অসম বিধান সভাৰ অধ্যক্ষ হিতেন্দ্ৰনাথ গোস্বামীয়ে নাগৰিকত্ব বিধেয়কৰ বিৰুদ্ধে সংবাদ মাধ্যমত দিয়া বিবৃতি আৰু কেইজনমান বিজেপি বিধায়কৰ শেহতীয়া স্থিতিত ভীষণ ক্ষুব্ধ দলটোৰ ৰাষ্ট্ৰীয় নেতৃত্ব।
লোকসভা নিৰ্বাচনৰ প্ৰাক মুহূৰ্তত বিশেষকৈ সংবাদ মাধ্যমলৈ বিধান সভাৰ অধ্যক্ষৰ বিধেয়ক বিৰোধী পত্ৰই তীব্ৰ অস্বস্তিত পেলাইছে গেৰুৱা দলটোক। আৰু বৃহস্পতিবাৰে গুৱাহাটীত এক ৰুদ্ধদ্বাৰ বৈঠকত এই সন্দৰ্ভত দলৰ নেতালৈ কঠোৰ সাৱধানবাণী প্ৰেৰণ কৰিছে ৰাষ্ট্ৰীয় সম্পাদক ৰাম মাধৱে।
“কিবা বিষয় থাকিলে প্ৰথম দলৰ মজিয়াত উত্থাপন কৰিব লাগে। ৰাজহুৱা বিবৃতিৰে বিধান সভাৰ অধ্যক্ষ আৰু বিধায়ককেইজনে কি প্ৰমাণ কৰিব খুজিছে?” ৰাম মাধৱৰ প্ৰশ্নৰে নৰ্থ ইষ্ট নাও-ত এই উদ্ধৃতি নাম প্ৰকাশ কৰিব নোখোজা বৈঠকত উপস্থিত এজন ৰাজ্যিক বিজেপি নেতাৰ। সূত্ৰ অনুসৰি বৈঠকখনত মুখ্য মন্ত্ৰী সোণোৱাল, ৰাজ্যিক সভাপতি ৰঞ্জিত দাস, মন্ত্ৰী হিমন্ত বিশ্ব শৰ্মাৰ লগতে আন কেইবাজনো নেতা উপস্থিত আছিল।
লগতে পঢ়ক– খিলঞ্জীয়াই গ্ৰহণ কৰিব নিবিচৰা কোনো কাৰ্যৰ সমৰ্থন মোৰ বিবেকে নকৰে: অধ্যক্ষ হিতেন গোস্বামী
বিজেপি সূত্ৰ মতে বিধেয়কক লৈ “দুবাৰ ভাবিব লগা নাই” বুলি বৈঠকত স্পষ্ট কৰি দিয়ে আসন্ন নিৰ্বাচনৰ প্ৰাক মুহূৰ্তত “ক্ষতি নিৰাময়”ৰ বাবে দিল্লীৰ পৰা ঢপলিয়াই অহা নেতাজনে।
“বিধেয়কক লৈ দলৰ স্থিতি স্পষ্ট। বিধেয়কখন আইনত পৰিণত কৰি গোটেই দেশতে প্ৰয়োগ কৰিব খোজে দলে। ইয়াক লৈ দুবাৰ ভাবিব লগা নাই,” ৰাম মাধৱৰ স্পষ্টীকৰণৰ উদ্ধৃতি বিজেপি নেতাৰ।
খিলঞ্জীয়াই গ্ৰহণ কৰিব নোখোজা কোনো বিষয় বিৱেকে নামানে বুলি উল্লেখ কৰি কিছুদিন পূৰ্বে বিধেয়ক বিৰোধিতাৰ ইংগিত দিছিল বিধান সভাৰ অধ্যক্ষ গোস্বামীয়ে।
বিজেপি বিধায়ক অতুল বৰাই পূৰ্বৰে পৰা বিধেয়কৰ বিৰোধিতা কৰাৰ বিপৰীতে গোস্বামীৰ সেই বিবৃতিৰ পিছতে একেই স্থিতি ঘোষণা কৰিছিল ৰিতুপৰ্ণ বৰুৱা, পদ্ম হাজৰিকা, দেৱানন্দ হাজৰিকা আদি কেইবাজনো বিধায়কে।
