সামৰণি পৰিল প্ৰথম গুৱাহাটী মুকলি আন্ত: ৰাষ্ট্ৰীয় গ্ৰেণ্ডমাষ্টাৰ দবা প্ৰতিযোগীতাৰ। আজি অন্তিম দিনা প্ৰতিযোগিতাখনৰ চেম্পিয়নৰ খিতাপ অৰ্জন কৰে ছেচ ফেডাৰেশ্যন অফ ৰাছিয়াৰ গ্ৰেণ্ডমাষ্টাৰ প’নকাৰট’ভ পাবেলে(Ponkartove pavel ) ।
ৰাছিয়ান গ্ৰেণ্ডমাষ্টাৰ পাবেলে দশম তথা চূড়ান্ত ৰাউণ্ডত পাৰগুৱেৰ গ্ৰেণ্ডমাষ্টাৰ ডেলগুদু ৰেমিৰেজ নিউৰচক (Delgodo Ramirz Neris) পৰাস্ত কৰি বিজয়ৰ মুকুট পিন্ধে।
আনহাতে প্ৰতিযোগীতা খনৰ দ্বিতীয় খন টপ টেবুলত সমুখ সমৰত অবতীৰ্ণ হৈছিল ইজিপ্তৰ গ্ৰেণ্ডমাষ্টাৰ ফাওজি আধাম( Fawzy Adham ) আৰু ভাৰতীয় ইণ্টাৰনেশ্যানেল মাষ্টাৰ কৃষ্ণা ছি আৰ জি।
আধাম আৰু কৃষ্ণাৰ মাজতে তিনি ঘণ্টাতকৈ অধিক সময় চলা এই তীব্ৰ প্ৰতিদ্বন্দ্বীতাপূৰ্ণ খেল খনত অৱশেষত ভাৰতীয় দবাৰু জনে পৰাজয় বৰণ কৰিব লগা হয়।
এনেদৰে ভাৰতীয় দবাৰু গৰাকী পৰাস্ত কৰি প্ৰতিযোগীতাখনৰ ৰানাৰ্চআপ হয় গ্ৰেণ্ডমাষ্টাৰ আধাম। প্ৰতিযোগীতাখনত তৃতীয় স্থান লাভ কৰে ভাৰতৰ আই এম নিটিশ এছে।
নিটিশে নিজ দেশৰে আন এগৰাকী অভিজ্ঞ দবাৰু কে ৰত্নাকৰণক পৰাভূত কৰে। এই প্ৰতিযোগী খনত অংশ গ্ৰহণ কৰা অসমৰ ৰাহুল এছ সিঙ অন্তিম ২৫ স্থানত অন্তৰ্ভুক্ত হোৱাৰ বিপৰীতে ছাহিল দেয়ে ৩৫ সংখ্যক স্থান আৰু অসম চেম্পিয়ন শান্তনু বৰপাত্ৰ গোহাঁইয়ে ৬০ সংখ্যক স্থানত লাভ কৰে।
উল্লেখ্য যে এই প্ৰতিযোগীতা খনত অসমৰ কেইবাগৰাকীও তৰুণ দবাৰুৱে উন্নত খেল প্ৰদৰ্শন কৰি কেইবাজনো জি এম আৰু আই এমক তীব্ৰ প্ৰত্যাহ্বান জনাবলৈ সক্ষম হৈছিল। এই ক্ষেত্ৰত মায়াঙ্ক চক্ৰবৰ্ত্তী, মৃন্ময় ৰাজখোৱা, আভাচৰম্য হাজৰিকা অন্যতম।
১৪ মাৰ্চলৈ গুৱাহাটীৰ নেহৰু ষ্টেডিয়ামৰ দেশভক্ত তৰুণ ৰামফুকন ইনড’ৰ ষ্টেডিয়ামত চলা আন্ত:ৰাষ্ট্ৰীয় দবা প্ৰতিযোগীতাৰ বঁটা বিতৰণী অনুষ্ঠানৰ লগত সংগতি ৰাখি আযোজন কৰা হয় এক সামৰণি অনুষ্ঠান।
এই অনুষ্ঠানটোত ক্ৰীড়া আৰু যুৱ কল্যাণ মন্ত্ৰী বিমল বৰাই মূখ্য অতিথি হিচাপে উপস্থিত থাকি বিজয়ী অৰু বিজিত সকলৰ মাজত বঁটা প্ৰদান কৰে।
সদৌ অসম দবা সন্থাৰ সভাপতি কন্দৰ্প কলিতাই সঞ্চালনা কৰা সভাখনত সুবোধ মল্ল বৰুৱা আৰু বিৰিঞ্চি কুমাৰ শৰ্মাই সম্পাদনা কৰা ‘দবা’ শীৰ্ষক স্মৃতি গ্ৰন্থ উন্মোচন কৰা হয়।
স্মৃতি গ্ৰন্থখন আনুষ্ঠানিকভাৱে উন্মোচন কৰে অসম বিধান সভাৰ প্ৰধান সচিব হেমেন দাসে। উক্ত অনুষ্ঠানটোত উপস্থিত আছিল ভাৰত দবা সন্থাৰ সভাপতি ভৰত সিং চৌহান, বিশিষ্ট সমাজ সেৱক ফনীন্দ্ৰ নাথ শৰ্মাকে ধৰি বহুকেইগৰাকী বিশিষ্ট ব্যক্তি।
উল্লেখ্য যে আন্ত:ৰাষ্ট্ৰীয় দবা প্ৰতিযোগীতা খনৰ মুঠ প্ৰাইজমানি আছিল ১৫ লাখ টকা। প্ৰতিযোগীতাৰ চেম্পিয়নক আঢ়ৈ লাখ টকা আৰু ট্ৰফী, বিজিতক দুই লাখ টকা আৰু ট্ৰফী প্ৰদান কৰা হয়।
