এনেকুৱা হ’ব বুলি খবৰ ওলাইছিল আৰু সেয়াই সঁচা হৈ পৰিল। লোকসভাত সুকীয়া সংসদীয় দল বা ব্লক গঠনৰ লগত জড়িত সকলো আইনী আৰু কাৰিকৰী জটিলতাৰ পৰা হাত সাৰিবলৈ ২০ জন বিদ্ৰোহী তৃণমূল সাংসদে ‘নেশ্যনেলিষ্ট চিটিজেন পাৰ্টি অফ ইণ্ডিয়া’ত যোগদান কৰিছে।
সূত্ৰ অনুসৰি এই নতুন দলটোৰ মূল ৰাজনৈতিক কেন্দ্ৰবিন্দু হ’বলৈ গৈ আছে অসম, পশ্চিমবংগ আৰু ত্ৰিপুৰা। জানিব পৰা মতে, এন চি পি আইত যোগদান কৰিলেও বিদ্ৰোহী তৃণমূল সাংসদসকলে বিজেপি নেতৃত্বাধীন শাসকীয় এন ডি এক সমৰ্থন কৰিব।
ত্ৰিপুৰাৰ ৰাজনৈতিক মহলত ‘নেচনেলিষ্ট চিটিজেন পাৰ্টি অৱ ইণ্ডিয়া’ (এন চি পি আই) বৰ বেছি পৰিচিত নাম নহয়। আনকি ৰাজ্যৰ বহু ৰাজনৈতিক পৰ্যবেক্ষকৰ হাতত দলটোৰ সাংগঠনিক গাঁথনি বা নেতৃত্বৰ বিষয়ে স্পষ্ট তথ্য নাই।
অৱশ্যে ২০২৩ চনৰ ত্ৰিপুৰা বিধানসভা নিৰ্বাচনত দলটোৰ উপস্থিতি দেখা গৈছিল। এন চি পি আইয়ে দুটা সমষ্টিত প্ৰাৰ্থী প্ৰক্ষেপ কৰিছিল – ধলাই জিলাৰ চৌমানু আৰু উনকোটি জিলাৰ কৈলাশহৰ। কিন্তু নিৰ্বাচনী যুঁজত বিশেষ প্ৰভাৱ পেলাব পৰা নাছিল দলটোৱে। দুয়োটা সমষ্টিৰ পৰা তেওঁলোকৰ প্ৰাৰ্থীয়ে মিলি মুঠ ৮২২টা ভোট লাভ কৰে, যিটো মুঠ ভোটৰ মাত্ৰ ০.০৩ শতাংশ।
নিৰ্বাচন আয়োগৰ ৰেকৰ্ড অনুসৰি বৰ্তমান ‘নেশ্যনেলিষ্ট চিটিজেন পাৰ্টি অফ ইণ্ডিয়া’ স্বীকৃতি নোপোৱা ৰাজনৈতিক দল হিচাপে তালিকাভুক্ত হৈ আছে।
দেওবাৰে দিল্লীত এই ৰাজনৈতিক কাৰ্যকলাপে অভূতপূৰ্ব চৰ্চা লাভ কৰিলে। এই দিনটোতে ক্ষুব্ধ তৃণমূলৰ সাংসদসকলে লোকসভাৰ অধ্যক্ষ ওম বিৰলাৰ বাসগৃহলৈ যোৱাৰ পূৰ্বে কেন্দ্ৰীয় মন্ত্ৰী ভূপেন্দ্ৰ যাদৱৰ চৰকাৰী বাসগৃহলৈ যায়। কেন্দ্ৰীয় মন্ত্ৰীগৰাকীৰ বাসগৃহত অনুষ্ঠিত এই হাই-প্ৰফাইল বৈঠকত কাকলি ঘোষ দস্তিদাৰ, সুদীপ বেনাৰ্জী, শতাব্দী ৰায়, অৰূপ চক্ৰৱৰ্তী, সয়নী ঘোষ, মালা ৰায়, বাপি হালদাৰ আৰু প্ৰসুন বেনাৰ্জী উপস্থিত থাকে।
এই বৈঠকৰ আটাইতকৈ তাৎপৰ্যপূৰ্ণ আৰু আশ্চৰ্যজনক কথাটো হ’ল, কেন্দ্ৰীয় মন্ত্ৰী ভূপেন্দ্ৰ যাদৱৰ উপৰিও বিজেপিৰ প্ৰভাৱশালী লোকসভাৰ সাংসদ নিশিকান্ত ডুবেও তাত উপস্থিত আছিল। ফলত বিজেপি আৰু বিদ্ৰোহীৰ মাজত আভ্যন্তৰীণ বুজাবুজি চূড়ান্ত পৰ্যায়ত উপনীত হৈছিল বুলি কোৱা বাহুল্য মাথোঁ।
ৰাজ্যৰ বিধানসভা নিৰ্বাচনত দুৰ্যোগৰ পিছৰে পৰা তৃণমূলৰ ভিতৰত যি তীব্ৰ অসন্তুষ্টি গঢ় লৈ উঠিছিল, দেওবাৰৰ এই ঘটনাই তাক বিস্ফোৰণৰ মুখত থিয় কৰালে। যোৱা কেইদিনমানত এজনৰ পিছত আনজন সাংসদে মুকলিকৈ দলৰ নেতৃত্বৰ বিৰুদ্ধে ক্ষোভ প্ৰকাশ কৰিছে। বংগৰ সাম্প্ৰতিক ৰাজনৈতিক আৰু আইন-শৃংখলা পৰিস্থিতিক লৈ গভীৰ উদ্বেগ প্ৰকাশ কৰি তেওঁলোকে দিল্লীত মোডী চৰকাৰকো সমৰ্থন কৰাৰ সিদ্ধান্ত লৈছে।
ইয়াৰ পূৰ্বে কাকলি ঘোষ দস্তিদাৰৰ নেতৃত্বত গঠিত এই শিবিৰটোৱে অধ্যক্ষলৈ পত্ৰ লিখি লোকসভাত পৃথক সংসদীয় গোট হিচাপে স্বীকৃতি দিয়াৰ দাবী জনাইছিল। শুকুৰবাৰে তৃণমূলৰ ১৯জন সাংসদৰ স্বাক্ষৰিত এখন গোপন নথি পোহৰলৈ অহাত লোকসভাৰ তৃণমূল শিবিৰত বৃহৎ বিভাজনৰ জল্পনা-কল্পনা বাস্তৱায়িত হৈ পৰে।
দেওবাৰে পুৱা কাকলি ঘোষ দস্তিদাৰে বিমানবন্দৰত দাবী কৰিছিল যে তেওঁলোকৰ শিবিৰত আৰু দুজন সাংসদে যোগদান কৰিছে, যাৰ ফলত লোকসভাত মুঠ বিদ্ৰোহীৰ সংখ্যা ২২ জনলৈ বৃদ্ধি পাইছে।কিন্তু কোন দুজন নতুনকৈ আগবাঢ়ি আহিছে সেয়া স্পষ্ট নকৰিলে বিদ্ৰোহী সাংসদগৰাকীয়ে।
