দিল্লীৰ তিহাৰ জেলত আত্মসমৰ্পণ কৰিছে অভিনেতা ৰাজপাল যাদৱে। কিন্তু আত্মসমৰ্পণৰ পূৰ্বে ৰাজপাল যাদৱে কি বক্তব্য দিছিল জানেনে? তিহাৰ জেলৰ বিষয়াসকলক তেওঁ যি কৈছিল সেইটোৱে সকলোকে অবাক কৰি তুলিছে। তেওঁৰ এই বক্তব্যই পুনৰবাৰ চলচ্চিত্ৰ জগতৰ সম্পৰ্কক লৈ প্ৰশ্ন উত্থাপন কৰিছে আৰু ৰাজপালৰ অনুৰাগীক আৱেগিক কৰি তুলিছে।
তিহাৰ জেলৰ বিষয়াৰ ওচৰত আত্মসমৰ্পণ কৰাৰ পূৰ্বে ৰাজপালে আৱেগিক বক্তব্য আগবঢ়ায়। নিজৰ পৰিস্থিতিৰ বৰ্ণনা কৰিবলৈ গৈ কান্দোনত ভাঙি পৰি তেওঁ কয়, ‘ছাৰ, মই কি কৰিম? মোৰ হাতত টকা নাই। মই আন কোনো সমাধান দেখা নাই… ছাৰ, আমি সকলোৱে ইয়াত অকলশৰীয়া। মোৰ কোনো বন্ধু নাই। মই অকলে এই পৰিস্থিতিৰ সন্মুখীন হ’ব লাগিব।’
এই গোচৰটো ২০১০ চনৰ। ৰাজপাল যাদৱে তেওঁৰ ছবি ‘আতা পাটা লাপাতা’ৰ বাবে মুৰালী প্ৰজেক্টছ প্ৰাইভেট লিমিটেডৰ পৰা ৫ কোটি টকা ঋণ লৈছিল। বক্স অফিচত ছবিখন বিফল হোৱাৰ ফলত অভিনেতাগৰাকীয়ে আৰ্থিক সংকটত ভুগিবলগীয়া হয়। তদুপৰি বেংকত ধনৰ অভাৱত তেওঁৰ চেক বাউন্স হৈ যায়।
২০১৮ চনৰ এপ্ৰিল মাহত এখন দণ্ডাধীশৰ আদালতে ৰাজপাল যাদৱ আৰু তেওঁৰ পত্নীক নিগোশ্যিয়েবল ইনষ্ট্ৰুমেন্ট এক্টৰ ১৩৮ ধাৰাত দোষী সাব্যস্ত কৰি ছমাহৰ কাৰাদণ্ডৰ শাস্তি প্ৰদান কৰিছিল। ৰাজপাল যাদৱে এই সিদ্ধান্তক প্ৰত্যাহ্বান জনাই কেইবাখনো আবেদনৰ জৰিয়তে সময় বিচাৰিছিল। যদিও তেওঁ সময় পাইছিল, তথাপিও তেওঁৰ বাকী থকা ঋণ প্ৰায় ৯ কোটি টকালৈ বৃদ্ধি পোৱা বুলি জনা গৈছে।
সময়ৰ লগে লগে অভিনেতাগৰাকীয়ে বাকী থকা ধনৰ এটা অংশ দিছিল। কিন্তু বাৰে বাৰে পলম হোৱা আৰু আদালতৰ সময়সীমা পূৰণ নকৰাৰ বাবে আদালতে তেওঁৰ উদ্দেশ্যক লৈ প্ৰশ্ন উত্থাপন কৰে। ৰাজপাল যাদৱৰ ৰেহাইৰ আৱেদনৰ উত্তৰত আদালতে কয় যে কোনো ব্যক্তিৰ ৰাজহুৱা প্ৰফাইল নিৰ্বিশেষে বাৰে বাৰে ক্ষমা কৰিব নোৱাৰি। তাৰ পিছত আদালতে অভিনেতাজনক আৰু পলম নকৰি আত্মসমৰ্পণৰ নিৰ্দেশ দিয়াৰ পিছত আদালতৰ নিৰ্দেশ মানি ৰাজপাল যাদৱে তিহাৰ জেলত আত্মসমৰ্পণ কৰে।
