লকডাউনৰ বাবে দেশৰ অৰ্থনীতিৰ মন্দা আৰম্ভ হৈছে। ইয়াৰ বাবে আৰ বি আইৰ ফালৰ পৰা কেইবাটাও গুৰুত্বপূৰ্ণ ঘোষণা কৰা হৈছে।
ৰেপ’ ৰেট কৰ্তন কৰি ঋণ আৰু ই এম আইৰ বোজা হ্ৰাস কৰাৰ চেষ্টা কৰা হৈছে। সেইদৰে বেংকত প্ৰতিমাহে ঋণ দিবলগীয়া গ্ৰাহকক ৰেহাই দিয়াৰ সংকেত দিয়া হৈছে।
প্ৰকৃততে, আৰ বি আইয়ে বেংকৰ পৰা ঋণৰ ইএম আই (কিস্তি)দি থকা লোকসকলক ৩ মাহ পৰ্যন্ত ৰেহাই দিয়াৰ পৰামৰ্শ দিছে।
সহজ ভাষাত ক’বলৈ গ’লে এতিয়া সিদ্ধান্ত বেংকৰ ওপৰত। বেংকসমূহে এতিয়া সাধাৰণ লোকক কিস্তি ৰেহাই দিবনে নাই তাৰ সিদ্ধান্ত ল’ব।
যদি বেংকসমূহে আৰ বি আইৰ পৰামৰ্শ অনুসৰণ কৰে তেতিয়াহ’লে আশা কৰা গৈছে যে অহা তিনি মাহলৈ গ্ৰাহকে ঋণৰ কিস্তি দিবলগীয়া নহয়।
কিন্তু ইয়াৰ অৰ্থ এইটো নহয় যে এই সময়ছোৱাৰ কিস্তি ৰেহাই দিয়া হ’ব।
জানিব পৰা মতে বেংকে ৩ মাহ পাৰ হৈ যোৱাৰ পাছত সেয়া আদায় কৰিব।
আৰ বি আইয়ে শুকুৰবাৰে কৰ’না ভাইৰাছৰ ত্ৰাসৰ বাবে উদ্ভৱ হোৱা বিত্তীয় জটিলতাৰ জোৰা মৰাৰ উদ্দেশ্যে কিছু সকাহ প্ৰদানৰ কথা ঘোষণা কৰে।
আৰ বি আইৰ গৱৰ্ণৰ শশীকান্ত দাসে লগতে ৰেপ’ ৰেট ৭৫ বেছিচ পইন্টত ৪.৪ শতাংশৰ পৰা কৰ্তন কৰাৰ কথা ঘোষণা কৰে ৯০ বেছিছ পইন্টৰ দ্বাৰা ৪ শতাংশলৈ হ্ৰাস কৰি কৰ’না ভাইৰাছৰ বাবে মন্দা সৃষ্টি হোৱা অৰ্থনীতিক তুলি ধৰিব বিচাৰিছে।
ইপিনে বিত্ত মন্ত্ৰী নিৰ্মলা সীতাৰমনে টুইট কৰি আৰ বি আইয়ে ঘোষণা কৰা ব্যৱস্থাসমূহক “অতি প্ৰত্যাশিত সকাহ’ বুলি মন্তব্য কৰে।
