মহাকাব্য ৰামায়ণৰ আধাৰত নিৰ্মিত বিগ বাজেটৰ বলীউডী চিনেমা আদিপুৰুষ বিগত ১৬ জুনত ছবিগৃহত মুক্তি পাইছিল। ছবিখনৰ মুক্তিৰ পাছতে দেশজুৰি সৃষ্টি হৈছে তীব্ৰ বিতৰ্কৰ। আদিপুৰুষৰ সংলাপ তথা কাৰিকৰী কাৰ্যক সহজভাৱে ল’ব পৰা নাই দৰ্শকসকলে।
কেৱল হিন্দু ধৰ্মাৱলম্বী লোকসকলেই নহয়, আদিপুৰুষক লৈ অসন্তুষ্টি প্ৰকাশ কৰিছে দেশৰ ইছলাম তথা আন ধৰ্মাৱলম্বী লোকসকলেও। মূলত: ৰামায়ণৰ কাহিনী তথা চৰিত্ৰসমূহক বিকৃত ৰূপত উপস্থাপন কৰা বুলি ক্ষোভ প্ৰকাশ কৰিছে সকলোৱে।
পিছে ৰামায়ণৰ কাহিনীয়ে মন আলোড়িত কৰা দেশৰ লোকসকললৈ আহিছে এক সু-সংবাদ। অতিশীঘ্ৰেই ভাৰতীয় দৰ্শকসকলে টেলিভিচনত উপভোগ কৰিবলৈ পাব প্ৰতিগৰাকী ভাৰতীয়ৰ প্ৰিয় ৰামানন্দ সাগৰৰ ৰামায়ণ।
ৰামায়ণ বুলিলেই বছৰ বছৰ ধৰি ভাৰতীয় লোকসকলৰ মন-মগজুত প্ৰতিষ্ঠিত হৈ আছে ৰামানন্দ সাগৰে নিৰ্মাণ কৰা এই ধাৰাবাহিকখন। এতিয়া আদিপুৰুষে ভাৰতীয় দৰ্শকৰ মনত তোলা ক্ষোভৰ অন্ত পেলাবলৈ অহা ৩ জুলাইৰ পৰা পুনৰ টেলিভিচনত প্ৰচাৰিত হ’ব ৰামানন্দ সাগৰৰ ৰামায়ণ।
শ্বেমাৰু টিভিয়ে সামাজিক মাধ্যমত এক পোষ্ট যোগে এই ধাৰাবাহিকখন ৩ জুলাইৰ পৰা চেনেলটোত সম্প্ৰচাৰ আৰম্ভ কৰিব বুলি ঘোষণা কৰিছে। ৩ জুলাইৰ পৰা সন্ধিয়া ৭.৩০ বজাৰ পৰা চেনেলটোত ৰামায়ণ দৰ্শনৰ সুযোগ লাভ কৰিব দৰ্শকে।
গতিকে ভাৰতীয় দৰ্শকসকলে পুৰণি এই ৰামায়ণ উপভোগ কৰি নিজৰ মন-মগজুক শিহৰিত কৰি তোলাৰ পুনৰ এবাৰ সুযোগ লাভ কৰিব। লগতে আদিপুৰুষে নতুন প্ৰজন্মৰ মাজত ৰামায়ণৰ যি ধাৰণা দাঙি ধৰিলে, সেই ধাৰণা ৰামানন্দ সাগৰৰ ৰামায়ণে এতিয়া আঁতৰ কৰিব বুলি আশা কৰা হৈছে।
উল্লেখ্য যে, প্ৰভাস, কৃতি ছেনন, ছৈফ আলী খান অভিনীত আৰু ওম ৰাউটৰ পৰিচালনাৰে ৫০০ কোটি টকাৰ বাজেটেৰে নিৰ্মিত আদিপুৰুষৰ সংলাপ লিখিছে মনোজ মুণ্টাছিৰে। মুণ্টাছিৰে ছবিখনত হিন্দু ধৰ্মত ভগৱান জ্ঞান কৰা হনুমানৰ মুখত কিছু বিতৰ্কিত সংলাপ দিয়া বুলি অভিযোগ উঠিছে।
লগতে ছবিখনত ৰাৱণকে ধৰি অন্যান্য চৰিত্ৰসমূহৰ বেশ-ভূষা, সাজ-সজ্জা তথা ভিএফএক্স আৰু আন কাৰিকৰী কৌশলসমূহেও দৰ্শকসকলৰ মনত অসন্তুষ্টিৰ সৃষ্টি কৰিছিল। আনকি এনে কাৰণতে ৰামানন্দ সাগৰৰ ৰামায়ণত ৰামৰ চৰিত্ৰত অভিনয় কৰা অৰুণ গোভিলে আদিপুৰুষক ‘হলিউডৰ কাৰ্টুন’ বুলিও কটাক্ষ কৰিছিল।
