ভাৰতীয় ক্ৰিকেট দলৰ অধিনায়ক ৰোহিত শৰ্মাক লৈ এক নতুন ভাল খবৰ আহিছে। খবৰ অনুসৰি ৰোহিত শৰ্মা আৰু তেওঁৰ পত্নী ৰীতিকা ছাজদেই দ্বিতীয়বাৰৰ বাবে পিতৃ-মাতৃ হৈছে। তেওঁলোকৰ ঘৰলৈ আহিছে পুত্ৰ সন্তান। যদিও ৰোহিত বা ৰীতিকা কোনোৱেই এই কথা এতিয়াও আনুষ্ঠানিকভাৱে ঘোষণা কৰা নাই, তথাপিও ছ’চিয়েল মিডিয়াত অনুৰাগীসকলে তেওঁলোকৰ মংগল কামনা কৰি বিভিন্ন পোষ্ট শ্বেয়াৰ কৰিছে।
বৰ্তমান ৰোহিত শৰ্মাই অষ্ট্ৰেলিয়াৰ বিৰুদ্ধে পাঁচখন খেলৰ টেষ্ট শৃংখলাত অংশগ্ৰহণৰ বাবে প্ৰস্তুতি চলাইছে যদিও এতিয়াও অষ্ট্ৰেলিয়াত উপস্থিত হ’ব পৰা নাই। খবৰ অনুসৰি ৰোহিতে ভাৰতৰ ক্ৰিকেট নিয়ন্ত্ৰণ ব’ৰ্ডৰ পৰা কিছুদিনৰ বাবে ছুটী বিচাৰিছে, কিয়নো তেওঁৰ পত্নী ৰীতিকাই সন্তান জন্ম দিবলৈ ওলাইছে। এতিয়া নতুন খবৰ হিচাপে আত্মপ্ৰকাশ কৰিছে যে ঋতিকা ছাজদেই এটি পুত্ৰ সন্তান জন্ম দিছে।
লগতে পঢ়কঃ চিকিৎসালয়ৰ নৱজাতক সেৱা বিভাগত ভয়ংকৰ অগ্নিকাণ্ড; ১০টি নৱজাতকৰ মৰ্মান্তিক মৃত্যু
২০১৫ চনত ৰোহিত শৰ্মা আৰু ৰীতিকা ছাজদেৰ বিবাহ হয়। বিয়াৰ পিছত ২০১৮ চনত তেওঁলোকৰ প্ৰথম কন্যা সন্তানৰ জন্ম হয়, যাৰ নাম আছিল ছামাইৰা। বন্ধুত্বৰ ৰূপত আৰম্ভ হৈছিল ৰোহিত আৰু ৰীতিকাৰ সম্পৰ্ক। এসময়ত ৰীতিকাই ৰোহিতৰ মেনেজাৰ হিচাপে কাম কৰিছিল, তাৰ পিছত বন্ধুত্ব লাহে লাহে প্ৰেমলৈ পৰিণত হৈছিল। ইজনে সিজনৰ প্ৰেমত পৰাৰ পিছত বিয়া হোৱাৰ সিদ্ধান্ত লয়।
ইপিনে, অহা ২২ নৱেম্বৰৰ পৰা পাৰ্থত ভাৰত আৰু অষ্ট্ৰেলিয়াৰ মাজত অনুষ্ঠিত হ’বলগীয়া পাঁচখন খেলৰ টেষ্ট শৃংখলা আৰম্ভ হ’ব। সকলো ঠিকে থাকিলে ৰোহিত শৰ্মাই প্ৰথমখন মেচত অংশ ল’বলৈ অষ্ট্ৰেলিয়াত উপস্থিত হ’ব পাৰে।
বিশেষকৈ বিশ্ব টেষ্ট চেম্পিয়নশ্বিপ (WTC)ৰ ক্ষেত্ৰত ভাৰতৰ বাবে এই শৃংখলাটো অতি গুৰুত্বপূৰ্ণ। ডব্লিউ টি চিৰ ফাইনেলত খেলিবলৈ হ’লে এই ছিৰিজত অষ্ট্ৰেলিয়াক ৪-১ ব্যৱধানত পৰাস্ত কৰিব লাগিব ভাৰতে। ঘৰুৱা মাটিত অষ্ট্ৰেলিয়াক পৰাস্ত কৰাটো সহজ কাম নহয় যদিও ভাৰতীয় দলৰ শক্তিশালী প্ৰদৰ্শনৰ ওপৰত বহুখিনি নিৰ্ভৰ কৰিব।
ৰোহিত শৰ্মা আৰু অষ্ট্ৰেলিয়াৰ বিৰুদ্ধে তেওঁৰ প্ৰদৰ্শনৰ কথা কবলৈ গ’লে ভাৰতীয় অধিনায়কগৰাকীয়ে এতিয়ালৈকে অষ্ট্ৰেলিয়াৰ বিৰুদ্ধে ১২খন টেষ্ট মেচ খেলিছে। এই সময়ছোৱাত তেওঁ ২২টা ইনিংছত ৩৩.৭১ গড়ে ৭০৮ ৰান সংগ্ৰহ কৰিছে। ইয়াৰ ভিতৰত তিনিটা অৰ্ধশতক আৰু এটা শতক অন্তৰ্ভুক্ত। অষ্ট্ৰেলিয়াৰ বিৰুদ্ধে ৰোহিত শৰ্মাৰ সৰ্বোচ্চ ১২০ ৰান সংগ্ৰহ কেৰিয়াৰৰ অন্যতম স্মৰণীয় ইনিংছ হিচাপে বিবেচিত হৈছে।
