আমেৰিকাই ভাৰতৰ ওপৰত ২৫ শতাংশ শুল্ক আৰোপ কৰিছে। শুল্ক গাঁথনি কাৰ্যকৰী হ’লে কৃষি খণ্ডত কৰ্পোৰেটাইজেছন হোৱাটো নিশ্চিত। ইতিমধ্যে নিখিল ভাৰত কৃষক সভাই ইয়াৰ বিৰুদ্ধে তীব্ৰ প্ৰতিবাদ জনাইছে।
এইবাৰ এক প্ৰতিবেদনত উন্মোচিত হৈছে আন এখন ছবি। তাত দাবী কৰা হৈছে যে যদিহে ছেপ্টেম্বৰৰ পাছতো এই শুল্ক আৰোপ কৰাই থাকে, তেন্তে দেশৰ জিডিপ বৃদ্ধিৰ হাৰ ৬.২ শতাংশৰ তললৈ নামি যাব। এই দাবী এছ এণ্ড পি মাৰ্কেট ইনটেলিজেন্সৰ প্ৰতিবেদনৰ।
সংস্থাটোৱে দাবী কৰিছে যে জুলাই মাহত ভাৰতৰ জিডিপি বৃদ্ধিৰ হাৰ আছিল ৬.২ শতাংশ। ২০২৪-২৫ বিত্তীয় বৰ্ষত ৬.৫ শতাংশ আছিল। আমেৰিকাই আৰোপ কৰা ২৫ শতাংশ শুল্ক যদি কাৰ্যকৰী কৰা হয় তেন্তে এই পূৰ্বাভাসটো হ্ৰাস পোৱাৰ সম্ভাৱনা আছে। যদিহে ছেপ্টেম্বৰৰ পিছতো সেয়া আৰোপ হৈ থাকে।
একে সময়তে প্ৰতিবেদনত দাবী কৰা হৈছে যে ভাৰতে কৃষি, দুগ্ধ আৰু অন্যান্য খাদ্য উৎপাদন খণ্ড কোনো ধৰণে আমেৰিকাক গতাই নিদিয়ে। কাৰণ তেনে ক্ষেত্ৰত দেশৰ কৃষকৰ ক্ষতি হ’ব। ফলত আমেৰিকাইও ২৫ শতাংশ শুল্ক আৰোপ কৰাৰ সিদ্ধান্তৰ পৰা পিছুৱাই যোৱাৰ কোনো সম্ভাৱনা নাই।
বিভিন্ন জটিলতাৰ বাবে ভাৰতে এতিয়াও আমেৰিকাৰ সৈতে বাণিজ্যিক চুক্তি স্বাক্ষৰ কৰা নাই। ইয়াৰ বিপৰীতে আমেৰিকাৰ ৰাষ্ট্ৰপতি ড’নাল্ড ট্ৰাম্পে স্পষ্টকৈ কৈছে যে ভাৰতে ৰাছিয়াৰ পৰা বহু তেল আৰু অস্ত্ৰ-শস্ত্ৰ ক্ৰয় কৰে। সেইবাবেই ভাৰতৰ ওপৰত ২৫ শতাংশ শুল্ক আৰোপ কৰা হৈছে।
প্ৰসংগক্ৰমে চলিত বৰ্ষৰ আৰম্ভণিতে আমেৰিকা ভ্ৰমণৰ সময়ত প্ৰধানমন্ত্ৰী নৰেন্দ্ৰ মোদীয়ে ট্ৰাম্পৰ সৈতে হোৱা বৈঠকৰ সময়ত ঘোষণা কৰিছিল যে ভাৰতে ৱাশ্বিংটনৰ পৰা পূৰ্বতকৈ অধিক তেল আৰু গেছ ক্ৰয় কৰিব। আচলতে ভূৰখা মহলৰ একাংশই ধাৰণা কৰে যে মোডীৰ এই আশ্বাসৰ লক্ষ্য আছিল শুল্ক হ্ৰাস কৰা। কিন্তু তাৰপিছতো ভাৰতৰ মূল তেল আমদানিকাৰক হৈছে ‘দীর্ঘদিনীয়া বন্ধু’ ৰাছিয়া৷ এই কথাই আমেৰিকাক ক্ষুব্ধ কৰি তুলিছে। আৰু সেইবাবেই তেওঁলোকে ২৫ শতাংশ শুল্ক আৰোপ কৰিছে।
সদ্যহতে সেই আলোচনাই এই দেশৰ কূটনৈতিক মহলত আটাইতকৈ বেছি চৰ্চিত বিষয়। ইয়াৰ মাজতে প্ৰকাশ পাইছে শেহতীয়া এই প্ৰতিবেদন।
