এয়াৰটেল, ভোডাফোন-আইডিয়াৰ পাছত এইবাৰ জিঅ’ইয়ো ইয়াৰ প্ৰিপেইড গ্ৰাহকৰ প্লেনৰ ম্যাদ ৩মে’ পৰ্যন্ত বৃদ্ধি কৰিছে। ম্যাদ বৃদ্ধিৰ লগে লগে জিঅ’ৰ বৰ্তমান গ্ৰাহকে পুৰণি প্লেনৰ ম্যাদ সমাপ্ত হোৱাৰ পাছতো ইনকামিং কলৰ সুবিধা লাভ কৰি থাকিব।
জিঅ’ই জাৰি কৰা এক বিবৃতিত কোৱা হৈছে যে ইয়াৰ দ্বাৰা কেবল নিম্ন আয়ৰ গ্ৰাহকৰে যে লাভ হ’ব এনে নহয়, লগতে যিকোনো কাৰমত নিজৰ একাউন্ট ৰিচাৰ্ছ কৰিবলৈ সক্ষম নোহোৱা গ্ৰাহকসকলেও ইয়াৰ সুবিধা পাব।
তদুপৰি, কোম্পানীটোৱে জানিবলৈ দিয়ে যে ২০ এপ্ৰিলৰ পৰা ইয়াৰ অধিকাংশ খুচুৰা বিক্ৰী কেন্দ্ৰ খুলিবলৈ আৰম্ভ কৰিব। চৰকাৰে জাৰি কৰা নতুন নিৰ্দেশনাৰ পাছত এই সিদ্ধান্ত লোৱা হৈছে।
ইয়াৰ পূৰ্বে ভোডাফোন –আইডিয়ায়ো লকডাউনৰ বাবে মোবাইল ৰিচাৰ্জ কৰিবলৈ সক্ষম নোহোৱা তেওঁলোকৰ গ্ৰাহকৰ বাবে প্লেনৰ ম্যাদ বৃদ্ধিৰ কথা ঘোষণা কৰিছিল।
সেইদৰে ভাৰতী এয়াৰটেলেও তেওঁলোকৰ প্ৰায় ৩কোটি গ্ৰাহকৰ প্লেনৰ ম্যাদ ৩ মে’লৈ বৃদ্ধি কৰাৰ সিদ্ধান্ত লৈছিল।
উল্লেখযোগ্য যে টেলিকম কোম্পানীসমূহে ইয়াৰ গ্ৰাহকসকলক ৰিচাৰ্জ কৰাৰ বাবে বিভিন্ন বিকল্প উপায় আগবঢ়াইছে। ডিজিটেল প্লেটফৰ্মৰ জৰিয়তে ৰিচাৰ্জৰ সুবিধাও গ্ৰাহকসকলে লাভ কৰিছে যদিও লকডাউনৰ বাবে বিভিন্ন কাৰণত বহু গ্ৰাহকে ৰিচাৰ্জ কৰিব পৰা নাই।
