প্ৰায় দহ হাজাৰ টকা দৰমহাৰ এজন ৰেপিডো চালক আৰু তেওঁৰ বেংক একাউণ্টত ৩০০ কোটি টকাৰ লেনদেন। আহমেদাবাদত পোহৰলৈ অহা এই খবৰে এতিয়া সকলোকে আচৰিত কৰি তুলিছে। এনকাউণ্টাৰত এটা বৃহৎ হাৱালা কেলেংকাৰিৰ তথ্য লাভ কৰিছে কেন্দ্ৰীয় তদন্তকাৰী সংস্থা ইডিয়ে। ৫৫০ কোটি টকাৰ এক বিশাল বিত্তীয় জালিয়াতিৰ সৈতে জড়িত থকাৰ অভিযোগত আৰক্ষী আৰু ইডিয়ে চলাইছে তীব্ৰ অভিযান। এই সমগ্ৰ ঘটনাৰ আঁৰত আছে অনলাইন ক্ৰিকেট পণ আৰু শ্বেয়াৰ বজাৰৰ অবৈধ কাৰবাৰ।
আৰম্ভণিতে এই ঘটনা পোহৰলৈ আহে যেতিয়া আহমেদাবাদৰ এজন ৰেপিডো চালক প্ৰদীপ ওডেৰ একাউণ্টত অস্বাভাৱিক লেনদেন চকুত পৰে। মাহে মাত্ৰ ১০ ৰ পৰা ১২ হাজাৰ টকা উপাৰ্জন কৰা এজন ব্যক্তিৰ একাউণ্টত ৩০০ কোটিতকৈ অধিক টকাৰ লেনদেন হোৱাটোৱে তদন্তকাৰীৰ সন্দেহ বৃদ্ধি কৰে। তদন্তত ওলাই পৰে যে প্ৰদীপে মাত্ৰ ২৫ হাজাৰ টকাৰ বিনিময়ত নিজৰ বেংক একাউণ্টটো কিৰণ পাৰমাৰ নামৰ এজন ব্যক্তিক ব্যৱহাৰ কৰিবলৈ দিছিল। ইয়াৰ উপৰিও প্ৰতিখন চহী কৰা চেকৰ বাবদ তেওঁক অতিৰিক্ত ৪০০ টকাকৈ দিয়া হৈছিল।
প্ৰদীপৰ নথি-পত্ৰ ব্যৱহাৰ কৰি প্ৰদীপ এণ্টাৰপ্ৰাইজ নামৰ এটা ভুৱা প্ৰতিষ্ঠান খোলা হৈছিল। একেদৰেই কমলেশ ট্ৰেডিং আৰু ৰাউনাক ট্ৰেডাৰ্ছ নামৰ আন দুটা কোম্পানীও গঠন কৰা হয়। যদিও এই কোম্পানীসমূহৰ কোনো প্ৰকৃত ব্যৱসায়িক কাম-কাজ নাছিল, তথাপিও ২০২৪ চনত পঞ্জীয়ন হোৱাৰ পাছৰে পৰা ইয়াৰ একাউণ্টসমূহত মুঠ ৫৫০ কোটি টকা জমা কৰা হৈছিল। ইডিয়ে প্ৰকাশ কৰিছে যে অনলাইন ক্ৰিকেট পণৰ পৰা লাভ কৰা ধন এই একাউণ্টসমূহৰ জৰিয়তে আন কেইবাটাও কোম্পানীলৈ স্থানান্তৰ কৰা হৈছিল।
তদন্তকাৰীৰ মতে এই চক্ৰটোৱে কেৱল পণ মৰাই নহয়, বৰঞ্চ শ্বেয়াৰ বজাৰতো জালিয়াতি চলাইছিল। পেনি ষ্টকৰ জৰিয়তে শ্বেয়াৰৰ দাম কৃত্ৰিমভাৱে বৃদ্ধি কৰি তেওঁলোকে ধনৰ লেনদেন কৰিছিল। আনকি ইমপেক্ট গুৰুৰ দৰে প্লেটফৰ্মৰ জৰিয়তে ভুৱা অনুদান দি ধন লুণ্ডাৰ কৰাৰো সন্দেহ কৰা হৈছে। এই বৃহৎ পৰিমাণৰ ধন এজন ব্যৱসায়ীৰ ব্যক্তিগত বিয়াৰ খৰচ আৰু অন্যান্য বিলাসী কামত ব্যৱহাৰ কৰা বুলিও তথ্য লাভ কৰিছে বিষয়াসকলে। বৰ্তমান ইডিয়ে এই ধনৰ উৎস আৰু ইয়াৰ আঁৰত থকা আন মাষ্টাৰমাইণ্ডসকলক কৰায়ত্ত কৰিবলৈ তদন্ত অব্যাহত ৰাখিছে।
