সমগ্ৰ ৰাজ্যৰ লগতে কলিয়াবৰৰো বিভিন্ন প্ৰান্তত উদযাপন কৰা হয় শ্ৰীকৃষ্ণৰ ৰাসলীলা। কলিয়াবৰৰ বিভিন্ন প্ৰান্তত ৰাস উদযাপন কমিটি সমূহে শ্ৰীকৃষ্ণৰ ৰাসলীলা অনুষ্ঠিত কৰি জাতি-বৰ্ণৰ ভেদাভেদ নেওচি এখন শান্তিৰ সমাজ গঢ়াৰ লক্ষ্যৰে শ্ৰীকৃষ্ণৰ ৰাসলীলা অনুষ্ঠিত কৰিছে।
ইয়াৰেই চানেকি স্বৰূপে বিগত বহুবছৰ পুৰণি কলিয়াবৰৰ বৰভগীয়া হাজাৰ সমিতিয়ে এইবাৰো কলিয়াবৰৰ বৰভগীয়াস্থিত ৰংঘৰ প্ৰাংগণত দেওবাৰে এদিনীয়া কাৰ্যসূচীৰে শ্ৰীকৃষ্ণৰ ৰাসলীলা অনুষ্ঠিত কৰে।
থলুৱা আৰ্হিৰে সজোৱা সাজ সজ্জাৰে প্ৰদৰ্শিত হোৱা ৰাসলীলাত কলিয়াবৰৰ বৰভগীয়া, নামগাঁও, কঢ়াল গাঁও, দাৰীগজি , বৰালিগাঁও, পানীগাঁও ,মিছা মুখকে ধৰি কলিয়াবৰৰ বিভিন্ন লোকৰ উপস্থিতিত লোকৰণ্য হৈ পৰে ৰংঘৰৰ ৰাস উদযাপনস্থলী।
আনহাতে কলিয়াবৰৰ নামগাঁও, বৰভগীয়া, কঢ়াল গাঁৱৰ যুৱতী-মহিলা সকলোৱে মিলি ৰাসলীলাত অংশগ্ৰহণে ৰাসলীলাৰ গাম্ভীৰ্যতা আৰু অধিক টনকিয়াল কৰা পৰিলক্ষিত হল।
