আই পি এল মানেই কোটি টকাৰ খেল। বিশ্বৰ আটাইতকৈ চহকী ক্ৰিকেট লীগ। ব্ৰেণ্ড মূল্যৰ ক্ষেত্ৰত বিশ্বৰ সকলো ক্ৰীড়াৰ ভিতৰত তৃতীয় স্থানত। এই ব্যয়বহুল লীগত দলসমূহো ব্যয়বহুল হ’ব, সেইটোৱেই প্ৰত্যাশিত। কিন্তু সেইটো ইমানেই ব্যয়বহুল!
জানিব পৰা গৈছে যে কলম্বিয়া পেচিফিক কেপিটেল পাৰ্টনাৰ্ছে ৰাজস্থান ৰয়েলছ ক্ৰয়ৰ বাবে ১৬ হাজাৰ কোটি টকাৰ প্ৰস্তাৱ দিছিল। ৰাজস্থান ৰয়েলছৰ বৰ্তমানৰ ব’ৰ্ডে সেই প্ৰস্তাৱো ঘূৰাই দিছে। তেওঁলোকৰ মতে ফ্ৰেঞ্চাইজিৰ মূল্য আৰু বেছি হ’ব।
এই মুহূৰ্তত প্ৰায় ৬৫ শতাংশ ফ্ৰেঞ্চাইজি ইমাৰ্জিং মিডিয়া স্প’ৰ্টিং হোল্ডিংছ লিমিটেডৰ হাতত আছে। ইয়াৰ মালিক মনোজ বাদল। ইয়াৰ উপৰিও লাচলান মাৰ্ডক আৰু ৰেডবাৰ্ড কেপিটেলো অংশীদাৰ। তেওঁলোকৰ হাতত আছে ১৩ আৰু ১৫ শতাংশ শ্বেয়াৰ।
আনহাতে, চিপিচিপিৰ বাহিৰেও মুঠ চাৰিটা কোম্পানীয়ে ৰাজস্থান ৰয়েলছ ক্ৰয় কৰিবলৈ আগ্ৰহী আছিল। ইয়াৰ ভিতৰত কাল সোমানীয়ে ৰাজস্থানলৈ প্ৰায় ১.৩ বিলিয়ন ডলাৰ (ভাৰতীয় মুদ্ৰাত ১১,৯৫৬ কোটি) অফাৰ দিছিল। ইয়াক ৰাজস্থান ব’ৰ্ডে নাকচ কৰিছিল।
অৱশ্যে আটাইতকৈ ডাঙৰ অফাৰটো দিছিল কলম্বিয়া পেচিফিক কেপিটেল পাৰ্টনাৰ্ছে। কোম্পানীটোৰ এই অফাৰ মুঠ ১.৭ বিলিয়ন ডলাৰ। অৰ্থাৎ প্ৰায় ১৬ হাজাৰ কোটি টকা। কোম্পানীটোৰ মালিকীস্বত্ত আছে নিশা সচদেৱ আৰু দেৱজিৎ গুপ্তাৰ হাতত। কিন্তু ৰাজস্থানে সেই বিশাল প্ৰস্তাৱো মানি লোৱা নাই। তেওঁলোকে ভাবে যে ইয়াতকৈ বেছি দাম পোৱা যাব।
স্বাভাৱিকতে প্ৰশ্ন উত্থাপন হয়, যদি ৰাজস্থানৰ ইমান মূল্য আছে, তেন্তে আৰ চি বিৰ দৰে দল এটাৰ মূল্য কিমান হ’ব। ইতিমধ্যে আৰচিবি ক্ৰয়ৰ বাবে ২ বিলিয়ন ডলাৰ পৰ্যন্ত অফাৰ দিয়া হৈছে। ৰাজস্থানতকৈ আৰ চি বিৰ জনপ্ৰিয়তা বহু বেছি। স্বাভাৱিকতে ৰাজস্থানৰ দাম ইমান বৃদ্ধি হ’লে আৰ চি বিৰ দাম আৰু বেছি হ’বলৈ গৈ আছে৷
উল্লেখ্য যে ২০০৮ চনত আই পি এলৰ প্ৰথম সংস্কৰণৰ চেম্পিয়ন হৈছিল ৰাজস্থান ৰয়েলছ। ২০২২ চনৰ ছিজনত ফাইনেলত প্ৰৱেশ কৰিছিল। কিন্তু ফাইনেলত গুজৰাট টাইটানছৰ হাতত ৭ উইকেটত পৰাস্ত হৈ তেওঁলোকৰ সপোন ছিন্নভিন্ন হৈ পৰে। ইপিনে, নিয়মিতভাৱে আই পি এলৰ শীৰ্ষত আছে আৰ চি বি। যোৱা বছৰ তেওঁলোকে প্ৰথমবাৰৰ বাবে চেম্পিয়ন হৈছিল। ডাঙৰ কথা, বিৰাট কোহলীৰ দৰে তাৰকাই আৰচিবিৰ হৈ খেলে।
