নগাঁৱৰ গোমোঠা গাঁৱত ৩৭নং ৰাষ্ট্ৰীয় ঘাইপথত শনিবাৰে দুপৰীয়া সংঘটিত এক ভয়ংকৰ পথ দুৰ্ঘটনাত এজন লোক নিহত হোৱাৰ লগতে আন দুজন গুৰুতৰভাৱে আহত। বৃহৎকায় কাঠৰ কুণ্ডা ভৰ্তি এখন ট্ৰাকে নিয়ন্ত্ৰণ হেৰুৱাই ৰাজপথৰ দাঁতিত এখন ব’লেৰ বাহন হেঁচা মাৰি ধৰাৰ ফলতেই উক্ত দুর্ঘটনাটো সংঘটিত হয়।
দুৰ্ঘটনাটোৰ ফলত ব’লেৰ বাহনখনৰ ভিতৰত বহু সময় ধৰি আবদ্ধ হৈ থাকে তিনিজন লোক। এ এচ-০৯ চি-৬৩৭২ নম্বৰৰ ট্ৰাকখনে কঢ়িয়াই অনা কাঠৰ কুণ্ডাৰ ভৰত চেপেটা লাগে যোৰহাটৰ পৰা নগাঁৱৰ দিশে আহি থকা এ এচ-০১ ডি ৱাই-৯০৩১ নম্বৰৰ ব’লেৰ বাহনখন।
স্থানীয় ৰাইজে আৰক্ষীক অৱগত কৰি ততাতৈয়াকৈ কাষতে থকা এখন জে চি বিৰ সহায়ত উদ্ধাৰ অভিযান আৰম্ভ কৰে।
পাছত ঘটনাস্থলীত নগাঁও আৰক্ষীৰ এটা বৃহৎ দল উপস্থিত হৈ স্থানীয় ৰাইজৰ সহযোগত অতি সংকটজনক অৱস্থাত ব’লেৰ বাহনখনৰ তিনিও যাত্ৰীকে উদ্ধাৰ কৰি নগাঁৱৰ ভোগেশ্বৰী ফুকননী অসামৰিক চিকিৎসালয়লৈ প্ৰেৰণ কৰে যদিও ৰূপক চন্দ্ৰ নামৰ যাত্ৰীজনক চিকিৎসকে মৃত ঘোষণা কৰাৰ লগতে সংকটজনক অৱস্থাত থকা অংকুৰ ৰাজখোৱা আৰু ৰবীন্দ্ৰ পালক উন্নত চিকিৎসাৰ বাবে গুৱাহাটীলৈ প্ৰেৰণ কৰে।
একাংশৰ মতে নিৰ্মীয়মাণ চাৰিলেন যুক্ত ৰাজপথছোৱাৰ দুৰৱস্থাৰ বাবেই উক্ত দুৰ্ঘটনাটো সংঘটিত হোৱা বুলি অভিযোগ উত্থাপন কৰি অসন্তুষ্টি প্ৰকাশ কৰে গড়কাপ্তানি বিভাগৰ বিৰুদ্ধে।