মেটাৰ মালিকানাধীন হোৱাটছএপে বৃহস্পতিবাৰে এক বিবৃতিযোগে অভিযোগ উত্থাপন কৰিছে যে ৰাছিয়া চৰকাৰে দেশখনত এই মেছেজিং এপ্লিকেচনটো ব্লক কৰাৰ চেষ্টা চলাইছে। হোৱাটছএপৰ মতে, নাগৰিকসকলক চৰকাৰী মালিকানাধীন অথবা চৰকাৰী তত্ত্বৱধানত থকা এপ ব্যৱহাৰ কৰিবলৈ বাধ্য কৰোৱাৰ লক্ষ্যৰেই এই পদক্ষেপ গ্ৰহণ কৰা হৈছে। ৰাছিয়াত এপটোৰ প্ৰায় ১০ কোটি ব্যৱহাৰকাৰীৰ কথা উল্লেখ কৰি প্লেটফৰ্মটোৱে কয় যে ই এক ‘পিছপৰা পদক্ষেপ’ হ’ব, কাৰণ ইয়াৰ ফলত ব্যৱহাৰকাৰীসকলৰ সুৰক্ষা হ্ৰাস পাব।
এক্সৰ (পূৰ্বৰ টুইটাৰ) এটা পোষ্টত হোৱাটছএপে কয়, “আজি ৰাছিয়া চৰকাৰে ব্যৱহাৰকাৰীক চৰকাৰী মালিকানাধীন নজৰদাৰী এপৰ (surveillance app) দিশে লৈ যোৱাৰ প্ৰয়াসত হোৱাটছএপক সম্পূৰ্ণৰূপে ব্লক কৰাৰ চেষ্টা কৰিছে। ১০ কোটিৰো অধিক ব্যৱহাৰকাৰীক ব্যক্তিগত আৰু সুৰক্ষিত যোগাযোগৰ পৰা আঁতৰাই ৰখাৰ এই চেষ্টা এক নেতিবাচক পদক্ষেপ আৰু ই ৰাছিয়াৰ জনসাধাৰণৰ সুৰক্ষা হ্ৰাস কৰিব। আমি ব্যৱহাৰকাৰীসকলক সংযোগ কৰি ৰাখিবলৈ যাৱতীয় সকলো পদক্ষেপ গ্ৰহণ কৰি যাম।”
টেলিগ্ৰামৰ প্ৰতিষ্ঠাপক পাভেল ডুৰভে ৰাছিয়াই এই এপ্লিকেচনত প্ৰৱেশ নিষিদ্ধ কৰাৰ অভিযোগ উত্থাপন কৰাৰ কিছু সময়ৰ পাছতে হোৱাটছএপে এই মন্তব্য প্ৰকাশ কৰে।
মস্কোৱে ৰাছিয়ানসকলক অধিক কঠোৰভাৱে নিয়ন্ত্ৰিত ঘৰুৱা অনলাইন সেৱা গ্ৰহণ কৰিবলৈ হেঁচা প্ৰয়োগ কৰাৰ লগতে ৰাছিয়াৰ আইন মানি চলাত ব্যৰ্থ হোৱা বিদেশী ইণ্টাৰনেট প্লেটফৰ্মসমূহক লেহেমীয়া কৰা বা নিষিদ্ধ কৰাৰ ভাবুকি প্ৰদান কৰিছে। এই আইন অনুসৰি ৰাছিয়াৰ ব্যৱহাৰকাৰীৰ তথ্য দেশখনৰ ভিতৰতে সংৰক্ষণ কৰাটো বাধ্যতামূলক।
ৰাছিয়াৰ সংবাদ সংস্থা টিএএচএচ (TASS)-ৰ মতে, ৰাছিয়াৰ আইন উলংঘা কৰাৰ অভিযোগত দেশখনৰ টেলিকম নিৰীক্ষণ সংস্থাটোৱে হোৱাটছএপৰ গতি লেহেমীয়া কৰাৰ ব্যৱস্থা গ্ৰহণ কৰিছে। সংস্থাটোৱে দাবী কৰিছে যে দেশত সন্ত্ৰাসবাদী কাৰ্যকলাপ চলোৱাৰ লগতে ধন দাবী আৰু জালিয়াতিৰ বাবেও এই মেছেঞ্জাৰ ব্যৱহাৰ কৰা হয়।
ৰাছিয়াৰ ৰাষ্ট্ৰপতিৰ প্ৰেছ সচিব ডিমিট্ৰি পেস্কোভে জনোৱা মতে, যদি মেটাই ৰাছিয়াৰ আইন মানি আলোচনাৰ বাবে আগ্ৰহ প্ৰকাশ কৰে, তেন্তে হোৱাটছএপ পুনৰ সক্ৰিয় (unblock) কৰাৰ সুযোগ থাকিব। তেওঁ কয়, “যদি নিগমে (মেটা) নিজৰ আপোচবিহীন স্থিতিত অটল থাকে আৰু ৰাছিয়াৰ আইন মানি চলিবলৈ অনিচ্ছা প্ৰকাশ কৰে, তেন্তে ইয়াক আনব্লক কৰাৰ কোনো সম্ভাৱনা নাথাকিব।”
টেলিগ্ৰাম এপ্লিকেচনকো আইন মানি চলিবলৈ নিৰ্দেশ দি ৰাছিয়াৰ নিৰীক্ষণ সংস্থাটোৱে ‘পৰ্যায়ক্ৰমে নিষেধাজ্ঞা’ৰ ভাবুকি প্ৰদান কৰিছে। ইয়াৰ পূৰ্বে ৰাছিয়া চৰকাৰে দেশখনত বিক্ৰী হোৱা সকলো নতুন স্মাৰ্টফোন আৰু টেবলেটত ৰাষ্ট্ৰ-সমৰ্থিত এপ্লিকেচন ‘মেক্স’ (Maks) প্ৰি-ইনষ্টল কৰাটো বাধ্যতামূলক কৰিছে। মেছেজিং আৰু ডিজিটেল লেনদেনৰ সুবিধা থকা এই এপটোক টেলিগ্ৰাম আৰু হোৱাটছএপৰ বিকল্প হিচাপে উপস্থাপন কৰা হৈছে।
