বিৰোধী দলপতি ৰাহুল গান্ধীৰ বিৰুদ্ধে পুনৰ সৰব হৈ পৰিছে শাসকীয় বিজেপি দল। এইবাৰ বিজেপি সাংসদ নিশিকান্ত ডুবেই লোকসভাত ৰাহুল গান্ধীৰ সাংসদ পদ বাতিল কৰাৰ এক গুৰুতৰ দাবী উত্থাপন কৰিছে। ইয়াৰ পূৰ্বেও এটা মানহানিৰ গোচৰত ৰাহুল গান্ধীৰ সাংসদ পদ এবাৰ বাতিল হৈছিল যদিও পৰৱৰ্তী সময়ত আদালতৰ নিৰ্দেশত তেওঁ নিজৰ পদ ঘূৰাই পাইছিল। কিন্তু এইবাৰ তেওঁৰ বিৰুদ্ধে ৰাষ্ট্ৰবিৰোধী মন্তব্য কৰাৰ অভিযোগ উত্থাপন কৰিছে বিজেপিয়ে। বিজেপি সাংসদ নিশিকান্ত ডুবেই বৃহস্পতিবাৰে লোকসভাত এক বিশেষ প্ৰস্তাৱ দাখিল কৰি কয় যে ৰাহুল গান্ধীয়ে সংসদত থিয় হৈ ক্ৰমাগতভাৱে এনে কিছুমান কথা কৈছে যাৰ কোনো সঠিক ভিত্তি নাই। তেওঁ অভিযোগ কৰে যে জৰ্জ ছ’ৰ’ছৰ দৰে দেশবিৰোধী শক্তিৰ সহায়ত ৰাহুল গান্ধীয়ে সমগ্ৰ দেশক বিপথে পৰিচালিত কৰিবলৈ চেষ্টা কৰিছে আৰু ইয়াৰ ফলত দেশৰ বৃহৎ ক্ষতি হৈছে।
নিশিকান্ত ডুবেই এই বিষয়টোত অত্যন্ত কঠোৰ স্থিতি গ্ৰহণ কৰি দাবী জনাইছে যে ৰাহুল গান্ধীৰ সাংসদ পদ কেৱল বাতিলেই নহয়, তেওঁক ভৱিষ্যতে কোনো নিৰ্বাচনত প্ৰতিদ্বন্দ্বিতা কৰিবলৈ অনুমতি দিব নালাগে। উল্লেখ্য যে বাজেট অধিৱেশনৰ আৰম্ভণিৰে পৰাই ৰাহুল গান্ধীয়ে বিভিন্ন ইছ্যু লৈ চৰকাৰক তীব্ৰ আক্ৰমণ কৰি আহিছে। প্ৰাক্তন সেনাধ্যক্ষৰ বিতৰ্কিত কিতাপৰ পৰা আৰম্ভ কৰি ভাৰত-আমেৰিকাৰ মাজত হোৱা বাণিজ্যিক চুক্তিক লৈ ৰাহুলে চৰকাৰক তীব্ৰ সমালোচনা কৰিছে। তেওঁ চৰকাৰৰ বিৰুদ্ধে ভাৰত মাতৃক আমেৰিকাৰ ওচৰত বিক্ৰী কৰাৰ দৰে গুৰুতৰ অভিযোগো উত্থাপন কৰিছে। ৰাহুলে দাবী কৰা মতে চৰকাৰে কৃষকৰ স্বাৰ্থৰ সৈতে আপোচ কৰি আমেৰিকাৰ ওচৰত সম্পূৰ্ণৰূপে আত্মসমৰ্পণ কৰিছে আৰু ভাৰতৰ শক্তি সুৰক্ষা আনৰ হাতলৈ ঠেলি দিছে।
বিৰোধী দলপতিগৰাকীৰ এনে আক্ৰমণাত্মক স্থিতিৰ পাছতে বিজেপি শিবিৰত তীব্ৰ প্ৰতিক্ৰিয়াৰ সৃষ্টি হৈছে। বিজেপিৰ এটা অংশই ৰাহুল গান্ধীৰ বিৰুদ্ধে বিশেষাধিকাৰ ভংগৰ প্ৰস্তাৱ অনাৰ কথা চৰ্চা কৰি আছিল যদিও নিশিকান্ত ডুবেই পোনপটীয়াকৈ তেওঁৰ সাংসদ পদ খাৰিজ কৰাৰ দাবী উত্থাপন কৰাত পৰিস্থিতি অধিক গৰম হৈ পৰিছে। বিজেপিৰ মতে সংসদৰ মজিয়াত ৰাহুল গান্ধীয়ে যিবোৰ অভিযোগ উত্থাপন কৰিছে সেইবোৰৰ কোনো প্ৰমাণ নাই আৰু ই এক অপৰাধমূলক কাৰ্য। এতিয়া লোকসভাৰ মজিয়াত এই প্ৰস্তাৱক লৈ চৰকাৰে কি পদক্ষেপ গ্ৰহণ কৰে সেয়া হ’ব লক্ষ্যণীয়।
