দিল্লীৰ লালকিল্লাৰ সমীপত ২০২৫ চনৰ ১০ নৱেম্বৰত সংঘটিত ভয়ংকৰ গাড়ী বিস্ফোৰণৰ মূল পৰিকল্পনাকাৰী তথা ‘অপাৰেচনেল ইন-চাৰ্জ’ আছিল উমৰ উন নবী। ৰাষ্ট্ৰীয় অনুসন্ধান সংস্থাই দাখিল কৰা শেহতীয়া অভিযোগনামাত এই বিস্ফোৰণৰ আঁৰৰ বহুতো ভয়ংকৰ তথ্য পোহৰলৈ আহিছে।
এনআইএৰ তথ্য অনুসৰি, আনছাৰ গাজৱাত-উল-হিন্দ নামৰ সন্ত্ৰাসবাদী সংগঠনটোৰ পুনৰুত্থানৰ আঁৰতো নবীৰেই হাত আছিল। ফৰিদাবাদৰ আল-ফালাহ বিশ্ববিদ্যালয়ৰ চিকিৎসক উমৰ উন নবী আৰু তেওঁৰ সহযোগী জাচিৰ বিলাল ৱানীয়ে এই আক্ৰমণৰ বাবে এখন পুৰণি হুন্দাই আই-২০ গাড়ী ক্ৰয় কৰিছিল। এই গাড়ীখনক তেওঁলোকে ‘ভেহিকল-বৰ্ণ ইম্প্ৰভাইজড এক্সপ্ল’চিভ ডিভাইচ’ অৰ্থাৎ চলন্ত বোমালৈ ৰূপান্তৰিত কৰিছিল।
সন্ধিয়া প্ৰায় ৬:৫০ বজাত সংঘটিত এই বিস্ফোৰণত ১১ জন লোক নিহত হোৱাৰ লগতে ২৯ জন গুৰুতৰভাৱে আহত হৈছিল। বিস্ফোৰণৰ সময়ত নবী গাড়ীখনৰ ভিতৰতেই আছিল আৰু পাছত ডিএনএ পৰীক্ষাৰ জৰিয়তে তেওঁৰ পৰিচয় নিশ্চিত কৰা হৈছে। ফৰেনছিক অনুসন্ধানত গাড়ীখনত টিএটিপি আৰু এম’নিয়াম নাইট্ৰেটৰ দৰে ভয়ংকৰ বিস্ফোৰকৰ অৱশিষ্ট উদ্ধাৰ কৰা হৈছে। এই বোমাটো গাড়ীৰ ভিতৰৰ পৰাই এক কমাণ্ড মেকানিজমৰ জৰিয়তে সক্ৰিয় কৰা হৈছিল।
চাৰ্জশ্বীটত উল্লেখ কৰা মতে, সহ-ষড়যন্ত্ৰকাৰী জাচিৰ বিলাল ৱানীয়ে ইউটিউব আৰু চেটজিপিটি ব্যৱহাৰ কৰি ৰকেট নিৰ্মাণৰ কৌশল বিচাৰিছিল। আনকি নবীৰ পৰা ৱানীয়ে দুখন ড্ৰোণো লাভ কৰিছিল।
২০২২ চনৰ আৰম্ভণিৰ পৰাই ‘পিণ্ডা’ বা ‘ৰাহুল ভাট’ নামেৰেও পৰিচিত নবীয় এই নিষ্ক্ৰিয় হৈ থকা সন্ত্ৰাসবাদী গোটটোক পুনৰ সক্ৰিয় কৰিবলৈ চেষ্টা চলাই আহিছিল। নতুন সদস্যক কট্টৰপন্থী কৰি তোলা, ‘চিগনেল’ৰ দৰে এনক্ৰিপ্টেড এপৰ জৰিয়তে গোপন বৈঠক অনুষ্ঠিত কৰা, ধন সংগ্ৰহ, অবৈধ অস্ত্ৰ-শস্ত্ৰ সৰবৰাহ আৰু সন্ত্ৰাসবাদী কাৰ্যকলাপৰ বাবে প্ৰশিক্ষণ প্ৰদান কৰাত তেওঁ মুখ্য ভূমিকা পালন কৰিছিল। জম্মু-কাশ্মীৰ আৰু দিল্লী-এনচিআৰত এই গোটটোৰ কেইবাখনো গোপন বৈঠক অনুষ্ঠিত হৈছিল।
উক্ত বিস্ফোৰণত নবী নিহত হোৱাৰ ফলত তেওঁৰ বিৰুদ্ধে আইনী প্ৰক্ৰিয়া বাতিল কৰা হৈছে যদিও, সমগ্ৰ ষড়যন্ত্ৰটোত তেওঁৰ ভূমিকাৰ কথা চাৰ্জশ্বীটখনত স্পষ্টকৈ উল্লেখ কৰা হৈছে। এই অভিযোগনামা বৰ্তমান ন্যায়িক পৰীক্ষণ আৰু বিচাৰপ্ৰক্ৰিয়াৰ অধীনত আছে।
