বৰপেটা জিলাৰ বৰপেটা ৰোড আৰক্ষী থানাৰ অন্তৰ্গত ৩১নং ৰাষ্ট্ৰীয় ঘাইপথত কালি সন্ধিয়া প্ৰসুতি কঢ়িয়াই নিয়া এখন বাহন দুৰ্ঘটনাত পতিত হৈ প্ৰসূতি, চালকসহ ৬ জন লোক আহত হয়।
প্ৰাপ্ত তথ্য মতে বঙাইগাঁও জিলাৰ মাণিকপুৰৰ পৰা এখন মাৰুতি ভ্যানেৰে বৰপেটাৰ ফখৰুদ্দিন আলি আহমেদ চিকিৎসা মহাবিদ্যালয়লৈ এগৰাকী প্ৰসূতিক নি থকা অৱস্থাত ৩১নং ৰাষ্ট্ৰীয় ঘাইপথৰ এ আৰ এল ডিপোৰ সন্মুখত ভ্যানখনক এখন তীব্ৰ বেগী ট্ৰাকে মুখামুখিকৈ খুন্দিওৱাৰ ফলত এই দুৰ্ঘটনাটো সংঘটিত হয়।
দুৰ্ঘটনাত আহতসকলক ক্ৰমে কাৰ্তিক পোদ্দাৰ, দেবেশ ৰয়, অজয় পোদ্দাৰ, গংগা পোদ্দাৰ, বিমলা ৰয় (প্ৰসুতি) বুলি চিনাক্ত কৰাৰ বিপৰীতে আহত চালকজনৰ পৰিচয় বাতৰি লিখা সময়লৈকে জানিব পৰা হোৱা নাই।
আহত সকলোক প্ৰথমে বৰপেটা ৰোড চিকিৎসালয়ত ভৰ্তি কৰোৱা হৈছিল যদিও প্ৰাথমিক চিকিৎসা প্ৰদান কৰি তেওঁলোকক উন্নত চিকিৎসাৰ বাবে বৰপেটাৰ ফকৰুদ্দিন আলি আহমেদ চিকিৎসা মহাবিদ্যালয়লৈ প্ৰেৰণ কৰে।
আনহাতে দুৰ্ঘটনাত আহত দেবেশ ৰয় অজয় পোদ্দাৰ আৰু ভ্যানখনৰ চালকৰ অৱস্থা অতি সংকটজনক বুলি জানিব পৰা গৈছে।
