অখিল গগৈৰ মুক্তিৰ দাবী আৰু বিজেপি চৰকাৰে কৰি অহা দুৰ্নীতি, মিছা প্ৰতিশ্ৰুতি, অসম বিৰোধী কাৰ্যৰ বিৰুদ্ধে ৰাইজক সজাগ কৰিবলৈ শিৱসাগৰত আজিৰে পৰা ৰাইজৰ দলে পদযাত্ৰা কাৰ্যসূচী আৰম্ভ কৰিছে।
শিৱসাগৰ বিধান সভা সমষ্টিৰ ১৮ খন পঞ্চায়তত ১৮০ টা ৱাৰ্ডত আজিৰে পৰা ৰাইজৰ দলে ঘৰে ঘৰে গৈ এই কাৰ্যসূচী ৰূপায়ণ কৰিব।
‘‘ৰাইজৰ দলৰ চৰকাৰ হলে সাৰদা, লুইবাৰ্জাৰ, উত্তৰ কাছাৰ কেলেংকাৰীৰ মহা নায়ক হিমন্ত বিশ্ব শৰ্মা জেললৈ যাবলৈ সাজু থাকক,’’ পদযাত্ৰাৰ শুভাৰম্ভৰ মুহূৰ্তত এই মন্তব্য বেদান্ত লহকৰৰ।
শিৱসাগৰৰ টাই সংস্কৃতিক বিকাশ কেন্দ্ৰৰ পৰা আজি পুৱা ১০ বজাৰ পৰা ৰাইজৰ দলৰ এই কাৰ্যসূচী শুভাৰম্ভ কৰা হয়।
আনহাতে, ৰাইজৰ দলৰ অন্যতম আহ্বায়ক শৃংখল চলিহাই কয় শিৱসাগৰলৈ আহি নৰেন্দ্ৰ মোডী, সৰ্বানন্দ সোণোৱাল, হিমন্ত বিশ্ব শৰ্মাই যিমানেই নিৰ্বাচনী প্ৰচাৰ নচলাওক কিয়, শিৱসাগৰৰ পৰা অখিল গগৈক জিকায় পঠিয়াবলৈ শিৱসাগৰৰ সকলো জাতি-ধৰ্ম-বৰ্ণ নিৰ্বিশেষে সকলো আঞ্চলিকতাবাদী ৰাইজ বদ্ধপৰিকৰ।
আগন্তুক নিৰ্বাচনত উজনি অসমৰ পৰা বিজেপিক নিশেঃষ কৰা হ’ব বুলিও মন্তব্য কৰে শৃংখল চলিহাই।
