বলিউদৰ প্ৰতিভাৱান অভিনেতা সুশান্ত সিং ৰাজপুতৰ আত্মহত্যাৰ সমগ্ৰ কাণ্ডই এক নতুন মোৰ লৈছে।
কিছুদিন পূৰ্বে সুশান্ত সিং ৰাজপুতৰ পিতৃয়ে সুশান্তৰ চৰ্চিত প্ৰেয়সী ৰীয়া চক্ৰৱৰ্তীৰ বিৰুদ্ধে কেবাটাও ধাৰাত পাটনাত বিহাৰ আৰক্ষীৰ ওতৰত এজাহাৰ দাখিল কৰাৰ পিছতে নতুন মোৰ লৈছে সমগ্ৰ ঘটনাক্ৰমে।
ইতিমধ্যে সুশান্ত সিং ৰাজপুতৰ পিতৃৰ এজাহাৰ ৰুজু কৰি বিহাৰ আৰক্ষীয়ে তদন্ত আৰম্ভ কৰিছে।
বিহাৰ আৰক্ষীয়ে তদন্তৰ বাবে মুম্বাইত উপস্থিত হৈ ঘটনাৰ সন্দৰ্ভত বিভিন্নজনৰ জবানবন্দী সংগ্ৰহ কৰিছে।
সুশান্তৰ সহকৰ্মী, বন্ধু বৰ্গ, আত্মীয়, ৰান্ধনী আৰু প্ৰাক্তন প্ৰেয়সী অংকিতা লাখণ্ডেৰ জবানবন্দী সংগ্ৰহ কৰি বিহাৰ আৰক্ষীয়ে বহু গুৰুত্বপূৰ্ণ তথ্য লাভ কৰিবলৈ সক্ষম হৈছে বুলি জানিব পৰা গৈছে।
ইফালে মূল অভিযুক্ত অভিনেত্ৰী ৰীয়া চক্ৰৱৰ্তীৰ সন্ধান লাভ কৰা নাই বুলি জানিবলৈ দিছে বিহাৰ আৰক্ষীৰ ডিজি গুপ্তেশ্বৰ পাণ্ডেই।
অভিযুক্ত ৰীয়া চক্ৰৱৰ্তীক মুম্বাইত আৰক্ষীয়ে সন্ধান কৰিছে যিদও বৰ্তমানলৈকে অভিনেত্ৰী গৰাকীৰ সন্ধান লাভ কৰা নাই বিহাৰ আৰক্ষীয়ে।
এক সংবাদ প্ৰতিষ্ঠানৰ আগত পাণ্ডেই ৰীয়া চক্ৰৱৰ্তীৰ নাম নোলোৱাকৈ কয়, “যদি কোনো দোষ নাই তেনে তেওঁ আমাৰ তদন্ত প্ৰক্ৰিয়াক সহযোগ কৰা উচিত। আমি কোনো নিৰ্দোষী লোকক গ্ৰেপ্তাৰ নকৰো।”
“যাৰ বিৰুদ্ধে কোনো তথ্য প্ৰমাণ নাথাকে তেওঁ বিৰুদ্ধে কোনা ব্যৱস্থা লোৱা নহয়, কিন্তু তথ্য প্ৰমাণ থকাসকলক আমি এৰি নিদিওঁ। লাগিলে সেয়া পৰিচালক, প্ৰযোজক, বিলিয়নাৰ, ডাঙৰ উদ্যোগপতি যিয়েই নহওক।” ডিজি পাণ্ডেই কয়।
ইফালে বিহাৰ আৰক্ষীয়ে সুশান্ত সিং ৰাজপুতৰ বেংক একাউন্টৰ তথ্যপাতি তথা লেন-দেনো পৰীক্ষা কৰিছে।
উল্লেখ্য যে সুশান্তৰ পিতৃয়ে সুশান্তৰ একাউন্টৰ পৰা ৰীয়া চক্ৰৱৰ্তীয়ে ১৫ কোটি টকা কোনো অজ্ঞাত ব্যক্তিৰ একাউন্টলৈ ট্ৰেঞ্চফাৰ কৰা বুলি এজাহাৰত অভিযোগ কৰিছিল।