ফ্ৰেন্স অ’পেনে পালে নতুন চেম্পিয়ন। ৰ’লেণ্ড গাৰোছত ইতিহাস গঢ়ি প্ৰথমবাৰৰ বাবে চেম্পিয়ন হয় ৰাছিয়াৰ মীৰা আন্দ্ৰেভাই। ফাইনেলত মীৰাই মাজা চাৱালিন্সকাক ৬-৩, ৬-২ ব্যৱধানত ষ্ট্ৰেইট ছেটত পৰাস্ত কৰে। ৰাছিয়াৰ ১৯ বছৰীয়া মীৰাৰ এয়া প্ৰথমটো গ্ৰেণ্ড শ্লেম।
শনিবাৰে ৰ’লেণ্ড গাৰোছত অনুষ্ঠিত হোৱা মহিলাৰ ফাইনেলত ৰাছিয়ান মীৰা আন্দ্ৰেভা আৰু পোলেণ্ডৰ মাজা চাৱালিন্সকা মুখামুখি হয়। দুয়োজনেই ইয়াৰ আগতে কেতিয়াও গ্ৰেণ্ড শ্লেমৰ ফাইনেলত প্ৰৱেশ কৰা নাছিল। ফলত দুয়োৰে বাবে সেয়া আছিল এক নতুন অভিজ্ঞতা।
দুয়োজনৰে স্নায়ুৰ চাপো আছিল। অৱশ্যে প্ৰতিদ্বন্দ্বীতকৈ মীৰা বহু আগবাঢ়ি আছিল। বৰ্তমান তেওঁ বিশ্বৰ সাত নম্বৰ স্থানত আছে। ফ্ৰেন্স অ’পেনত আঠ নম্বৰ স্থানত। লগতে পেৰিছ অলিম্পিকত ডাবলছত ৰূপৰ পদক জয় কৰাৰ দৰে ডাঙৰ কৃতিত্বও মীৰাৰ আছে।
আনহাতে, চাৱালিন্সকা বৰ্তমানৰ ফ্ৰেন্স অ’পেনৰ চমক। বৰ্তমান তেওঁ বিশ্বৰ ১১৪ নম্বৰ খেলুৱৈ। বাওঁহতীয়া তাৰকাগৰাকীয়ে এইবাৰৰ ফ্ৰেন্স অ’পেনত নতুন মুখৰ খেলুৱৈ হিচাপে প্ৰৱেশ কৰিছিল। ফলত ফাইনেলত মীৰা বহু আগবাঢ়ি আছিল। যদিও ইয়াৰ পূৰ্বে কেতিয়াও গ্ৰেণ্ড শ্লেমৰ ফাইনেল খেলা নাছিল, ১৯ বছৰীয়া মীৰাই স্নায়ুৰ চাপ চম্ভালিব পাৰিবনে নাই সেয়া লক্ষ্যণীয় আছিল।
নাই, ডাঙৰ মঞ্চত মীৰা নাৰ্ভাছ হোৱা নাছিল। তেওঁ নিজৰ খেল খেলিছিল। আৰু সকলোৱে জানিছিল যে তেওঁ যদি নিজৰ খেল খেলে তেন্তে সহজেই জয়ী হ’ব। আৰু তেনেকুৱাই হ’ল। ফাইনেলৰ প্ৰথম ছেটত ৬-৩ পইণ্টৰ ব্যৱধানত জয়লাভ কৰে মীৰাই। প্ৰথম ছেটত দুবাৰকৈ চাৱালিংস্কাৰ চাৰ্ভ ভাঙি পেলায়। দ্বিতীয় ছেটটো আৰু অধিক একপক্ষীয় আছিল। এইবাৰ চাৱালিন্সকাই কোনো পাত্তাই নাপালে। ৬-২ পইণ্টৰ ব্যৱধানত মীৰাই এই ছেটত জয়লাভ কৰে। মুঠতে একপক্ষীয় ফাইনেলত ফ্ৰান্স অ’পেনে নতুন ৰাণী লাভ কৰিলে।
