গোলাঘাটৰ শ্বহীদ কুশল কোঁৱৰ অসামৰিক চিকিৎসালয়ত আজি ক’ভিড সম্পৰ্কীয় পৰ্যালোচনা বৈঠক অনুষ্ঠিত হয়।
অসম চৰকাৰৰ কৃষি মন্ত্ৰী অতুল বৰাৰ সৈতে গোলাঘাট জিলা প্ৰশাসন আৰু স্বাস্থ্য বিষয়াৰ লগত অনুষ্ঠিত হোৱা বৈঠকত বিভিন্ন অভাৱ অভিযোগ সন্দৰ্ভত পৰ্যালোচনা কৰে।
সংবাদ মাধ্যমৰে হোৱা সাক্ষাৎকালত মন্ত্ৰীজনে ভুক্তভোগীৰ অভিযোগ অনুসৰি অক্সিজেন চিলিণ্ডাৰ নোপোৱা আৰু ক’ভিড ৰোগীয়ে উপযুক্ত চিকিৎসা নোপোৱাৰ বিষয়ত চিকিৎসালয় কৰ্তৃপক্ষৰ পৰা জানিব বিচৰাৰ লগতে এইসময়ত গোলাঘাটত অক্সিজেন মজুত আছে বুলি ব্যক্ত কৰে।
এনে সময়ত ক্ষীপ্ৰগতিত বাঢ়ি অহা ক’ভিডৰ দ্বিতীয় ঢৌক প্ৰতিহত কৰিবৰ বাবে মন্ত্ৰীগৰাকীয়ে ৰাইজৰ সহযোগিতা বিচাৰে।
এইপৰ্যন্ত সমগ্ৰ জিলাখনত ক’ভিডৰ মহা সংক্ৰমণৰ ফলত ১৯ গৰাকীকৈ লোক মৃত্যুমুখত পৰাৰ লগতে দুই সহস্ৰাধিক লোক এই ৰোগত আক্ৰান্ত হৈছে।
এই লৈ অনুষ্ঠিত হোৱা বৈঠকত চাহ বাগিছা অঞ্চলত ক’ভিডৰ সংক্ৰমণ ঘটাৰ ফলত চিন্তনীয় বিষয় হিচাপে বিবেচিত কৰি ব্যৱস্থা লোৱাৰ বাবে জিলা প্ৰশাসনক মন্ত্ৰী অতুল বৰাই নিৰ্দেশ দিয়ে।
বৈঠকখনিত খুমটাই সমষ্টিৰ বিধায়ক মৃণাল শইকীয়া, সৰুপথাৰ সমষ্টিৰ বিধায়ক বিশ্বজিৎ ফুকন, জিলা উপায়ুক্ত বিভাষ চন্দ্ৰ মোদীকে ধৰি ভালেসংখ্যক বিষয়া-কৰ্মচাৰীয়ে অংশ লয়।
