এপ ভিত্তিক বাইক টেক্সী সেৱা আগবঢ়োৱা কোম্পানী ৰেপিড’ (Rapido)য়ে লকডাউনৰ সময়ত গুৰুত্বপূৰ্ণ ভুমিকা গ্ৰহণ কৰবৈল আগবাঢ়ি আহিছে।
কোম্পানীটোৱে ইয়াৰ বাবে বিগ বাস্কেট, বিগ বাজাৰ আৰু স্পেনছাৰ ৰিটেইলৰ দৰে অনলাইন শ্বপিং ৱেবছাইটৰ সৈতে চুক্তিত আৱদ্ধ হৈছে।
অৰ্থাৎ ৰেপিড’ বাইকৰ জৰিয়তে এতিয়া বিগ বাস্কেট, বিগ বাজাৰ আৰু স্পেনছাৰ ৰিটেইলৰ সামগ্ৰী গ্ৰাহকৰ ঘৰত ডেলিভাৰী কৰা হ’ব।
চুক্তিবদ্ধ হোৱাৰ পাছত ৰেপিড’ৰ ফালৰ পৰা কোৱা হৈছে যে গ্ৰাহকৰ প্ৰয়োজনীয় সামগ্ৰী যোগান ধৰাৰ উদ্দেশ্যেৰে কোম্পানীটোৱে বিগ বাস্কেট, বিগ বাজাৰ আৰু স্পেনছাৰ ৰিটেইলৰ সৈতে চুক্তিত আৱদ্ধ হৈছে।
ৰেপিড’ৰ ফালৰ পৰা জানিবলৈ দিয়া মতে এনেধৰণে সামগ্ৰী যোগান ধৰাৰ বিষয়কলৈ তেওঁলোকৰ আৰু আন কেইটামান কোম্পানীৰ সৈতেও কথা চলি আছে।
ৰেপিড’ই জনায় যে দেশখনৰ ৯০খন চহৰৰ গ্ৰাহকৰ চাহিদা পূৰণ কৰি সামগ্ৰীৰ যোগান ধৰিবলৈ তেওঁলোকৰ ৭০ শতাংশ বাইক চালক সাজু আছে।
উল্লেখযোগ্য যে ৰেপিড’ বাইক টেক্সী সেৱা ২০১৫চনত আৰম্ভ হৈছিল। এতিয়ালৈকে দেশৰ ৯৫খন চহৰত ইয়াৰ সেৱা চলি আছে। তদুপৰি, ৰেপিড’ বাইক সেৱা গ্ৰহণ কৰা লোকৰ সংখ্যা দ্ৰুত গতিত বৃদ্ধি পাইছে।
কম খৰচত যাত্ৰা কৰিব পৰা আৰু সহজতেই পাব পৰাৰ সুবিধাৰ বাবেই ৰেপিড’ই কম সময়ৰ ভিতৰতে সফলতা লাভ কৰিবলৈ সক্ষম হৈছে।
যোৱা ২৪ মাৰ্চৰ পৰা আৰম্ভ হোৱা ২১ দিনীয়া লকডাউনৰ বাবে প্ৰয়োজনীয় সামগ্ৰীৰ যোগান বাধাগ্ৰস্ত হৈছে। তদুপৰি, বিগ বাস্কেট, বিগ বাজাৰ আৰু স্পেনছাৰ ৰিটেইলৰ দৰে কোম্পানীসমূহৰো ব্যৱসায় ক্ষতিগ্ৰস্ত হৈছে। এতিয়া এই সোৱাৰ জৰিয়তে বহু লোকৰ সমস্যা দূৰ হ’ব বুলি আশা কৰা হৈছে।