ব্ৰিকছ শীৰ্ষ সন্মিলনত অংশগ্ৰহণ আৰু প্ৰধানমন্ত্ৰী নৰেন্দ্ৰ মোডীৰ সৈতে দ্বিপাক্ষিক আলোচনাত মিলিত হ’বলৈ নতুন দিল্লীত উপস্থিত হৈছে ৰাছিয়াৰ ৰাষ্ট্ৰপতি ভ্লাদিমিৰ পুটিন। প্ৰতিৰক্ষা, শক্তি আৰু প্ৰযুক্তিৰ ক্ষেত্ৰত দুয়োখন দেশৰ মাজত অধিক সহযোগিতা বৈঠকৰ অন্যতম গুৰুত্বপূৰ্ণ বিষয় হ’ব বুলি আশা কৰা হৈছে।
শুকুৰবাৰে মোডী-পুটিনৰ বৈঠকত কেইবাটাও কৌশলগত বিষয়ৰ ওপৰত আলোচনা হোৱাৰ সম্ভাৱনা আছে। ইয়াৰ ভিতৰত ব্ৰাহ্মছ ক্ষেপণাস্ত্ৰৰ বিকাশ, ৰাছিয়াৰ পৰা বাকী থকা এছ-৪০০ প্ৰতিৰক্ষা ব্যৱস্থা যোগান ধৰা আৰু ছু-৫৭ৰ দৰে অত্যাধুনিক যুদ্ধ বিমান যোগান ধৰাৰ প্ৰস্তাৱ।
ক্ৰেমলিনৰ মুখপাত্ৰ দিমিত্ৰী পেস্কোভে কয় যে ভাৰত আৰু ৰাছিয়াই ইতিমধ্যে ব্ৰাহ্মছৰ উন্নীতকৰণৰ বিষয়ে আলোচনা কৰিছে।
ভাৰতত অসামৰিক পাৰমাণৱিক শক্তিৰ ক্ষেত্ৰত সহযোগিতাৰ বিষয়েও আলোচনা হ’ব পাৰে। মস্কোৱে কয় যে ভাৰতত কেইবাটাও নতুন অসামৰিক পাৰমাণৱিক ৰিয়েক্টৰ নিৰ্মাণৰ পৰিকল্পনা সন্দৰ্ভত দুয়োখন দেশৰ মাজত আলোচনা হ’ব।
মোডী-পুটিনৰ আলোচনাত ৰাছিয়া-ইউক্ৰেইন যুদ্ধও গুৰুত্ব পোৱাৰ সম্ভাৱনা আছে। যোৱা সপ্তাহত চাংহাই সহযোগিতা সংস্থাৰ শীৰ্ষ সন্মিলনৰ আঁৰত পুটিনৰ সৈতে হোৱা বৈঠকত মোদীয়ে ‘অন্তহীন যুদ্ধ’ৰ পৰা ‘যুদ্ধৰ অৱসান’লৈ যোৱাৰ প্ৰয়োজনীয়তাৰ কথা কৈছিল।
ইফালে দুদিনীয়া ব্ৰিকছ সন্মিলনতো অংশগ্ৰহণ কৰিব পুটিনে। তেওঁ ব্ৰিকছ বিজনেছ ফ’ৰামৰ পূৰ্ণাংগ অধিবেশনত ভাষণ দিব আৰু পিছত প্ৰধানমন্ত্ৰী মোডীৰ সৈতে ইন’প্ৰ’ম প্ৰদৰ্শনী পৰিদৰ্শন কৰিব। শীৰ্ষ সন্মিলনৰ আঁৰত পুটিনে দক্ষিণ আফ্ৰিকাৰ ৰাষ্ট্ৰপতি চাইৰিল ৰামাফোছা, মালয়েছিয়াৰ প্ৰধানমন্ত্ৰী আনোৱাৰ ইব্ৰাহিম আৰু ইজিপ্তৰ ৰাষ্ট্ৰপতি আব্দেল ফাত্তাহ এল চিছিকো সাক্ষাৎ কৰিব।
ভাৰতৰ অধ্যক্ষতাত অনুষ্ঠিত এইবাৰৰ ব্ৰিকছ সন্মিলনৰ মূল বিষয়বস্তু হৈছে ‘স্থিতিস্থাপকতা, উদ্ভাৱন, সহযোগিতা আৰু বহনক্ষমতাৰ বাবে নিৰ্মাণ’। এই সন্মিলনৰ অন্যতম লক্ষ্য হৈছে বাণিজ্য, বিনিয়োগ, যোগাযোগ, উচ্চ প্ৰযুক্তি, স্বাস্থ্য, কৃষি, খাদ্য, শক্তি আৰু যোগান শৃংখলৰ ক্ষেত্ৰত সহযোগিতা বৃদ্ধি কৰা।
প্ৰধানমন্ত্ৰী মোদীয়ে শনিবাৰে সন্ধিয়া চীনৰ ৰাষ্ট্ৰপতি ছি জিনপিঙকো সাক্ষাৎ কৰাৰ কথা। বাণিজ্য আৰু বিনিয়োগৰ লগতে প্ৰকৃত নিয়ন্ত্ৰণ ৰেখাৰ (এল এ চি) পৰিস্থিতিৰ বিষয়ে তাত আলোচনা হোৱাৰ সম্ভাৱনা আছে। শীৰ্ষ সন্মিলনৰ শেষত জাৰি কৰা হ’ব ‘নতুন দিল্লী ঘোষণাপত্ৰ’।
