মহামাৰী ক’ৰ’না ভাইৰাছৰ সংক্ৰমণ প্ৰতিৰোধৰ বাবে অহা ১৪ এপ্ৰিললৈকে দেশজুৰি বলৱৎ কৰা হৈছে লকডাউন। লকডাউনৰ ফলত দেশত প্ৰথমবাৰৰ বাবে চলাচল বন্ধ হৈ পৰিছে ৰেইল সেৱা।
আশা কৰি থকা হৈছিল যে ১৪ এপ্ৰিলৰ পিছৰ পৰা দেশত পুনৰ ৰেইল চলাচল হ’ব। কিন্তু আই আৰ চি টি চিয়ে তিনিখন ট্ৰেইনৰ চিট বুকিং ৩০ এপ্ৰিললৈকে বন্ধ কৰি দিছে। আৰু ইয়ে মনত আশংকাৰ সৃষ্টি কৰিছে যে লকডাউনৰ সময়সীমা বৃদ্ধি হ’ব।
আই আৰ চি টি চিয়ে ৩০ এপ্ৰিললৈকে টিচ বুকিং বন্ধ কৰা ট্ৰেইন কেইখনৰ দুখন তেজছ আৰু এখন মহাকাল এক্সপ্ৰেছ বুলি জানিব পৰা গৈছে।
ভাৰতীয় ৰেইল কেটৰিং আৰু টুৰিজ্যিম কৰ্প’ৰেশ্যন(আই আৰ চি টি চি)ৰ প্ৰবক্তাই এই কথা জানিবলৈ দি কয় যে দেশৰ এই ভয়াবহ পৰিস্থিতিৰ প্ৰতি লক্ষ্য ৰাখি বৰ্তমান আমি এই তিনিখন ট্ৰেইনৰ বুকিং স্থগিত ৰাখিছো।
উল্লেখ্য যে ভাৰতত যোৱা মাৰ্চ মাহৰ পৰা ক’ৰ’না ভাইৰাছৰ সংক্ৰমণ দ্ৰুতগতিত বৃদ্ধি পাব ধৰাত আই আৰ চি টি চিয়ে সকলো সেৱা বন্ধ কৰি দিছিল।
ইফালে স্বাস্থ্য বিভাগে জনোৱা অনুসৰি এই পৰ্যন্ত দেশত ক’ৰ’না ভাইৰাছত আক্ৰান্তৰ সংখ্যা ৪ হাজাৰ অতিক্ৰম কৰাৰ লগতে মৃত্যু হৈছে ১১৫ জন লোকৰ।