কংগ্ৰেছ শাসিত তেলেংগানাত এখন বিদ্যালয় নিৰ্মাণৰ বাবে ৮০০ বছৰ পুৰণি এটা ঐতিহাসিক শিৱ মন্দিৰ বুলডজাৰেৰে ভাঙি পেলোৱাক কেন্দ্ৰ কৰি বৰ্তমান তীব্ৰ বিতৰ্কৰ সৃষ্টি হৈছে। ৱাৰাংগল জিলাত কাকতীয়া বংশৰ শাসনকালৰ এই প্ৰাচীন মন্দিৰটো ধ্বংস কৰাক লৈ ৰেৱন্ত ৰেড্ডী চৰকাৰৰ বিৰুদ্ধে সৰৱ হৈ পৰিছে বিজেপি। এই ঘটনাক লৈ কেন্দ্ৰীয় সংস্কৃতি মন্ত্ৰালয়েও ৰাজ্য চৰকাৰৰ পৰা উত্তৰ বিচাৰিছে।
জানিব পৰা মতে, ৱাৰাংগল জিলাৰ খানাপুৰ মণ্ডলৰ অশোক নগৰত এই ঐতিহাসিক মন্দিৰটো অৱস্থিত আছিল। এখন চৰকাৰী অনুমোদিত বিদ্যালয় নিৰ্মাণৰ বাবে মাটি খালি কৰাৰ নামত মন্দিৰটো বুলডজাৰেৰে ভাঙি পেলোৱা বুলি অভিযোগ উত্থাপন হৈছে। ঐতিহাসিক তথ্য অনুসৰি ত্ৰয়োদশ শতিকাত কাকতীয়া শাসক গণপতিদেৱৰ শাসনকালত এই মন্দিৰটো নিৰ্মাণ কৰা হৈছিল। এই স্থানত ১২৩১ খ্ৰীষ্টাব্দৰ ফেব্ৰুৱাৰী মাহৰ সাত শাৰীৰ এখন তেলেগু শিলালিপিও পোৱা গৈছিল, য’ত ৰজাক মহাৰাজা আৰু ৰাজাধিৰাজুলু বুলি সম্বোধন কৰা হৈছিল।
এনে এক ঐতিহাসিক স্থাপত্য ধ্বংস কৰাৰ বিৰুদ্ধে তেলেংগানাৰ মানৱাধিকাৰ অধিবক্তা ৰমা ৰাও ইম্মানে নিয়ে ৰাষ্ট্ৰীয় স্মৃতিস্তম্ভ কৰ্তৃপক্ষৰ ওচৰত অভিযোগ দাখিল কৰিছে। ইয়াৰ উপৰিও কেন্দ্ৰীয় সংস্কৃতি মন্ত্ৰালয় আৰু প্ৰত্নতত্ত্ব বিভাগতো এই সন্দৰ্ভত গোচৰ ৰুজু কৰা হৈছে। প্ৰত্নতত্ত্ব বিভাগৰ অনুমতি অবিহনে কেনেকৈ এই মন্দিৰটো ভাঙিবলৈ দিয়া হ’ল, তাক লৈ এতিয়া প্ৰশ্ন উঠিছে। সমান্তৰালভাৱে ৰাজ্য চৰকাৰৰ হেৰিটেজ কমিটিও এই ঐতিহাসিক সম্পদটো সুৰক্ষিত কৰি ৰখাত ব্যৰ্থ হোৱা বুলি গুৰুতৰ অভিযোগ উত্থাপন হৈছে।
