সোমবাৰে (৬ জানুৱাৰী) গোৱা আৰক্ষীয়ে গোৱাৰ বিশিষ্ট সাহিত্যিক তথা সাহিত্য অকাডেমী বঁটা বিজয়ী দত্ত দামোদৰ নাইকৰ বিৰুদ্ধে ধৰ্মীয় আৱেগক আঘাত দিয়াৰ বাবে গোচৰ ৰুজু কৰে।
ইণ্ডিয়ান এক্সপ্ৰেছৰ খবৰ অনুসৰি এই সন্দৰ্ভত আৰক্ষীয়ে অভিযোগ লাভ কৰিছিল যে শেহতীয়াকৈ দিয়া এক সাক্ষাৎকাৰত তেওঁ মন্দিৰৰ পুৰোহিতসকলক ‘ডকাইত’ বুলি অভিহিত কৰিছিল।
উল্লেখ্য যে ৭০ বছৰীয়া দত্ত দামোদৰ নাইক পেছাতো ব্যৱসায়ী। এই বিষয়ত তেওঁ কয় যে তেওঁ এজন ‘কঠোৰ নাস্তিক’ আৰু এনে কোনো অভিযোগৰ বাবে তেওঁ ভয় নকৰে।
আৰক্ষীৰ তথ্য অনুসৰি, ২০১৮ চনৰ পাৰ্টগালীত অৱস্থিত শ্ৰী সংস্থা গোকৰ্ণ পাৰ্টগালী জীৱনতম মঠক লৈ এটা আঞ্চলিক নিউজ চেনেলক দিয়া সাক্ষাৎকাৰত নাইকে ভুৱা বক্তব্য দিয়াৰ অভিযোগ উত্থাপন কৰি সতীশ ভট্ট নামৰ এজন ব্যক্তিয়ে কানাকোনা থানাত এজাহাৰ দাখিল কৰিছে।
ভট্টে দ্য ইণ্ডিয়ান এক্সপ্ৰেছক কয়, ‘এটা সাক্ষাৎকাৰত নাইকে মন্দিৰৰ পুৰোহিতসকলক ডকাইত বুলি অভিহিত কৰিছিল। আমাৰ সংস্কৃতিত আমি সকলোৰে মতামতক সন্মান কৰো, কোনোবাই নাস্তিক হওক বা নহওক। কিন্তু এই মন্তব্যৰ জৰিয়তে তেওঁ ইচ্ছাকৃতভাৱে ধৰ্মীয় আৱেগক আঘাত দিছে আৰু আমাৰ সংস্কৃতিক অপমান কৰিছে।’
এই সন্দৰ্ভত গোমন্তক মন্দিৰ ফেডাৰেচন আৰু ধৰ্মীয় প্ৰতিষ্ঠান ফেডাৰেচনৰ জয়শ থালীয়েও শনিবাৰে (৪ জানুৱাৰী) পানাজী থানাত আন এক এজাহাৰ দাখিল কৰিছে।
এই অভিযোগত নাইকে ‘ভাট-পুৰোহিত’ (পুৰোহিত)ক ‘ডকাইত’ বুলি অভিহিত কৰি গুৰুতৰ অপৰাধ সংঘটিত কৰাৰ অভিযোগ উত্থাপন হৈছে। অভিযোগত কোৱা হৈছে যে ঈশ্বৰৰ ওপৰত বিশ্বাস ব্যক্তিগত বিষয়, কিন্তু পুৰোহিত, মন্দিৰ আৰু মঠ-মন্দিৰক লুণ্ঠনকাৰী বুলি অভিহিত কৰি এনেধৰণৰ ৰাজহুৱা বক্তব্য দিয়াটো আইনৰ অধীনত অপৰাধ কাৰণ ই ধৰ্মীয় আৱেগক আঘাত দিয়ে আৰু সামাজিক অশান্তিৰ সৃষ্টি কৰে।
এই সন্দৰ্ভত আৰক্ষীয়ে জনোৱা মতে, বিএনএছ ধাৰা ২৯৯ (যিকোনো শ্ৰেণীৰ নাগৰিকৰ ধৰ্মীয় অনুভূতিক অপমান বা ক্ষোভিত কৰাৰ উদ্দেশ্যেৰে কৰা ইচ্ছাকৃত কাম)ৰ অধীনত এফআইআৰ ৰুজু কৰা হৈছে আৰু তদন্ত আৰম্ভ কৰা হৈছে।
উল্লেখযোগ্য যে নাইকে কংকনী, মাৰাঠী আৰু ইংৰাজী ভাষাত লিখি আহিছে। তেখেতে ২০০৬ চনত ‘জয় কাই জুই’ নামৰ ৰচনা সংকলনৰ বাবে কংকনী ভাষাত সাহিত্য অকাডেমি বঁটা লাভ কৰিছিল। নব্বৈৰ দশকৰ আৰম্ভণিতে তেওঁ সমগ্ৰ গোৱাৰ যুক্তিবাদীৰ এটা দল ‘সমতা আন্দোলন’ প্ৰতিষ্ঠা কৰে।
