ৰাষ্ট্ৰসংঘত আমেৰিকাই এক বৃহৎ বাধাৰ সন্মুখীন হৈছে। ৰাষ্ট্ৰসংঘৰ নিৰাপত্তা পৰিষদত বাস্তৱিকতে কূটনৈতিক পৰাজয় আমেৰিকাৰ। বিশেষজ্ঞসকলৰ মতে ইৰাণৰ পাৰমাণৱিক কাৰ্যসূচীক লৈ আমেৰিকাৰ দাদাগিৰি এইবাৰ হয়তো কিছু হ্ৰাস পাব পাৰে।
জানিব পৰা মতে, ইৰাণৰ ওপৰত জাৰি কৰা পাৰমাণৱিক সম্পৰ্কীয় নিষেধাজ্ঞাৰ ওপৰত নিৰীক্ষণ কৰা বিশেষজ্ঞ পেনেলৰ ম্যাদ আৰু এবছৰৰ বাবে বৃদ্ধি কৰাৰ বাবে আমেৰিকাৰ প্ৰস্তাৱত চীন আৰু ৰাছিয়াই ভেটো দিছে।
শেহতীয়া খবৰ অনুসৰি এই প্ৰস্তাৱৰ সপক্ষে ১১ টা ভোট পৰিছিল। অৱশ্যে ছোমালিয়া আৰু পাকিস্তানে ভোটদান কৰা নাছিল। ৰাছিয়া আৰু চীনে ইয়াৰ বিৰুদ্ধে ভোটদান কৰে। এই ভেটোৱে আমেৰিকাৰ চোৰাংচোৱাগিৰিৰ ওপৰত যথেষ্ট আঘাত হানিছে। নিৰাপত্তা পৰিষদৰ ভোটদানত স্তব্ধ হয় আমেৰিকাৰ প্ৰস্তাৱ। গৰিষ্ঠসংখ্যক সদস্যই এই প্ৰস্তাৱক সমৰ্থন কৰিছিল যদিও ৰাছিয়া আৰু চীনৰ ভেটোৰ বাবে ই বাধা হৈ পৰে।
অৱশ্যে ইয়াৰ অৰ্থ এইটো নহয় যে নিষেধাজ্ঞা উঠাই লোৱা হৈছে। কেৱল নিৰীক্ষণ প্ৰক্ৰিয়া সীমিত কৰা হৈছে। মন কৰিবলগীয়া যে ২০২৫ চনৰ ছেপ্টেম্বৰ মাহত ২০১৫ চনৰ ইৰাণ পাৰমাণৱিক চুক্তিৰ অধীনত ব্ৰিটেইন, জাৰ্মানী আৰু ফ্ৰান্সে স্নেপবেক প্ৰক্ৰিয়া আৰম্ভ কৰাৰ পিছত এই পুৰণি নিষেধাজ্ঞা জাৰি কৰা হৈছিল। ইফালে আমেৰিকাই বিশেষজ্ঞ পেনেলৰ ম্যাদ বৃদ্ধি কৰি নিৰীক্ষণৰ সময়সীমা বৃদ্ধি কৰিব বিচাৰিছিল। সেই আশাত ৰাছিয়া আৰু চীনে চেঁচাপানী ঢালি দিলে।
ৰাছিয়া আৰু চীনে কিয় আপত্তি কৰিছে? এই দুয়োখন দেশে দাবী কৰে যে স্নেপবেক প্ৰক্ৰিয়াত ৰিগিং হৈছে। আইনী সমস্যাও আছে। কিন্তু আমেৰিকাই এই দাবী মানি ল’বলৈ অনিচ্ছুক। ফলত জটিলতা বাঢ়িছে। ইফালে ৰাছিয়া আৰু চীনৰ ভেটোক আদৰণি জনাইছে ইৰাণে। তেহৰাণৰ ৰাষ্ট্ৰসংঘৰ মিছনে দুয়োখন দেশক ধন্যবাদ জনাইছে।
অৱশ্যে ইৰাণৰ পাৰমাণৱিক কাৰ্যসূচীক লৈ আন্তঃৰাষ্ট্ৰীয় মহলত উত্তেজনা বৃদ্ধি পাইছে। ইৰাণৰ মজুত থকা ইউৰেনিয়াম আৰু ইয়াৰ স্বতন্ত্ৰ পাৰমাণৱিক কাৰ্যসূচী চলাই নিয়াটো আমেৰিকাই ভাল চকুৰে চোৱা নাই। সেয়েহে ফ্ৰান্স, জাৰ্মানী, ব্ৰিটেইন, আমেৰিকাৰ মাজত বিকল্প নিৰীক্ষণ ব্যৱস্থা গঢ়ি তোলাৰ উদ্যোগ লোৱা হয়। কিন্তু কোৱা বাহুল্য যে ভেটো প্ৰয়োগৰ ফলত সেই পদক্ষেপত এটা বিপৰ্যয়ৰ সৃষ্টি কৰিলে।
