পশ্চিম এছিয়াৰ যুদ্ধই ভাৰতীয় বজাৰতো প্ৰভাৱ পেলাইছে। ডলাৰৰ বিপৰীতে টকাৰ মূল্য হ্ৰাস পাইছে। গেছৰ দাম বৃদ্ধি পাইছে। অৱশ্যে ইয়াৰ সঠিক প্ৰভাৱ পাঁচখন ৰাজ্যৰ নিৰ্বাচন শেষ হোৱাৰ পিছতহে বুজিব পৰা যাব। শনিবাৰে লোকসভাৰ বিৰোধী দলপতি ৰাহুল গান্ধীয়ে মূল্যবৃদ্ধিৰ ইংগিত দি এক্স পোষ্টত এই দাবী কৰে।
তেওঁ লিখিছে, ‘নিৰ্বাচন শেষ হ’লে পেট্ৰ’ল-ডিজেল আৰু ৰন্ধন গেছৰ দাম বৃদ্ধি হ’ব।’ পৰিস্থিতিৰ সৈতে মোকাবিলা কৰাৰ কোনো পৰিকল্পনা নথকাৰ বাবে তেওঁ কেন্দ্ৰীয় চৰকাৰক আক্ৰমণ কৰে।
যোৱা কেইদিনমানৰ পৰা ডলাৰৰ বিপৰীতে টকাৰ মূল্য তীব্ৰভাৱে হ্ৰাস পাইছে। শুকুৰবাৰে ৮৬ পইচা হ্ৰাস পাই প্ৰতি ডলাৰত ৯৩.৭৫ টকা হয়। সহজ ভাষাত ক’বলৈ গ’লে এতিয়া ১ ডলাৰৰ অৰ্থ হ’ল প্ৰায় ৯৪ টাকা, যিটো সৰ্বকালৰ সৰ্বনিম্ন। এই বিষয়টো লৈ ৰাহুলে লিখিছে, ‘টকা ডলাৰৰ বিপৰীতে ১০০ৰ দিশে আগবাঢ়িছে। বৃদ্ধি পাইছে ইন্ধনৰ দাম। এইবোৰ ভৱিষ্যতে মূল্যবৃদ্ধিৰ ইংগিত।’
টকাৰ মূল্য হ্ৰাস পোৱাৰ ফলত সমগ্ৰ অৰ্থনীতিৰ ওপৰত প্ৰভাৱ পৰিব বুলি ভাৱে ৰাহুলে। কেন্দ্ৰীয় চৰকাৰে অৱশ্যে ইয়াক ‘স্বাভাৱিক’ পৰিঘটনা বুলি অভিহিত কৰিছে। কিন্তু ৰাহুলৰ মতে, ‘সেয়া সঁচা নহয়।’ তেওঁৰ মতে চাৰিটা খণ্ডই আটাইতকৈ বেছি ক্ষতিগ্ৰস্ত হ’ব।
ৰাহুলৰ মতে, ‘প্ৰথমে উৎপাদন আৰু পৰিবহণৰ খৰচ বৃদ্ধি পাব। দ্বিতীয়তে, আটাইতকৈ ডাঙৰ লোকচান হ’ব ক্ষুদ্ৰ আৰু মজলীয়া উদ্যোগৰ। তৃতীয়তে, অত্যাৱশ্যকীয় সামগ্ৰীৰ দাম বৃদ্ধি পাব। চতুৰ্থতে, বিদেশী বিনিয়োগকাৰীয়ে বিনিয়োগ প্ৰত্যাহাৰ কৰিব, যাৰ ফলত শ্বেয়াৰ বজাৰত চাপ পৰিব।’
অতি সোনকালে এনেকুৱা হ’ব বুলি দাবী কৰি ৰাহুলে কয়, ‘এয়া মাথোঁ সময়ৰ কথা। নিৰ্বাচন শেষ হোৱাৰ লগে লগে পেট্ৰল-ডিজেল আৰু গেছৰ দাম বৃদ্ধি পাব।’ এপ্ৰিল মাহত অসম, পশ্চিম বংগ, কেৰালা, তামিলনাডু আৰু কেন্দ্ৰীয় শাসিত অঞ্চল পুডুচেৰীত বিধানসভা নিৰ্বাচন অনুষ্ঠিত হ’ব। ৰাহুলে যে সেই দিশলৈ ইংগিত দিছে সেয়া স্পষ্ট। এই পৰিস্থিতিৰ সৈতে কেনেদৰে মোকাবিলা কৰিব লাগে সেই সন্দৰ্ভত কেন্দ্ৰীয় চৰকাৰৰ কোনো পৰিকল্পনা নাই বুলিও ৰাহুলে আক্ৰমণ কৰে।
তেওঁৰ ভাষাত, ‘মোডী চৰকাৰ এইক্ষেত্ৰত কেৱল শূন্য। চৰকাৰে যি কৈছে সেয়া সত্য নহয়, আপোনাৰ হাতত যি আছে সেয়া সত্য।’ যুদ্ধ আৰম্ভ হোৱাৰ পৰাই বন্ধ হৈ আছে হৰমুজ প্ৰণালী। ফলত যোগানৰ নাটনি হৈছে। এল পি জি চিলিণ্ডাৰ আচলতে উপলব্ধ হ’বনে নাই তাত সন্দেহ আছে। বন্ধ হৈ পৰিছে কেইবাখনো হোটেল আৰু ৰেষ্টুৰেণ্ট।
অৱশ্যে সকলো স্বাভাৱিক বুলি আশ্বাস দিছে কেন্দ্ৰীয় চৰকাৰে। কিন্তু বহুতে পতিয়ন যোৱা নাই। ইয়াৰ বিপৰীতে এল পি জি ডিলাৰত ভিৰ বাঢ়িছে। প্ৰতিদিনে দীঘলীয়া শাৰী গঢ় লৈ উঠিছে। অৱশ্যে টকাৰ মূল্যৰ উঠা-নমাক লৈ কেন্দ্ৰৰ কাষত থিয় দিছে কংগ্ৰেছৰ সাংসদ শশী থাৰুৰে। তেওঁ কয়, ‘ইয়াৰ আঁৰত আন্তঃৰাষ্ট্ৰীয় কাৰণ আছে। বিষয়টো চৰকাৰৰ হাতত নাই।’
