বাংলাদেশত পিঁয়াজৰ মূল্য প্ৰতি কিলোত প্ৰায় ১০০ টকা হৈছেগৈ। কিন্তু মহম্মদ ইউনুছৰ নেতৃত্বৰ অন্তৱৰ্তীকালীন চৰকাৰখনে হঠাতে ভাৰতৰ পৰা আধা দামত পিয়াঁজ আমদানি কৰাত নিষেধাজ্ঞা লগালে। আৰু এই সিদ্ধান্তই সীমান্তত নীৰৱ দুৰ্যোগৰ সৃষ্টি কৰিছে – মাহদিপুৰৰ পৰা হিলীলৈকে প্ৰায় ৩০ হাজাৰ টন পিঁয়াজ গুদাম, লৰীত পৰি থাকি নষ্ট আছে।
অৰ্থনীতিৰ নোবেল বঁটা বিজয়ী ইউনুছে কাৰ্যভাৰ গ্ৰহণ কৰাৰ পিছৰে পৰা ভাৰত বিৰোধী মনোভাৱ দেখুৱাইছে বুলি ইতিমধ্যে ৰাজনৈতিক মহলত অভিযোগ উত্থাপন হৈছে। এইবাৰ সেই অভিযোগ আৰু অধিক শক্তিশালী। কাৰণ বাংলাদেশত পিঁয়াজৰ আকাশলংঘী মূল্যৰ পাছতো ভাৰতীয় পিঁয়াজ আমদানিত প্ৰত্যক্ষ নিষেধাজ্ঞা আৰোপ কৰা হৈছে। ফলত কেৱল বাংলাদেশী ক্ৰেতাসকলেই ক্ষতিগ্ৰস্ত হোৱা নাই, ভাৰতীয় ব্যৱসায়ীসকলো বিপদত পৰিছে।
বাংলাদেশী ব্যৱসায়ীৰ পৰা নিশ্চিত বাৰ্তা লাভ কৰাৰ পিছত ভাৰতীয় ৰপ্তানিকাৰীসকলে আগতীয়াকৈ নাচিকৰ পৰা পিঁয়াজ কিনি সীমান্তত মজুত কৰি ৰাখিছিল। কিন্তু হঠাৎ নিষেধাজ্ঞাৰ বাবে সেই সকলোবোৰ পিঁয়াজ এতিয়া গুদামত পচিবলৈ আৰম্ভ কৰিছে। মাহদিপুৰ, হিলী, সোনা মছজিদ— আটাইকেইটা সীমাতে ছবিখন একে।
যোৱা ১৬ নৱেম্বৰত বাংলাদেশৰ সোনা মছজিদ আমদানি-ৰপ্তানি গোটে এক বিবৃতিত কয় যে কিছুদিনৰ পৰা কৃষি সম্প্ৰসাৰণ বিভাগে ভাৰতীয় পিঁয়াজৰ আমদানি অনুমতি (আই পি) নিয়ন্ত্ৰণ কৰি আহিছে। প্ৰথমে কিছুমান আমদানিকাৰকক ৫০ টন দিয়া হৈছিল, আৰু পিছলৈ আন কিছুমানক ৩০ টন আই পি দিয়া হৈছিল। কিন্তু হঠাৎ ইউনুছ প্ৰশাসনে সমগ্ৰ প্ৰক্ৰিয়াটো বন্ধ কৰি দিলে। তেওঁলোকৰ স্পষ্ট দাবী যে দেশৰ কৃষকৰ স্বাৰ্থ ৰক্ষা কৰাই হেনো উদ্দেশ্য।
অৱশ্যে ৰপ্তানিকাৰীসকলৰ কাহিনী বেলেগ। বছৰৰ এই সময়ত বাংলাদেশত পিঁয়াজৰ চাহিদা সদায় বেছি। প্ৰতিদিনে সেই দেশলৈ ৩০-৩৫ খন লৰী পিঁয়াজ যায়। ফলত ব্যৱসায়ীসকলে আগতীয়াকৈ সামগ্ৰীবিধ মজুত কৰি ৰাখিছিল। ঢাকাৰ মহলৰ পৰা জনা গৈছে যে এইবাৰ বাংলাদেশত উৎপাদন অধিক হৈছে। সেয়ে ভাৰতীয় পিঁয়াজৰ চাহিদা হ্ৰাস কৰিছে চৰকাৰে।
মাহদিপুৰৰ এজন ৰপ্তানিকাৰীয়ে ক্ষোভ প্ৰকাশ কৰি কয়, “আমি অৰ্ডাৰ পাই নাচিকৰ পৰা পিঁয়াজ লৈ আহিলোঁ। হঠাৎ নিষেধাজ্ঞা আহিল! আমি বন্দৰৰ ওচৰৰ গুদাম এটাত মজুত কৰিব লগা হ’ল। এতিয়া পচি গৈছে। আমি কেজিত ছয় টকাত বিক্ৰী কৰিবলৈ বাধ্য হৈছো। মই চাৰি ল’ৰী পিঁয়াজ আনিলোঁ—বৃহৎ লোকচান হৈছে।”
বাংলাদেশৰ এজন আমদানিকাৰীয়েও হতাশ হৈ কৈছে, “আমি ভাৰতীয় পিয়াঁজ কিনিবলৈ সাজু। কিন্তু চৰকাৰৰ নিৰ্দেশত আমি কৰিব নোৱাৰো। ক্লিয়াৰেন্স চাৰ্টিফিকেট দিলে তৎক্ষণাত আমদানি আৰম্ভ কৰিম।”
সীমান্তৰ এই ছবিখনে ক্ষোভ, উদ্বিগ্নতা আৰু ব্যৱস্থাহীনতাৰ ইংগিত দিয়ে। ইউনুছ প্ৰশাসনৰ এই অস্থিৰ সিদ্ধান্তত দুয়োখন দেশৰ ক্ষতি বাঢ়িছে, আৰু ঢাকাৰ এই সিদ্ধান্তই ঢাকা-দিল্লীৰ সম্পৰ্কত অধিক অৱনতি ঘটাব বুলি ধাৰণা কৰা হৈছে।
