এটা পোহনীয়া মখনা হাতী বান্ধোনৰ পৰা মুক্ত হোৱাৰ ফলত তিনিদিন ধৰি বিশ্বনাথৰ নগৰ তথা গাঁৱত এক আতংকময় পৰিবেশে বিৰাজ কৰি আছিল। সৌভাগ্যক্ৰমে বন বিভাগৰ লোকে তিনিদিনৰ অন্তত অৱশেষত ট্ৰেংকুলাইজ কৰি নিয়ন্ত্ৰণ কৰে প্ৰকাণ্ড হাতীটো।
এই হাতীটো হৈছে চতিয়া সমষ্টিৰ বিধায়ক পদ্ম হাজৰিকাৰ ৰামু নামৰ সকলোৰে পৰিচিত এটা হাতী। তিনিদিন ধৰি হাতীটোৱে বিশ্বনাথৰ বিভিন্ন গাঁৱৰ ৰাইজৰ বাবে এক আতংকৰ কাৰণ হৈ আছিল। কাৰণ হাতীটোৱে নিজৰ মাউত অথবা কোনো লোকৰে কথা নমনা হৈ পাগলৰ দৰে আচৰণ কৰি বিশ্বনাথ নগৰৰ কাষৰ গাঁৱবোৰত ঘূৰি ফুৰিছিল।
কোনো পধ্যে বন বিভাগৰ লোকে হাতীটো নিয়ন্ত্ৰণ কৰিব পৰা নাছিল যদিও দিনে নিশাই বন বিভাগৰ লোকে হাতীটোক বিশ্বনাথৰ নগৰত প্ৰবেশ কৰাৰ পৰা বাধা প্ৰদান কৰি আছিল। কাৰণ দুৰ্গাপূজা চলি থকা সময়ত যদিহে হাতীটোৱে নগৰত প্ৰবেশ কৰে তেনেহলে নিশ্চিত ভাবে নগৰত দুৰ্গা পূজা চাবলৈ অহা লোক হাতীটোৰ আক্ৰমণৰ সন্মূখীন হৈ প্ৰাণ হেৰুৱাব লগীয়া পৰিস্থিতিৰ সৃষ্টি হ’লহেতেন।
অবশেষত আজি এই হাতীটো বন বিভাগৰ লোকে নিয়ন্ত্ৰণ কৰিবলৈ ট্ৰেংকুলাইজ কৰা মূহুৰ্ততে এইদৰে হাতীটোৱে বিশ্বনাথৰ মাজমজিয়াত থকা বৌ বজাৰৰ দিশে আগবাঢ়ি আগবাঢ়ি অহাত ৰাইজৰ মাজত আতংকৰ সৃষ্টি হয়। কোনো লোক হতাহত হোৱা নাই যদিও বহু সময় পাভৈ পথত আতংকৰ সৃষ্টি কৰি যানজঁটৰ সৃষ্টি কৰে। অবশেষত বন বিভাগৰ লোকে হাতীটো ট্ৰেংকুলাইজ কৰি হাতীটোক নিয়ন্ত্ৰণ কৰি সুৰক্ষিত স্থানত লৈ যায়। হাতীটোৰ ভাটি ধৰা বাবেহে এনে ধৰণৰ আচৰণ কৰা বুলি বন বিভাগৰ লোকে জানিব দিয়ে।