সমাগত পঞ্চায়ত নিৰ্বাচনকলৈ ৰাজ্যৰ ৰাজনীতি এতিয়া যথেষ্ট গৰম হৈ পৰিছে ৷ প্ৰতিটো ৰাজনৈতিক দলৰ প্ৰাৰ্থীৰ লগতে নিৰ্দলীয় প্ৰাৰ্থীসকলে ভোটাৰৰ মন আকৰ্ষিত কৰাৰ বাবে আৰম্ভ কৰিছে ন-ন কৌশল ৷
ৰাজ্যত দ্বিতীয় পৰ্যায়ত অনুষ্ঠিত হ’ব লগা পঞ্চায়ত নিৰ্বাচনৰ মনোনয়ন পত্ৰ দাখিলৰ আজি অন্তিম দিনা বৰপেটা চহৰত বিভিন্ন ৰাজনৈতিক দলৰ প্ৰাৰ্থীসকলৰ লগতে নিৰ্দলীয় প্ৰাৰ্থী সকলে মনোনয়ন পত্ৰ দাখিল কৰাৰ বাবে বৰপেটাৰ জিলা উপায়ুক্ত কাৰ্যালয়ত উপস্থিত হৈ নিজৰ নিজৰ মনোনয়ন পত্ৰ দাখিল কৰে ৷
বিজেপি, কংগ্ৰেছ, অগপ আৰু এ আই ইউ ডি এফ দলৰ প্ৰতিগৰাকী প্ৰাৰ্থীয়ে আজি পুৱাৰে পৰা ভালেসংখ্যক সমৰ্থকক লগত লৈ চহৰখনত উপস্থিত হোৱাত চহৰখনত যথেষ্ট ভিৰ হোৱাৰ লগতে তীব্ৰ যানযঁটৰ সৃষ্টি হয়।
লক্ষণীয় যে, আজি মনোনয়ন পত্ৰ দাখিলৰ সময়ত জনপ্ৰিয় অসমীয়া ধাৰাবাহিক “বৰলা কাই”ত ভোলাৰ মাকত অভিনয় কৰি দৰ্শকৰ মন জয় কৰা দেৱযানী গায়নে প্ৰত্যক্ষ ৰাজনীতিত প্ৰৱেশ কৰা দেখা যায়। গায়নে সুন্দৰীয়াদিয়া গাঁও পঞ্চায়তৰ সভানেত্ৰী পদৰ বাবে ভাৰতীয় জনতা পাৰ্টিৰ হৈ আজি মনোনয়ন পত্ৰ দাখিল কৰে।
আনহাতে, মনোনয়ন পত্ৰ দাখিল কৰা প্ৰতিগৰাকী প্ৰাৰ্থীয়ে নিজৰ বিজয় নিশ্চিত বুলি দাবী কৰিছে যদিও প্ৰাৰ্থী সকলৰ ভাগ্য উদয় হ’ব ১২ ডিচেম্বৰতহে।