বজাৰত মুকলি হ’বলৈ ওলাইছে নতুন ১০০ আৰু ২০০ টকীয়া নোট। এই নতুন নোট প্ৰৱৰ্তনৰ কাৰণ হ’ল ভাৰতীয় ৰিজাৰ্ভ বেংকে এক ডাঙৰ পৰিৱৰ্তনৰ কথা ভাবিছে। কি সেই পৰিৱৰ্তন ?
সকলোৱে জানে যে ৰিজাৰ্ভ বেংকৰ গৱৰ্ণৰ সলনি কৰা হৈছে। বৰ্তমান বজাৰত প্ৰচলিত ১০০ বা ২০০ টকীয়া আটাইকেইখন নোটত প্ৰাক্তন গৱৰ্ণৰৰ স্বাক্ষৰ আছে। সেয়ে আৰ বি আইয়ে সেইবোৰ সলনি কৰাৰ উদ্যোগ লৈছে।
এতিয়াৰে পৰা নতুন ১০০ আৰু ২০০ টকীয়া নোটত গৱৰ্ণৰৰ স্বাক্ষৰ সলনি হ’ব। এতিয়ালৈকে পূৰ্বৰ গৱৰ্ণৰ শক্তিকান্ত দাসৰ স্বাক্ষৰ আছিল। এইবাৰ ১০০ আৰু ২০০ টকীয়া নোটত আৰ বি আইৰ নতুন গৱৰ্ণৰ সঞ্জয় মালহোত্ৰাৰ স্বাক্ষৰ থাকিব।
অৱশ্যে শক্তিকান্ত দাসৰ স্বাক্ষৰ থকা নোটবোৰ বাতিল নহয়। আৰ বি আইয়ে স্পষ্ট কৰি দিছে যে পুৰণি ১০০ আৰু ২০০ টকীয়া নোটৰ বিমুদ্ৰাকৰণ নহয়।
মন কৰিবলগীয়া যে ২০১৬ চনত বিমুদ্ৰাকৰণৰ সময়ত ৫০০ আৰু ১০০০ টকীয়া নোট প্ৰত্যাহাৰ কৰা হৈছিল। সেই সময়তে ১০০ আৰু ২০০ টকীয়া নোটৰ নতুন নোটৰ প্ৰচলন হ’ল।
২০১৮ চনৰ ১২ ডিচেম্বৰত শক্তিকান্ত দাসে ভাৰতীয় ৰিজাৰ্ভ বেংকৰ ২৫ সংখ্যক গৱৰ্ণৰ হিচাপে দায়িত্ব গ্ৰহণ কৰে। তাৰ পিছত তেওঁ একেৰাহে ছবছৰ ধৰি দেশৰ কেন্দ্ৰীয় বেংকটোৰ দায়িত্ব পালন কৰিছিল। ২০২১ চনত তেওঁৰ কাৰ্যকাল আৰু তিনি বছৰৰ বাবে বৃদ্ধি কৰা হয়। অৰ্থনৈতিক খণ্ডৰ বিভিন্ন সংকটৰ সৈতে মোকাবিলা কৰাত, বিশেষকৈ ক’ৰ’না মহামাৰীৰ অৰ্থনৈতিক প্ৰভাৱৰ সৈতে মোকাবিলা কৰাত তেওঁৰ ভূমিকা উল্লেখযোগ্য আছিল। ভাৰতীয় ৰিজাৰ্ভ বেংকৰ গৱৰ্ণৰ হিচাপে তেওঁৰ কাৰ্যকাল যোৱা ডিচেম্বৰ মাহত সমাপ্ত হৈছিল। তেতিয়া সঞ্জয় মালহোত্ৰাক সেই পদত নিয়োগ কৰা হৈছিল।
