পশ্চিমবংগৰ আৰ জি কৰ চিকিৎসা মহাবিদ্যালয় আৰু চিকিৎসালয়ত জঘন্য ধৰ্ষণ আৰু হত্যাৰ বলি হোৱা কনিষ্ঠ চিকিৎসকগৰাকীৰ মাতৃয়ে আগন্তুক বিধানসভা নিৰ্বাচনত ভাৰতীয় জনতা পাৰ্টিৰ প্ৰাৰ্থী হিচাপে অৱতীৰ্ণ হোৱাৰ সিদ্ধান্ত গ্ৰহণ কৰিছে। বৃহস্পতিবাৰে সংবাদ মাধ্যমৰ আগত তেওঁ পানীহাটি সমষ্টিৰ পৰা নিৰ্বাচন খেলিবলৈ সন্মতি প্ৰকাশ কৰা বুলি জানিবলৈ দিয়ে। কন্যাৰ ন্যায় প্ৰদান কৰিবলৈ কেৱল বিজেপিয়েই সক্ষম বুলি উল্লেখ কৰি তেওঁ ৰাজ্যখনত মহিলাৰ সুৰক্ষা নিশ্চিত কৰিবলৈ তৃণমূল কংগ্ৰেছ চৰকাৰক উৎখাত কৰাৰ সংকল্প লৈছে।
যদিও ৰাজ্যিক বিজেপিয়ে এই পৰ্যন্ত আনুষ্ঠানিকভাৱে তেওঁৰ প্ৰাৰ্থিত্ব ঘোষণা কৰা নাই আৰু শেহতীয়াকৈ প্ৰকাশিত প্ৰাৰ্থীৰ দ্বিতীয়খন তালিকাতো পানীহাটি সমষ্টিটো খালী ৰখা হৈছে, তথাপিও নিৰ্যাতিতাৰ মাতৃয়ে নিৰ্বাচনত প্ৰতিদ্বন্দ্বিতা কৰিবলৈ সাজু বুলি স্পষ্ট কৰি দিছে। সংবাদ মাধ্যমৰ আগত তেওঁ কয়, “মই বিজেপি প্ৰাৰ্থী হিচাপে নিৰ্বাচন খেলাৰ সিদ্ধান্ত লৈছোঁ। প্ৰস্তাৱটো বাৰে বাৰে আহিছিল, কিন্তু প্ৰথমতে মই সন্মতি দিয়া নাছিলো। অৱশেষত মহিলাৰ ওপৰত বৃদ্ধি পোৱা অত্যাচাৰ আৰু সুৰক্ষাৰ অভাৱৰ বাবে তৃণমূল কংগ্ৰেছ চৰকাৰক উৎখাত কৰাৰ লক্ষ্যৰে মই প্ৰাৰ্থী হোৱাৰ সিদ্ধান্ত গ্ৰহণ কৰিলোঁ।”
পৰিয়ালটোৱে দাবী কৰা অনুসৰি, আন ৰাজনৈতিক দলেও তেওঁলোকক টিকট দিয়াৰ প্ৰস্তাৱ দিছিল। কিন্তু জীয়ৰীৰ ন্যায়ৰ স্বাৰ্থত তেওঁলোকে বিজেপিক বাছনি কৰে। নিৰ্যাতিতাৰ পিতৃয়ে জানিবলৈ দিয়া মতে, বিজেপিয়ে পানীহাটি সমষ্টিৰ প্ৰস্তাৱ দিছিল আৰু মাতৃগৰাকীয়ে এতিয়া তাত সন্মতি জনাইছে। আনকি মাতৃগৰাকীয়ে নিজে বিজেপি নেতাসকলক ফোন কৰি প্ৰাৰ্থিত্বৰ ইচ্ছা প্ৰকাশ কৰা বুলিও সদৰী কৰে।
উল্লেখ্য যে, ২০২৪ চনৰ আগষ্ট মাহত আৰ জি কৰ চিকিৎসালয় চৌহদত এই জঘন্য ধৰ্ষণ আৰু হত্যাৰ ঘটনা সংঘটিত হৈছিল, যাৰ ফলত সমগ্ৰ দেশজুৰি ব্যাপক প্ৰতিবাদৰ সূত্ৰপাত হৈছিল। শেহতীয়াকৈ ২০২৫ চনৰ জানুৱাৰী মাহত এই গোচৰত এজন স্থানীয় প্ৰভাৱশালী চিভিক ভলণ্টিয়াৰক যাৱজ্জীৱন কাৰাদণ্ডৰ শাস্তি প্ৰদান কৰা হৈছে।
আনহাতে, চিকিৎসকগৰাকীৰ পিতৃ-মাতৃয়ে তৃণমূল কংগ্ৰেছৰ লগতে বাওঁপন্থী দলসমূহকো কঠোৰ সমালোচনা কৰিছে। তেওঁলোকৰ অভিযোগ, চিপিআই(এম) নেতৃত্বাধীন বাওঁপন্থী দলসমূহে তেওঁলোকৰ জীয়ৰীৰ মৃত্যুৰ পৰা ৰাজনৈতিক ফায়দা লুটিছে আৰু তৃণমূল বিৰোধী ভোট বিভাজন কৰি শাসকীয় দলটোক ক্ষমতাত বৰ্তি থকাত সহায় কৰিছে।
এই সন্দৰ্ভত প্ৰতিক্ৰিয়া প্ৰকাশ কৰি চিপিআই(এম)ৰ ৰাজ্যিক সম্পাদক মহম্মদ চেলিমে কয় যে পৰিয়ালটোৰ সৈতে তেওঁলোকৰ কোনো সংঘাত নাই, কিন্তু তেওঁ তেওঁলোকক নিৰপেক্ষ হৈ থাকিবলৈ আহ্বান জনায়। তেওঁ লগতে সন্দেহ প্ৰকাশ কৰে যে পিতৃ-মাতৃ হয়তো ‘ষ্টকহ’ম চিণ্ড্ৰম’ৰ বলি হৈছে, য’ত ভুক্তভোগীয়ে নিজৰ উৎপীড়কৰ প্ৰতি সহানুভূতিশীল হৈ পৰে।
তাত্পৰ্যপূৰ্ণভাৱে, চলিত বৰ্ষৰ জানুৱাৰী মাহত দিয়া এক সাক্ষাৎকাৰত পৰিয়ালটোৱে কোনো ৰাজনৈতিক দলৰ সৈতে জড়িত নোহোৱাৰ কথা প্ৰকাশ কৰিছিল। আনকি কেন্দ্ৰীয় তদন্তকাৰী সংস্থা চিবিআইৰ ভূমিকাৰ লগতে বিজেপিৰ প্ৰতিও তেওঁলোকে ক্ষোভ উজাৰিছিল। কিন্তু এতিয়া তেওঁলোকৰ এই নতুন সিদ্ধান্তই পশ্চিমবংগৰ নিৰ্বাচনী ৰাজনীতিত বিশেষ চৰ্চা লাভ কৰিছে।
