শনিবাৰে এক সংবাদমেলত ৰাইজৰ দলৰ কাৰ্যকৰী সভাপতি ভাস্ক ডি শইকীয়াই অখিল গগৈৰ বিৰুদ্ধে ষড়যন্ত্ৰমূলক গোচৰ প্ৰত্যাহাৰৰ আহ্বান জনায়।
তেওঁ কয়,”কেৱল নাম ঠিকনা গোপনে ৰখা দুজন ৰাজসাক্ষীৰ ভিত্তিত নিয়াই গোচৰ চলাই আছে অখিল গগৈৰ বিৰুদ্ধে। ইয়াৰ বিপৰীতে হাজাৰ হাজাৰ ৰাইজে অখিল গগৈক দোষমুক্ত কৰি দিছে। এই বিপুল জনাদেশৰ পাছত অখিল গগৈৰ বিৰুদ্ধে থকা গোচৰ প্ৰত্যাহাৰ কৰাটো চৰকাৰৰ নৈতিক দায়িত্ব।‘’
এজন জনপ্ৰতিনিধি হিচাপে মুকলি আকাশৰ তলত ঘূৰি ফুৰিবলৈ তেওঁৰ অধিকাৰ আছে বুলি উল্লেখ কৰি শইকীয়াই কয় যে কা আন্দোলনৰ সময়ত প্ৰত্যেকজন অসমীয়াই সেই আন্দোলনত নামি পৰিছিল কিন্তু কেৱল অখিল গগৈ কাৰাবন্দী হৈ ৰ’ল। এই কথায়ে প্ৰমাণিত কৰে যে অখিল গগৈৰ বিৰুদ্ধে ৰুজু হোৱা গোচৰ এক অক্ৰোশমূলক ৰাজনৈতিক গোচৰ।
গতিকে জনপ্ৰতিনিধি হিচাপে নিৰ্বাচিত হোৱা অখিল গগৈৰ বিৰুদ্ধে ৰাজনৈতিক কাৰণত তৰা গোচৰ প্ৰত্যাহাৰ কৰি চৰকাৰে অখিল গগৈক কাৰামুক্ত কৰিব লাগে বুলি দাবী কৰে শইকীয়াই।
ইয়াৰ উপৰি শইকীয়াই কয়, “অখিল গগৈ শিৱসাগৰৰ বিধায়ক হোৱাৰ উপৰিও অসমৰ স্বাৰ্থত অসম বিধানসভাত মাত মাতিব লগা ১২৬ জন বিধায়কৰ মাজৰ এগৰাকী। যদি কাৰাবন্দী হৈ থাকে, তেন্তে নিশ্চিতভাৱে অসম বিধানসভাতো এগৰাকী বিধায়ক কমি থাকিব। গতিকে পঞ্চদশ অসম বিধানসভাত যাতে ১২৬ গৰাকী পূৰ্ণ বিধায়ক কাৰ্যক্ষম হৈ থাকে, সেই কথা নিশ্চিত কৰাটো চৰকাৰৰ দায়িত্বৰ ভিতৰত পৰে।‘’
