কংগ্ৰেছৰ জ্যেষ্ঠ নেতা তথা সাংসদ ৰকিবুল হুছেইনে আজি সংবাদ মাধ্যমৰ আগত মুখ্যমন্ত্রী হিমন্ত বিশ্ব শৰ্মাৰ বিৰুদ্ধে এক গুৰুতৰ অভিযোগ উত্থাপন কৰিছে। তেওঁ কয় যে ধুবুৰী লোকসভা সমষ্টিত এআইইউডিএফৰ মুৰব্বী বদৰুদ্দিন আজমলক অভিলেখ সংখ্যক ১০ লাখ ভোটৰ ব্যৱধানত পৰাস্ত কৰাৰ পিছৰে পৰা মুখ্যমন্ত্ৰীগৰাকীয়ে তেওঁক লক্ষ্য কৰি মৌখিক আক্ৰমণ চলাই আহিছে।
হুছেইনৰ মতে এসময়ত তেওঁলোকৰ মাজত ভাল সম্পর্ক আছিল যদিও আজমলৰ পৰাজয়ৰ পিছত এই সমীকৰণ সলনি হৈছে। তেওঁ দাবী কৰে যে আজমলৰ পৰাজয়ৰ ফলত ৰাজ্যত ধৰ্মীয় মেৰুকৰণৰ ৰাজনীতি কৰিবলৈ অসুবিধা হোৱা বাবেই মুখ্যমন্ত্ৰীগৰাকী তেওঁৰ ওপৰত ক্ষুণ্ণ হৈ পৰিছে।
ৰকিবুল হুছেইনে অধিক বিস্ফোৰক মন্তব্য কৰি কয় যে বৰ্তমান উজনি অসমত বিজেপিৰ ভেটি দুৰ্বল হৈ পৰিছে। বিশেষকৈ মৰাণ, মটক আৰু চাহ জনজাতিৰ লোকসকলৰ মাজত বিজেপিৰ প্ৰতি অসন্তুষ্টি বৃদ্ধি পাইছে। কেন্দ্ৰীয় চৰকাৰত চাহ জনজাতিৰ কোনো প্ৰতিনিধি নথকাৰ বাবে নিৰ্বাচনত জয়ী হ’বলৈ মুখ্যমন্ত্ৰীয়ে পুনৰ পুৰণি বন্ধু বদৰুদ্দিন আজমলৰ সহায় ল’বলৈ বিচাৰিছে বুলি তেওঁ অভিযোগ কৰে। মুম্বাই বা ডুবাইত জিৰণি লৈ থকা আজমলক হিমন্ত বিশ্ব শৰ্মাই আগন্তুক বিধানসভা নিৰ্বাচনৰ বাবে পুনৰ মাতি অনা বুলিও হুছেইনে সংবাদ মাধ্যমৰ আগত উল্লেখ কৰে।
চামগুৰি বিধানসভা সমষ্টিৰ উপ-নিৰ্বাচনক লৈও ৰকিবুল হুছেইনে তীব্ৰ প্ৰতিক্ৰিয়া প্ৰকাশ কৰিছে। তেওঁ অভিযোগ কৰে যে চামগুৰিৰ ফলাফল একমাত্ৰ মুখ্যমন্ত্ৰীৰ নিৰ্দেশত হোৱা ভোটৰ খেলিমেলি বা ৰিগিঙৰ বাবেহে সম্ভৱ হৈছে। চামগুৰিৰ ৰাইজ তেওঁৰ আপোন বুলি উল্লেখ কৰি তেওঁ কয় যে অহা নিৰ্বাচনত কংগ্ৰেছে এই সমষ্টিটোত বৃহৎ ভোটৰ ব্যৱধানত জয়লাভ কৰি ইয়াৰ প্ৰত্যুত্তৰ দিব। অৱশ্যে ৰকিবুল হুছেইনৰ এই গুৰুতৰ অভিযোগসমূহৰ সন্দৰ্ভত বৰ্তমানলৈকে বিজেপি দল বা অসম চৰকাৰৰ ফালৰ পৰা কোনো আনুষ্ঠানিক প্ৰতিক্ৰিয়া প্ৰকাশ কৰা হোৱা নাই।
