প্ৰসিদ্ধ টাটা গ্ৰুপৰ স্বত্ত্বাধিকাৰ ৰতন টাটাই মুম্বাইৰ ১৮ বছৰীয়া তৰুণ অৰ্জুন দেশপাণ্ডেৰ দৰৱ বিক্ৰী কৰা কোম্পানী ‘জেনেৰিক আধাৰ’ৰ ৫০ শতাংশ অংশীদাৰিত্ব ক্ৰয় কৰিছে।
কোম্পানীটোৱে ক্ষুদ্ৰ দৰৱ বিক্ৰেতাসকলক বজাৰতকৈ কম দামত দৰৱ বিক্ৰী কৰি আহিছে।
দুবছৰ পূৰ্বে পিতৃ-মাতৃৰ পৰা ধন লৈ দেশপাণ্ডেই তেওঁৰ ব্যৱসায় আৰম্ভ কৰিছিল। টাটাই কিমান টকাৰ অংশীদাৰিত্ব ক্ৰয় কৰিছে সেয়া অৱশ্যে ৰাজহুৱা কৰা নাই।
দেশপাণ্ডেই এই চুক্তিৰ কথা সদৰী কৰিছে যদিও কিমান টকাৰ বিনিময়ত এই চুক্তি সম্পন্ন কৰা হৈছে সেয়া প্ৰকাশ কৰা নাই।
তেওঁ জানিবলৈ দিয়া মতে, বিগত তিনি-চাৰিমাহ ধৰি প্ৰখ্যাত উদ্যোগী ৰতন টাটাই তেওঁৰ প্ৰস্তাৱ সম্পৰ্কে গভীৰভাৱে বিবেচনা কৰে।
দেশপাণ্ডে জানিবলৈ দিয়ে যে দুদিন পূৰ্বেই ৰতন টাটাই জেনেৰিক আধাৰৰ ৫০ শতাংশ অংশীদাৰিত্ব ক্ৰয় কৰিছে।
এই সন্দৰ্ভত শীঘ্ৰেই আনুষ্ঠানিক ঘোষণা কৰা হ’ব বুলিও দেশপাণ্ডেই জনায়।
বাতৰি অনুসৰি, ৰতন টাটাই এই বিনিয়োগ ব্যক্তিগত পৰ্যায়ত কৰিছে আৰু ইয়াৰ সৈতে টাটা গ্ৰুপৰ কোনো সম্পৰ্ক নাই।
ইয়াৰ পূৰ্বেও ৰতন টাটাই অ’লা, পেটিএম, স্নেপডীল, কিউৰোফিট, আৰৱান লেডাৰ, লেন্সকাৰ্ট আৰু লাইবৰেটৰ দৰে কেইবাটাও ষ্টাৰ্টআপ কোম্পানীত বিনিয়োগ কৰিছিল।
দেশপাণ্ডেৰ কোম্পানী জেনেৰিক আধাৰে বছৰি ৬কোটি টকাৰ দৰৱ বিক্ৰী কৰে।
কোম্পানীটোৱে ঔষধ নিৰ্মাণকাৰীৰ পৰা পোনপটীয়াকৈ ঔষধ ক্ৰয় কৰি সেইবোৰ ক্ষুদ্ৰ দোকানীসকলক বিক্ৰী কৰে।
ইয়াৰ ফলত মাজত থকা পাইকাৰী বিক্ৰেতাৰ প্ৰায় ১৬ৰ পৰা ২০ শতাংশ ব্যয় ৰেহাই হয়।
কোম্পানীটোৰ মুম্বাই, বেংগালুৰু আৰু উৰিষ্যাৰ প্ৰায় ৩০টা খুচুৰা বিক্ৰেতা আছে।
জেনেৰিক আধাৰত ফাৰ্মাচিষ্ট, আই টি ইঞ্জিনিয়াৰ আৰু মাৰ্কেটিং প্ৰফেশ্যনলকে ধৰি ৫৫জন কৰ্মচাৰী আছে।
