কোভিদ-১৯ৰ ক্ষেত্ৰত মানি চলিবলগীয়া সকলো নীতি নিৰ্দেশনাৰ মাধ্যমৰে ৰাজ্যৰ বিউটি পাৰ্লাৰ খুলিবলৈ সাজু হৈছে ৱেলনেছ এণ্ড পাৰ্লাৰ সন্থা। সন্থাই মাথো অপেক্ষা কৰিছে চৰকাৰৰ অনুমতিলৈ।
ছয়মাইলত এক সংবাদমেল সম্বোধন কৰি এই কথা জনায় সন্থাৰ সভাপতি অচিন্ত প্ৰাণ শৰ্মাই। ৰাজ্যৰ চেলুনসমূহ মুকলি কৰিবলৈ অনুমতি বিচাৰি আজি মুখ্য মন্ত্ৰীক স্মাৰকপত্ৰ প্ৰেৰণ কৰা বুলিও তেওঁ জানিবলৈ দিয়ে।
‘চেলুন বিলাক মুকলি কৰি দিবলৈ অনুৰোধ জনাইছো। কোভিদ-১৯ ৰ ক্ষেত্ৰত ল’বলগীয়া ব্যৱস্থাসমূহ লৈ চেলুনসমূহ মুকলি কৰাৰ ক্ষেত্ৰত এখন নীৰিক্ষণ কমিটি গঠন কৰি দিব লাগে। আজি তিনিটা বিশেষ অনুৰোধ জনাই মুখ্য মন্ত্ৰীলৈ স্মাৰকপত্ৰ প্ৰেৰণ কৰা হৈছে।‘ শৰ্মাই কয়।
ইপিনে, যোৱা ১০ দিনৰ পৰা সভাপতি হিচাপে মুখ্য মন্ত্ৰী কাৰ্য্যালয়ৰ সৈতে যোগাযোগ কৰি আছে বুলি তেওঁ উল্লেখ কৰি লগতে কয় ‘তেওঁলোকে আমাক এখন স্মাৰকপত্ৰ প্ৰদান কৰিবলৈ কৈছিল।‘
তেওঁ কয়, ‘প্ৰয়োজন সাপেক্ষে চেলুনসমূহে নীতি নিৰ্দেশনা মানিছে নে নাই সেয়া সন্থাৰ তৰফৰ পৰা নজৰ ৰখাৰ লগতে প্ৰশাসনক সহায-সহযোগিতা আগবঢ়াম। যাতে যন্ত্ৰ-পাতি অথবা অন্যান্য আহিলা প্ৰতিবাৰ ব্যৱহাৰৰ পাছত চেনিটাইজ নকৰাকৈ ব্যৱহাৰ কৰিব নোৱাৰে তাৰ প্ৰতি লক্ষ্য ৰখা হ’ব। ‘
তদুপৰি, চেলুন মুকলি কৰিবলৈ জনোৱা অনুৰোধৰ উপৰিও চেলুন, বিউটি পাৰ্লাৰৰ ঘৰ ভাড়াৰ ক্ষেত্ৰত ৰেহাই দিবলৈ চৰকাৰে মালিকপক্ষক আহ্বান জনাবলৈ সন্থাই অনুৰোধ জনায়।
আনহাতে, ডাঙৰ চেলুনসমূহে বিভিন্ন বেংকৰ পৰা লোৱা লোণৰ ক্ষেত্ৰত বিশেষ ৰেহাই দিবলৈ চৰকাৰক অনুৰোধ জনাই তেওঁ কয় ‘ঋণ পৰিশোধৰ সময়সীমা ৩ মাহৰ সলনি ৬ মাহলৈ বৃদ্ধি কৰিব লাগে। ঋণৰ ক্ষেত্ৰত বিশেষ ৰেহাইৰ ক্ষেত্ৰত বেংক কতৃপক্ষৰ লগত চৰকাৰে আলোচনা কৰিব লাগে।‘
বিউটি পাৰ্লাৰ উদ্যোগৰ সৈতে আঢ়ৈ লক্ষাধিক লোক অসমত জড়িত হৈ আছে বুলি জানিবলৈ দি তেওঁ লগতে কয় ‘চেলুনসমূহৰ এৰিয়া ডাঙৰ হোৱাৰ বাবে ঘৰ ভাড়াও বহুত বেছি হয়। এখন এখন চেলুনত কৰ্মচাৰীৰ সংখ্যা ১০-১৫ গৰাকী থাকে। এজন এজন কৰ্মচাৰীৰ দৰমহা ২০-২৫ হাজাৰ টকা পৰ্য্যন্ত হয়। ঘৰভাড়া, বিদ্যুৎৰ মাছুল পৰিশোধ কৰাৰ ক্ষেত্ৰত কৰ্মচাৰীসকল সমস্যাৰ সন্মুখীন হৈছে।‘
‘বিউটিপাৰ্লাৰ সমূহত লাখ-লাখ টকাৰ প্ৰশাধন সামগ্ৰী ৩-৪ মাহ ধৰি ব্যৱহাৰ কৰা হোৱা নাই, যাৰ ফলত সেইসমূহৰ ম্যাদ ওকলিব আৰম্ভ কৰিছে।‘তেওঁ লগতে কয়।
ইপিনে, লকডাউ:ৰ সময়ছোৱাত দুমাহে মালিক পক্ষই চেলুন বন্ধ হৈ থকা স্বত্তেও নিজৰ ফালৰ পৰা কৰ্মচাৰীক দৰমহা দিলে বুলি উল্লেখ কৰি তেওঁ কয় ‘এতিয়া আমি নিৰুপায়। চৰকাৰৰ লগত সম্পূৰ্ণ সহযোগ কৰি চেলুনসমূহ মুকলি কৰিব পাৰিলে আহিবলগীয়া ভয়াবহ নিবনুৱা সমস্যাৰ পৰা মালিক আৰু কৰ্মচাৰীসকল উদ্ধাৰ হ’ব।‘
তেওঁ জনোৱা অনুসৰি পুৰুষৰ চেলুন বাদ কৰি ৰাজ্যত প্ৰায় ৫ হাজাৰ য়ুনিচেক্স চেলুন আৰু ১০ হাজাৰ মহিলাৰ চেলুন আছে।
