কাছাৰ জিলাৰ বৃহত্তম চাহ বাগিচা ডলু চাহ বাগিচাৰ ভূমি অধিগ্ৰহণ কৰি হিমন্ত বিশ্বশৰ্মা নেতৃত্বাধীন বিজেপি চৰকাৰে গ্ৰীনফিল্ড বিমানবন্দৰ নিৰ্মাণ কৰাৰ বাবে গ্ৰহণ কৰা প্রস্তাৱৰ বিৰোধিতা কৰিছে সদৌ অসম গ্ৰামীণ শ্ৰমিক সন্থাই।
সদৌ অসম গ্ৰামীণ শ্ৰমিক সন্থাৰ কেন্দ্ৰীয় সমিতিৰ সভাপতি আৰু সাধাৰণ সম্পাদক ক্ৰমে শুভ্ৰজ্যোতি বৰ্ধন আৰু অৰূপ কুমাৰ মহন্তই এক প্ৰেছ বিবৃতি যোগে চৰকাৰৰ ভূমি অধিগ্ৰহণৰ এই কাৰ্যক ৰাইজ বিৰোধী তথা শ্ৰমিক বিৰোধী আখ্যা দিয়ে।
বৃহৎ বণিয়াৰ স্বাৰ্থত ৰাজ্য চৰকাৰে এই পৰিকল্পনা গ্ৰহণ কৰিছে বুলি অভিযোগ কৰি সদৌ অসম গ্ৰামীণ শ্ৰমিক সন্থাই তীব্ৰ ভাষাত প্ৰতিবাদ জনাইছে।
অসমৰ কাগজ কল সমূহৰ পৰা আৰম্ভ কৰি মিকিৰ বামুণী গ্ৰাণ্ট, গুৱাহাটী বিমানবন্দৰৰ সম্প্ৰসাৰণ, ডিব্ৰুগড়ৰ মিৰি গ্ৰাণ্টৰ মাটি বণিয়াৰ নামত নামজাৰি আদি কাৰ্যই হিমন্ত বিশ্বশৰ্মা নেতৃত্বাধীন বিজেপি চৰকাৰৰ ৰাইজ বিৰোধী-শ্ৰমিক বিৰোধী চৰিত্ৰ আৰু বৃহৎ বণিয়া পন্থী প্ৰেম উদঙাই দিছে বুলিও সন্থাই তীব্ৰ ভাষাত সমালোচনা কৰে।
বিবৃতিটোত সন্থাই কয়, “ডলু চাহ বাগিচাৰ উৰ্বৰ ফচলী ভূমি, য’ত চাহ গছ আছেই সেয়া উচ্ছেদ কৰি চাহ শ্ৰমিকসকলৰ জীৱন-জীৱিকাৰ প্ৰশ্নক জলাঞ্জলি দি আৰু অৰ্থনৈতিক-সামাজিক তথা পৰিৱেশ গত প্ৰভাৱৰ কোনো মূল্যায়ন নকৰি ন্যস্তস্বাৰ্থ জড়িত শক্তিৰ স্বাৰ্থত লোৱা ভূমি অধিগ্ৰহণৰ পদক্ষেপ চূড়ান্ত বে-আইনী আৰু অমানৱীয়।”
ইতিমধ্যে কাছাৰ জিলা প্ৰশাসনৰ দ্বাৰা ডলু চাহ বাগিচাত ভূমি অধিগ্ৰহণ সম্পৰ্কে কৰা দুটাকৈ গণ শুনানীত ডলু চাহ বাগিচাৰ শ্ৰমিকসকলে উক্ত ভূমি অধিগ্ৰহণৰ বিৰুদ্ধে বলিষ্ঠ ভাৱে ঐক্যবদ্ধ মত প্ৰকাশ কৰে।
তদুপৰি ডলু চাহ বাগিচাৰ ২৩৮২ গৰাকী চাহ শ্ৰমিকে ভূমি অধিগ্ৰহণৰ বিৰুদ্ধে নিজা স্বাক্ষৰ সম্বলিত মত লিখিতভাৱে কাছাৰ জিলাৰ প্ৰশাসনৰ ওচৰত দাখিল কৰে।
এনে পৰিপ্ৰেক্ষিতত অসম চৰকাৰে শ্ৰমিকসকলৰ মতামতক গুৰুত্বসহকাৰে বিবেচনা কৰি গ্ৰীনফিল্ড বিমানবন্দৰ নিৰ্মাণৰ বাবে উক্ত ডলু চাহ বাগিচাৰ উৰ্বৰ ফচলী ভূমি অধিগ্ৰহণৰ প্ৰস্তাৱ ততালিকে প্ৰত্যাহাৰ কৰি বিকল্প অনুৰ্বৰ ভূমিৰ সন্ধান কৰিব লাগে বুলিও সন্থাই উল্লেখ কৰে।
প্ৰেছ বিবৃতিত নেতাদ্বয়ে ডলু চাহ বাগিচাৰ শ্ৰমিকসকলে এতিয়ালৈকে যি ঐক্যবদ্ধ, শান্তিপূৰ্ণ, গণতান্ত্ৰিক পদ্ধতিৰে চৰকাৰ আৰু মালিক পক্ষ তথা আন ন্যস্তস্বাৰ্থ জড়িত পক্ষৰ সকলো অভিসন্ধিক নস্যাৎ কৰি ধাৰাবাহিক সংগ্ৰাম পৰিচালনা কৰি আছে ইয়াৰ প্রতি পূৰ্ণ সমর্থন আগবঢ়ায়।
বিবৃতিত সাম্প্ৰতিক অসমত উচ্ছেদৰ বিৰুদ্ধে আৰু শ্ৰমিকৰ জীৱন-জীৱিকাৰ অধিকাৰৰ ঐক্যবদ্ধ আন্দোলন খুবেই প্ৰাসঙ্গিক বুলি উল্লেখ কৰে।
লগতে এনে শান্তিপূৰ্ণ আন্দোলনক শিলচৰৰ সাংসদ ৰাজদীপ ৰায়ে মাওবাদীৰ অনুপ্ৰৱেশ আখ্যা দি যি ষড়যন্ত্ৰমূলক কল্পকাহিনীৰ অপপ্ৰচাৰ কৰিব খুজিছে তাকো সন্থাই তীব্ৰ গৰিহণা দিয়ে।
ডলু চাহ বাগিচাৰ শ্ৰমিকসকলৰ ন্যায্য শান্তিপূৰ্ণ-গণতান্ত্ৰিক আন্দোলনৰ প্ৰতি অসমৰ সকলো গণতান্ত্ৰিক সংগঠন, ৰাজনৈতিক দল, ট্ৰেড ইউনিয়ন আৰু ব্যক্তিক সমৰ্থন আগবঢ়াবলৈ সন্থাই বিনম্ৰ অনুৰোধ জনায়।
