা লুট কৰা এক চাঞ্চল্যকৰ ঘটনা পোহৰলৈ আহিছে। ভাৱনা পাণ্ডে নামৰ মহিলাগৰাকীয়ে আৰক্ষীৰ ওচৰত দাখিল কৰা
অভিযোগ অনুসৰি কনিষ্ক নামৰ এজন যুৱকে তেওঁক ফোন কৰি নিজকে ৰাহুল গান্ধীৰ ঘনিষ্ঠ সহকাৰী বুলি চিনাকি দিছিল। কেৱল সিমানেই নহয় মহিলাগৰাকীৰ বিশ্বাস অৰ্জন কৰিবলৈ যুৱকজনে উত্তৰাখণ্ডৰ প্ৰাক্তন মুখ্যমন্ত্রী হৰিশ ৰাৱাট, সাংসদ যশপাল আৰ্য আৰু প্ৰাক্তন মন্ত্ৰী হৰক সিং ৰাৱাটৰ দৰে কেইবাজনো প্ৰভাৱশালী ৰাজনৈতিক নেতাৰ মাত নকল কৰি কথা পাতিছিল। এনেদৰে জাল পেলাই যুৱকজনে মহিলাগৰাকীক নিৰ্বাচনত টিকট দিয়াৰ প্ৰলোভন দিছিল।
প্ৰৱঞ্চকজনে মহিলাগৰাকীক জনাইছিল যে কংগ্ৰেছৰ নেতা আৰু সাংসদসকল বৰ্তমান ডেৰাডুনৰ এখন হোটেলত বাহৰ পাতি আছে আৰু আগন্তুক নিৰ্বাচনৰ বাবে এটা জৰীপ চলাই থকা হৈছে। এই কামৰ বাবে অনুদানৰ প্ৰয়োজন বুলি কৈ তেওঁ মহিলাগৰাকীৰ পৰা ধন বিচাৰিছিল আৰু সেই ধন পিছত ঘূৰাই দিয়া হ’ব বুলিও প্ৰতিশ্ৰুতি দিছিল। তেওঁৰ কথা বিশ্বাস কৰি মহিলাগৰাকীয়ে যোৱা ১৩ এপ্ৰিলত প্ৰথম কিস্তিত চাৰে ন লাখ টকা এটা নিৰ্দিষ্ট বেংক একাউণ্টলৈ পঠিয়াইছিল। ইয়াৰ পিছত তেওঁ নগদ পাঁচ লাখ টকাও প্ৰদান কৰিছিল। অভিযোগ অনুসৰি আন এজন ব্যক্তিয়ে নিজকে মহাৰাষ্ট্ৰৰ এজন সাংসদ বুলি পৰিচয় দি মহিলাগৰাকীৰ পৰা বাকী থকা চাৰে ১১ লাখ টকা হস্তগত কৰে। এনেদৰে কেইবাটাও পৰ্যায়ত মুঠ ২৫ লাখ টকা প্ৰৱঞ্চনা কৰা হয়।
টকাখিনি দিয়াৰ কিছু দিনৰ পিছত যেতিয়া ভাৱনা পাণ্ডেই নিজৰ ধন ঘূৰাই বিচাৰিছিল তেতিয়া প্ৰৱঞ্চকসকলে বাৰে বাৰে সময় বিচাৰি কথাটো এৰাই চলিবলৈ চেষ্টা কৰিছিল। শেষত প্ৰতাৰিত হোৱা বুলি অনুভৱ কৰি মহিলাগৰাকীয়ে অৱশেষত আৰক্ষীৰ কাষ চাপে আৰু সকলো ঘটনা বিৱৰি কয়। আৰক্ষীয়ে মহিলাগৰাকীৰ অভিযোগৰ ভিত্তিত বিভিন্ন ধাৰাৰ অধীনত এটা গোচৰ ৰুজু কৰি তদন্ত আৰম্ভ কৰিছে। অৱশ্যে বৰ্তমানলৈকে এই বৃহৎ প্ৰৱঞ্চনাৰ সৈতে জড়িত কাকো গ্ৰেপ্তাৰ কৰিব পৰা নাই। আৰক্ষীয়ে এতিয়া অভিযুক্ত কনিষ্ক আৰু তেওঁৰ সহযোগীসকলৰ সন্ধান চলাই আছে।
