ৰংজুলি বনাঞ্চলত একাংশ বনদস্যূৰ চোৰাং কাঠৰ ব্যৱসায় আৰু সৰবৰাহৰ বিৰুদ্ধে বন বিভাগৰ ধাৰাবাহিক অভিযান চলি আছেl এনে এটা শেহতীয়া অভিযানত শুকুৰবাৰে ৰংজুলিৰ বনাঞ্চলিক বিষয়া বলেন কুঃ দাসৰ নেতৃত্বত দুটাকৈ অভিযান সম্পন্ন কৰে বন বিভাগেl
প্ৰথমটো অভিযানত অসম-মেঘালয় সীমান্তৰ আলবেলাপাৰাৰ পৰা এটা অবৈধ কাঠ ফলা মিল জব্দ কৰেl প্ৰথমটো অভিযানৰ পিছতে পুনৰ ভালুকজুলি গাঁৱত দ্বিতীয় অভিযান চলায়l ভালুকজুলি গাওঁত অন্য এটা কাঠফলা মিলৰ লগতে জব্দ কৰে বৃহৎ পৰিমাণৰ পূৰ্বতে ফালি থোৱা শাল গছৰ বাটাম আৰু তক্তাৰ লগতে উদ্ধাৰ হয় অসংখ্য শাল গছৰ কুণ্ডাl
চোৰাং কাঠখিনি বন বিভাগৰ কাৰ্যালয়লৈ আনিবলৈ দুখনকৈ ট্ৰাকৰ প্ৰয়োজন হয়l জব্দকৃত কাঠ খিনিৰ বজাৰ মূল্য দুই লাখ টকাতকৈও অধিক হব বুলি বনাঞ্চলিক বিষয়াই জানিবলৈ দিয়েl ইতিপূৰ্বে ৬০ খনতকৈয়ো অধিক কাঠ সৰবৰাহ কৰা গাড়ী, বহু অবৈধ কাঠফলা মিলৰ লগতে অসংখ্য চোৰাং কাঠ জব্দ কৰাৰ উপৰিও একাধিক চোৰাং কাঠ বেপাৰীক কৰায়ত্ব কৰা বুলি বন বিষয়াই জনাইছেl বনাঞ্চলিক বিষয়াগৰাকীয়ে জনাইছে যে চোৰাং কাঠৰ কাৰবাৰীৰ বিৰুদ্ধে আগলৈয়ো তীব্ৰতৰ অভিযান চলোৱা হ’ব।