কেমিকেল প্ৰয়োগ কৰি ধৰ্ষণকাৰীক নপুংসক কৰি দিয়া উচিত। এই মন্তব্য পাকিস্তানৰ প্ৰধানমন্ত্ৰী ইমৰাণ খানৰ।
ইমৰাণ খানৰ এই মন্তব্যৰ পিছতে তুমুল বিতৰ্কৰ সৃষ্টি হৈচে পাকিস্তানত।
আৰক্ষীয়ে কিছুদিন পূৰ্বে পাকিস্তানৰ লাহোৰৰ ৰাষ্ট্ৰীয় ঘাইপথত সন্তানৰ সন্মুখতে এগৰাকী ফৰাচী মহিলাক ধৰ্ষণ কৰা ধৰ্ষণকাৰীৰ পক্ষ লোৱা বুলি অভিযোগ উত্থাপন হোৱাৰ পিছতে পাকিস্তানৰ প্ৰধানমন্ত্ৰী ইমৰাণ খানে এই মন্তব্য কৰিছে।
পাকিস্তানৰ এটা সংবাদ প্ৰতিষ্ঠানক দিয়া সাক্ষাৎকাৰত প্ৰধানমন্ত্ৰী ইমৰাণ খানে কয়, “এই ধৰণৰ জঘন্য যৌন অপৰাধীক ফাঁচি দিয়া উচিত। কিন্তু, এই পদক্ষেপ ল’লে বিদেশী ৰাষ্ট্ৰৰ সৈতে থকা বাণিজ্যিক সম্পৰ্কত প্ৰভাৱ পৰিব। আন্তৰ্জাতিক সম্প্ৰদায়ৰ ক্ষোভৰ সন্মুখীন হ’ব লাগিব। কাৰণ, ইউৰোপীয় ইউনিয়নৰ লগতে অন্যান্য আন্তৰ্জাতিক সংঘসমূহে মৃত্যুদণ্ডৰ বিৰোধিতা কৰে।”
ইয়াৰ পিছতে পাক প্ৰধানমন্ত্ৰী গৰাকীয়ে কয়, “আমি ভাবো এই ধৰণৰ অপৰাধীবোৰক কেমিকেল প্ৰয়োগ কৰি যৌন ক্ষমতা নষ্ট কৰি দিয়া উচিত। বিশ্বৰ বহু দেশে এই শাস্তি দিয়ে বুলি মই পঢ়িবলৈ পাইছো।”
পাক প্ৰধানমন্ত্ৰী গৰাকীৰ এই মন্তব্যৰ পিছতে পাকিস্তানত দেশজুৰি তীব্ৰ প্ৰতিক্ৰিয়াৰ সৃষ্টি হৈছে।
ইমৰাণ খানৰ শাসনকালত দেশখনত নাৰী নিৰ্যাতনৰ ঘটনা ব্যাপক হাৰত বৃদ্ধি পোৱা বুলি দাবী কৰি একাংশই কৈছে যে এই ব্যৱস্থা পাকিস্তানত প্ৰচলন কৰিলে পাকিস্তানৰ বেছি ভাগ পুৰুষেই নপুংস হৈ পৰিব!
স্মৰ্তব্য যে পাকিস্তানৰ লাহোৰৰ ৰাজপথত সন্তানৰ সন্মুখতে এগৰাকী ফৰাচী মহিলা ধৰ্ষণৰ বলি হোৱাৰ পিছতে ইমৰাণ খানৰ চৰকাৰকখনে তীব্ৰ সমালোচনাৰ সন্মুখীন হৈছে।