নগাঁও জিলাৰ চামগুৰি সমষ্টিৰ অধীনৰ খাটোৱাল আৰক্ষী নিৱেশৰ অন্তৰ্গত গেৰুৱামুখ অঞ্চলত আৰক্ষীয়ে অভিযান চলাই এজন কুখ্যাত ড্ৰাগছ সৰবৰাহকাৰীক আটক কৰে। লগতে তেওঁৰ পৰা সজীৱ গুলিৰ সৈতে এটা পিষ্টল আৰু নগদ ধনসহ এখন গাড়ী জব্দ কৰে ৷
জানিব পৰা মতে, খাটোৱাল আৰক্ষী নিৱেশৰ ভাৰপ্ৰাপ্ত বিষয়া হৰেণ গগৈৰ নেতৃত্বত যোৱা এটি আৰক্ষীৰ দলে বৃহস্পতিবাৰে নিশা এক গোপন খবৰৰ ভিত্তিত গেৰুৱামুখ অঞ্চলত ড্ৰাগছৰ বিৰুদ্ধে অভিযান চলায় ৷
আৰক্ষীৰ দলটোৱে অভিযান চলাই থকা সময়তে ৰফিকুল ইছলাম নামৰ কুখ্যাত ড্ৰাগছ ব্যৱসায়ীজনে শূণ্যলৈ গুলীচলনা কৰি পলায়ন কৰে।
পৰবৰ্তী সময়ত উক্ত ব্যৱসায়ীজনে ব্যৱহাৰ কৰা ৩৫ ৰাউণ্ড সজীৱ গুলিৰ সৈতে .২২ পিষ্টল আৰু ২৭,৪৮০ টকাসহ এএছ ০২ এছ ০৪৬১ নম্বৰৰ এখন কুইড গাড়ী আৰক্ষীয়ে জব্দ কৰিবলৈ সক্ষম হয় ৷
আনহাতে, আৰক্ষীৰ চকুত ধুলি দি পলায়ন কৰা উক্ত ড্ৰাগছ ব্যৱসায়ীজনৰ বিৰুদ্ধে আজি পুৱা গেৰুৱামুখ অঞ্চলত আৰক্ষীয়ে অভিযান চলাই ৰফিকুল ইছলাম (২৫) নামৰ কুখ্যাত ড্ৰাগছ ব্যৱসায়ীজনক কৰায়ত্ব কৰিবলৈ সক্ষম হয়।ব্যৱসায়ী জনৰ পৰা দুটা ম’বাইল ফোন জব্দ কৰে ৷
উক্ত ড্ৰাগছ ব্যৱসায়ীজনে নগাঁও জিলাৰ বিভিন্ন অঞ্চলত ড্ৰাগছ ব্যৱসায় কৰি আহিছিল বুলি আৰক্ষীৰ এক সুত্ৰই জানিবলৈ দিয়ে ৷
বৰ্তমান খাটোৱাল আৰক্ষী নিৱেশত আটকাধীন অপৰাধীজনক জেৰা অব্যাহত ৰাখিছে বুলি আৰক্ষীৰ সূত্ৰে জানিবলৈ দিয়ে ৷
