প্ৰাক্তন ‘মি. ডিব্ৰুগড় বিশ্ববিদ্যালয়’ তথা ৰাষ্ট্ৰীয় পৰ্য্যায়ৰ ভলিবল, হেণ্ডবল খেলুৱৈ ঋতুৰাজ বৰা নামৰ ডিব্ৰুগড়ৰ মিলন নগৰৰ যুৱকজন কালিৰ পৰা পুডুচেৰিৰ ছেৰিনিটি উপকূলত সন্ধানহীন হৈ থকাৰ পিছত আজি তেওঁৰ মৃতদেহ উদ্ধাৰ হৈছে। সাগৰৰ উপকূলৰ পানীত ওপঙি থকা অৱস্থাত অভিযানকাৰী দলে তেওঁৰ মৃতদেহটো উদ্ধাৰ কৰা বুলি জানিব পৰা গৈছে।
পৰিয়ালৰ সূত্ৰই জনোৱামতে, তেওঁ কালি ৩জন লগৰীয়াৰ সৈতে নিয়মীয়া অনুশীলনৰ বাবে সাগৰ তীৰলৈ গৈছিল। উপকূলৰক্ষীয়ে সাগৰৰ পৰিস্থিতি অনুকূল নহয় বুলি কোৱা আৰু বাধা দিয়া সত্ত্বেও চাৰিওজনে উপকূলৰ বালিত অনুশীলন চলাবলৈ গৈছিল। পিছত ডাঙৰ ঢৌ অহাত বাকীকেইজন উভতি আহিল যদিও ঋতুৰাজ পিছুৱাই অহা নাছিল। পিছত তেওঁক বন্ধুকেইজনে বিচাৰি নাপায় উপকূলৰক্ষীক খবৰ দিয়ে। আজি তেওঁৰ মৃতদেহ উদ্ধাৰ হয়।
২০১৬ চনৰ মি. ডিব্ৰুগড় য়ুনিভাৰ্ছিটি খিতাপধাৰী যুৱকজনে পুডুচেৰিত ফিজিকেল এডুকেইশ্যনত স্নাতকোত্তৰ ডিগ্ৰী অধ্যয়ন কৰি আছিল। তেওঁ ব’ডি বিল্ডাৰ হোৱাৰ উপৰি ৰাষ্ট্ৰীয় পৰ্য্যায়ত ভলিবল আৰু হেণ্ডবল খেলি কৃতিত্ব আৰ্জিছিল। পুডুচেৰি বিশ্ববিদ্যালয়ত স্নাতকোত্তৰ মহলাতো তেওঁ কৃতিত্বৰে উত্তীৰ্ণ হৈ আহিছিল প্ৰতিটো পৰীক্ষা। তেওঁ এইবাৰ অন্তিমটো ছিমেষ্টাৰত অৱতীৰ্ণ হ’বলৈ গৈ আছিল।
ঋতুৰাজৰ মৃতদেহ বিশেষ বিমানযোগে আজি ডিব্ৰুগড় পোৱাৰ কথা। মেধাৱী আৰু প্ৰতিভাশালী যুৱকজনৰ মৃত্যুত ডিব্ৰুগড় মিলন নগৰৰ সমগ্ৰ অঞ্চলটোতে শোকৰ ছাঁ পৰিছে।
