আই পি এলৰ ঊনবিংশতম ছিজনত যেতিয়া ৰাজস্থান ৰয়েলছে খেলপথাৰত নামিব তেতিয়া সকলোৰে চকুৱে এনে এজনক বিচাৰিব যিজন দৰাচলতে দলত একেবাৰেই নাই। দীৰ্ঘদিনৰ স্তম্ভ আৰু দলটোৰ অধিনায়ক সঞ্জু চেমছন। আগন্তুক নতুন ছিজনত চেন্নাই ছুপাৰ কিংছৰ জাৰ্চিত খেলিব সঞ্জুৱে। যিটো নিঃসন্দেহে ৰাজস্থানৰ বাবে এক ডাঙৰ ক্ষতি।
সেই গভীৰতা দলটোৰ নতুন অধিনায়ক ৰিয়ান পৰাগৰ ভাষাতে স্পষ্ট হৈ পৰিছে। তেওঁ কয়, “সঞ্জুৰ কোনো বিকল্প হ’ব নোৱাৰে।” সেয়ে, সঞ্জুৰ অভাৱ পূৰণ কৰাটোৱেই হ’ব এই ছিজনত ৰাজস্থানৰ আগত আটাইতকৈ ডাঙৰ প্ৰত্যাহ্বান।
সঞ্জুৰ প্ৰস্থানৰ লগে লগে আই পি এলৰ দ্বিতীয়টো ট্ৰফী জয় কৰাৰ লক্ষ্যৰে দলটোত বৃহৎ পৰিৱৰ্তন সাধন কৰিছে ৰয়েলছে। নতুন অধিনায়ক হৈছে ৰিয়ান পৰাগ। যোৱা ছিজনত সঞ্জু আঘাতপ্ৰাপ্ত হোৱাৰ পিছত দলটোক নেতৃত্ব দিছিল পৰাগে।
গতিকে ৰিয়ানৰ অধিনায়কত্বৰ অভিজ্ঞতা আছে। সঞ্জুৰ ঠাইত দলটোৱে চেন্নাইৰ পৰা ৰবীন্দ্ৰ জাডেজা আৰু স্পিনাৰ ৰবি বিষ্ণোইক লাভ কৰে। এই সন্দৰ্ভত মেনেজমেন্টো যথেষ্ট আশাবাদী। অৱশ্যে জাডেজাৰ সৈতে অহা ছেম কাৰানৰ আঘাত দলটোৰ বাবে ডাঙৰ ক্ষতি হ’ব পাৰে। মুম্বাই ইণ্ডিয়ানছৰ হৈ আই পি এলত অভিষেক ঘটোৱা ভিগনেশ পুথু এই দলৰ যুৱ মুখ৷ আনহাতে, ৰাহুল দ্ৰাবিড়ৰ ঠাইত প্ৰশিক্ষক হিচাপে ঘূৰি আহিছে কুমাৰ ছাংগাকাৰা।
অৱশ্যে সমগ্ৰ ক্ৰিকেট জগতে এতিয়া বৈভৱ সূৰ্যবংশীৰ বেটলৈ চাই আছে। প্ৰথম ছিজনত ধুমুহাৰ সৃষ্টি কৰা এই যুৱ তাৰকাগৰাকীয়ে ১৯ বছৰ অনুৰ্ধ বিশ্বকাপ জয় কৰাৰ আত্মবিশ্বাসেৰে খেলপথাৰত নামিব। যশস্বী জয়ছোৱাল লগত থকাৰ বাবে ৰাজস্থানে অপেনিঙৰ বাবে বিশেষ চিন্তা কৰিব নালাগে। ইয়াৰ উপৰিও টি-২০ বিশ্বকাপত ৱেষ্ট ইণ্ডিজৰ হৈ বিধ্বংসী বেটিং কৰা শ্বিমৰন হেটমায়াৰে তিনি নম্বৰত খেলাৰ সম্ভাৱনা আছে।
তদুপৰি, অধিনায়ক ৰিয়ান পৰাগ আৰু উইকেটকীপাৰ ধ্ৰুৱ জুৰেলে মধ্য ক্ৰমত শক্তি প্ৰদান কৰিব। ৰবীন্দ্ৰ জাদেজাই অল ৰাউণ্ডাৰ হিচাপে অভিজ্ঞতা লৈ আহিছে। ইংলেণ্ডৰ পেচাৰ জোফ্ৰা আৰ্চাৰে বলিং আক্ৰমণ চম্ভালিব।
দলটোৰ পেচ বিভাগত আছে ক’য়েনা মাফাকা, আদম মিলনে, সন্দীপ শৰ্মা আৰু তুষাৰ দেশপাণ্ডে। অৱশ্যে ৰাজস্থান দলৰ আটাইতকৈ ডাঙৰ দুৰ্বলতা হ’ল এজন ভাল ফিনিছাৰৰ অভাৱ। যদিহে হেটমায়াৰক শীৰ্ষ অৰ্ডাৰলৈ অনা হয় তেন্তে প্ৰথম তিনিজন বাওঁহতীয়া বেটছমেন হ’ব। বহুতে ধাৰণা কৰে যে ইয়াৰ ফলত দলটোৰ বাবে সমস্যাৰ সৃষ্টি হ’ব পাৰে। কাৰণ, শীৰ্ষ ক্ৰমত তিনিজন বাওঁহতীয়া খেলুৱৈ থকাৰ বাবে টি-২০ বিশ্বকাপত ভাৰতে যি সমস্যাৰ সন্মুখীন হৈছিল তাৰ সুযোগ বিপক্ষ দলসমূহে নিশ্চিতভাৱে ল’ব বিচাৰিব।
ইয়াৰ বাহিৰেও পৰাগৰ অধিনায়কত্বক লৈ অনুৰাগীৰ মাজত কিছু দ্বিধাৰ সৃষ্টি হৈছে। কাৰণ যোৱা ছিজনত তেওঁ নেতৃত্ব দিয়া ৮খন মেচৰ ভিতৰত ৰাজস্থানে মাত্ৰ দুখন খেলতহে জয়লাভ কৰিছিল।
সম্ভাৱ্য প্ৰথম একাদশ : যশস্বী জয়ছোৱাল, বৈভৱ সূৰ্যবংশী, শ্বিমৰন হেটমেয়াৰ, ৰিয়ান পৰাগ, ধ্ৰুৱ জুৰেল, ৰবীন্দ্ৰ জাডেজা, ড’নভান ফেৰেইৰা, জোফ্ৰা আৰ্চাৰ, সন্দীপ শৰ্মা, ৰবি বিষ্ণোই, আদম মিলনে।
