আঘাতৰ বাবে দীৰ্ঘদিন ধৰি জাতীয় দলৰ বাহিৰত থকাৰ পিছত প্ৰত্যাৱৰ্তনতে উজ্বলি উঠা তাৰকা অলৰাউণ্ডাৰ ৰবীন্দ্ৰ জাদেজাই অব্যাহত ৰাখিছে চমকপ্ৰদ প্ৰদৰ্শন। অষ্ট্ৰেলিয়াৰ বিৰুদ্ধে চলিত ব’ৰ্ডাৰ-গাভাস্কাৰ ট্ৰফীৰ ইন্দোৰত আজিৰ পৰা আৰম্ভ হোৱা তৃতীয়খন টেষ্টত জাদেজাই আন এক ঈৰ্ষণীয় কৃতিত্ব অৰ্জন কৰিছে।
তাৰকা অলৰাউণ্ডাৰ গৰাকীয়ে আজি টেষ্টৰ প্ৰথম দিনা অষ্ট্ৰেলিয়ান অপেনাৰ ট্ৰেভিছ হেডৰ উইকেট দখল কৰি আন্ত:ৰাষ্ট্ৰীয় কেৰিয়াৰত ৫০০ উইকেট সম্পূৰ্ণ কৰে। ইতিপূৰ্বে ভাৰতৰ হৈ কেৰিয়াৰত ৫০০০ ৰানৰ সংখ্যাও অতিক্ৰম কৰিছে জাদেজাই।
এইদৰে তাৰকাগৰাকীয়ে আন্ত:ৰাষ্ট্ৰীয় ক্ৰিকেটত ৫০০ উইকেট আৰু ৫০০০ ৰান সংগ্ৰহ কৰা দ্বিতীয়গৰাকী ভাৰতীয় খেলুৱৈত পৰিণত হয়। জাদেজাৰ পূৰ্বে কেৱল কিংবদন্তী তাৰকা কপিল দেৱেহে এই ঈৰ্ষণীয় মাইলষ্ট’ন স্পৰ্শ কৰিছিল।
ভাৰতৰ হৈ বৰ্তমানলৈকে মুঠ ৬৩ খন টেষ্ট, ১৭১ খন এদিনীয়া আৰু ৬৪ খন টি-২০ত ভাগ জাদেজাই। টেষ্ট, এদিনীয়া আৰু টি-২০ত জাদেজাৰ সংগ্ৰহিত ৰান হৈছে ক্ৰমে ২৬২৩, ২৪৪৭ আৰু ৪৫৭ ৰান। আনহাতে টেষ্টত ২৬৩, এদিনীয়াত ১৮৯ আৰু টি-২০ত ৫১ টা উইকেট লাভ কৰিছে তাৰকাগৰাকীয়ে।
লক্ষণীয়ভাৱে, চলিত শৃংখলাৰ প্ৰথম দুখন টেষ্টত সহজ বিজয় সাব্যস্ত কৰা ঘৰুৱা দল ভাৰতৰ বিপক্ষে তৃতীয় টেষ্টৰ প্ৰথমদিনাই চালকৰ আসনত উপৱিষ্ট হৈছে অষ্ট্ৰেলিয়া। ইন্দোৰৰ টাৰ্নিং উইকেটত অষ্ট্ৰেলিয়াৰ স্পিন আক্ৰমণত দিশহাৰা হৈ পৰা ভাৰতে মাত্ৰ ১০৯ ৰানতে ইনিংছ সামৰে।
ভাৰতৰ এই বিপৰ্যয়ৰ মূলতে আছিল ভ্ৰমণকাৰী দলটোৰ বাওঁহতীয়া স্পিনাৰ মেথিউ কুহনেমেন। কেৰিয়াৰৰ সৰ্বশ্ৰেষ্ঠ প্ৰদৰ্শন দাঙি ধৰি কুহনেমেনে মাত্ৰ ১৬ ৰানতে পাঁচটা উইকেট দখল কৰি ভাৰতৰ বেটিং লাইন-আপত খহনীয়াৰ সৃষ্টি কৰে।
অভিজ্ঞ স্পিনাৰ নাথান লিয়নে ৩ টা আৰু টড মুৰ্ফীয়ে এটা উইকেট লাভ কৰে। আনহাতে অষ্ট্ৰেলিয়াই দিনটোৰ খেল সামৰণি পৰালৈকে ৪ উইকেটত ১৫৬ ৰান সংগ্ৰহ কৰিছে। হাতত ৬ টা উইকেট বাকী থকা অৱস্থাত অষ্ট্ৰেলিয়াই এইপৰ্যন্ত ৪৭ ৰানৰ অগ্ৰগতি লাভ কৰিছে।
এই মুহূৰ্তলৈকে ইন্দোৰৰ টাৰ্নিং উইকেটত ভাৰতীয় বলাৰকেইগৰাকীৰ ভিতৰত জাদেজাইহে সপলতা লাভ কৰিছে। অষ্ট্ৰেলিয়াৰ পতন ঘটা আটাইকেইটা উইকেটেই দখল কৰিছে জাদেজাই।
