ৰাম মন্দিৰৰ বিপুল পৰিমাণৰ ধন আৰু দান-সামগ্ৰী চুৰি হোৱা ঘটনাৰ চৰ্চা চলি থকাৰ মাজতে এইবাৰ শিৰোনামলৈ আহিছে জম্মু-কাশ্মীৰৰ বৈষ্ণোদেৱী মন্দিৰ। মন্দিৰলৈ দান হিচাপে অহা ৫৫০ কোটি টকাৰ ৰূপ নকল নে চুৰি হৈছে, সেই সম্পৰ্কে সবিশেষ প্ৰতিবেদন জমা দিবলৈ তদন্তকাৰী সংস্থাক নিৰ্দেশ দিয়া হৈছে। মঙলবাৰে জম্মু-কাশ্মীৰৰ এখন আদালতে এই নিৰ্দেশ জাৰি কৰিছে।
যোৱা মে’ মাহতে এই সমগ্ৰ বিতৰ্কৰ সূত্ৰপাত ঘটিছিল। বৈষ্ণোদেৱী মন্দিৰৰ তৰফৰ পৰা প্ৰায় ৫৫০ কোটি টকা মূল্যৰ ২০ টন ৰূপৰ দান-সামগ্ৰী গলাই সংৰক্ষণ কৰিবলৈ চৰকাৰী টাকশাললৈ পঠিওৱা হৈছিল। এই প্ৰক্ৰিয়া চলি থকাৰ সময়তে পোহৰলৈ আহে যে মন্দিৰ কৰ্তৃপক্ষই পঠিওৱা ৰূপৰ ভিতৰত মাত্ৰ ৫ শতাংশহে আচল ৰূপ। বাকী ৯৫ শতাংশই হৈছে কেডমিয়াম আৰু লোহা। প্ৰাথমিক অৱস্থাত মন্দিৰ কৰ্তৃপক্ষই দাবী কৰিছিল যে ভক্তসকলে নাজানি ভগৱানৰ ওচৰত নকল ৰূপ অৰ্পণ কৰিছিল। কিন্তু এই বিষয়টোক লৈ অধিবক্তা দীপক শৰ্মাই সৰৱ হৈ পৰে। মন্দিৰত দান কৰা আচল ৰূপৰ সলনি নকল ৰূপ মিহলোৱাৰ সন্দেহত তেওঁ জম্মু-কাশ্মীৰৰ ক্ৰাইম ব্ৰাঞ্চৰ ইন্সপেক্টৰ জেনেৰেলৰ ওচৰত অভিযোগ দাখিল কৰে। ৯ মে’ত দাখিল কৰা উক্ত অভিযোগ পত্ৰত অপৰাধমূলক ষড়যন্ত্ৰ, প্ৰতাৰণা, বিশ্বাসঘাটকতা, ধন আত্মসাৎ আৰু চৰকাৰী নথি-পত্ৰ বিকৃত কৰাৰ অভিযোগ উত্থাপন কৰা হয়। ইয়াৰ উপৰিও সকলো নথি-পত্ৰ আৰু প্ৰমাণ সংৰক্ষণ কৰাৰ লগতে এখন এজাহাৰ দাখিল কৰিবলৈও অধিবক্তাগৰাকীয়ে দাবী জনাইছিল।
কিন্তু তেওঁৰ এই অভিযোগৰ পিছতো ক্ৰাইম ব্ৰাঞ্চে বিশেষ তৎপৰতা প্ৰদৰ্শন নকৰাত তেওঁ জম্মুৰ মুখ্য ন্যায়িক দণ্ডাধীশৰ আদালতত আবেদন জনায়। এই গোচৰত ক্ৰাইম ব্ৰাঞ্চে তেওঁলোকৰ প্ৰতিবেদনত জনাইছিল যে এই অভিযোগটো অনুমোদনৰ বাবে শ্ৰীনগৰৰ ক্ৰাইম বিভাগৰ মুখ্য কাৰ্যালয়লৈ পঠিওৱা হৈছে আৰু প্ৰয়োজনীয় ব্যৱস্থা গ্ৰহণ কৰা হৈছে। অৱশ্যে অভিযোগকাৰীয়ে জানিবলৈ দিয়ে যে এই গোচৰত ক্ৰাইম ব্ৰাঞ্চে এজাহাৰ দাখিল কৰিবলৈ বাধ্য। অভিযোগকাৰীয়ে চিচিটিভি ফুটেজকে ধৰি সকলো নথি-পত্ৰ সংগ্ৰহ আৰু সংৰক্ষণ কৰাৰ বাবে আবেদন জনাইছে। তেওঁ ৰূপৰ সামগ্ৰীসমূহ পৰীক্ষা কৰা আৰু গলোৱা সম্পৰ্কীয় প্ৰতিবেদন, ইলেক্ট্ৰনিক তথ্য আৰু প্ৰমাণো বিচাৰিছে।
এই গোচৰৰ শুনানি গ্ৰহণ কৰিয়েই আদালতে ক্ৰাইম ব্ৰাঞ্চক সকলো তথ্য জমা দিবলৈ নিৰ্দেশ দিছে। অহা ২৯ জুলাইত হ’বলগীয়া গোচৰটোৰ পৰৱৰ্তী শুনানিত সকলো নথি-পত্ৰৰ সৈতে ক্ৰাইম ব্ৰাঞ্চৰ তদন্তকাৰী বিষয়াক ব্যক্তিগতভাৱে উপস্থিত থাকিবলৈ আদালতে কঠোৰ নিৰ্দেশ দিছে।
